ކައުންސިލްތަކަށް ކުރިމަތިލުމުގެ ފުރުސަތު އެމްޑީޕީން ހުޅުވާލައިފި

އަންނައަހަރު ޖެނުއަރީމަހު 18 ވަނަ ދުވަހު ބާއްވާ ރަށުކައުންސިލްތަކާއި، އަތޮޅު ކައުންސިލްތަކާއި، ސިޓީކައުންސިލްތަކުގެ އިންތިޚާބަށް އެމްޑީޕީގެ ނަމުގައި ކުރިމަތި ލުމަށް ބޭނުންވާ ފަރާތްތަކަށް އެޕާޓީން އެފުރުސަތު ހުޅުވައިފިއެވެ.

އެޕާޓީން ކުރައްވާފައިވާ އިއުލާނެއްގައި ބުނެފައިވަނީ އެއިންތިޚާބު ތަކަށް "މިޕާޓީގެ ނަމުގައި ކުރިމަތިލުމަށް އެދޭ މެންބަރުން 28 ނޮވެމްބަރ 2013 ވާ ބުރާސްފަތި ދުވަހުގެ މެންދުރު 12:00 އަށް" އެޕާޓީގެ އޮފީހަށް ހުށަހެޅުމަށެވެ.

އެޕާޓީގެ ނަމުގައި ކައުންސިލްތަކަށް ކުރިމަތިލާ މީހުން ފޯމް ފުރިހަމަކޮށް ޕާޓީގެ އޮފީހަށް ހުށެހެޅުމުގެ އިތުރަށް ފޮނުވާ ފެކްސް ވެސް ބަލައިގަންނާނެ ކަމަށް އެޕާޓީން ވަނީ ބުނެފައެވެ. ނުވަތަ އީމެއިލްވެސް ބަލައިގަންނާނެ ކަމަށް ބުނެފައިވެއެވެ.

"ލޯކަލްކައުންސިލް އިންތިޚާބަށް މިޕާޓީގެޓިކެޓްގައި ކުރިމަތިލައްވަން ބޭނުންފުޅުވާ ފަރާތްތަކުން ފުރަންޖެހޭ އެފްލިކޭޝަންފޯމް ރަސްމީގަޑީގައި މިއޮފީހުންދޫކުރާނެ" ކަމަށްވެސް ބުނެފައިވެއެވެ. އަދި އެޕާޓީގެ ރަސްމީ ވެބްސައިޓުން ޑައުންލޯޑް ކުރެވޭނޭ ކަމަށްވެސް ބުނެފައިވެއެވެ.

މިއިންތިޚާބުގައި އެމްޑީޕީގެ ޓިކެޓްގައި ވާދަކުރައްވާ މީހުންގެ ތެރެއިން އެދާއިރާއަކަށް ކަނޑައެޅިފައިވާ އަދަދަށްވުރެ ގިނަ މީހުން ކުރިމަތިލައިފި ކަމަށްވާނަމަ އެދާއިރާއަކަށް ވާދަކުރައްވާނޭ ކެންޑިޑޭޓަކު ހޮވާނީ ޕާޓީން ބާއްވާ ޕްރައިމަރީއަކުން ކަމަށްވެސް އެމްޑީޕީން ބުނެފައިވެއެވެ. މި ޕްރައިމަރީ ބާއްވާނީ މިމަހު 30 ވަނަދުވަހު ކަމަށްވެސް އެމްޑީޕީން ވާނީ ހާމަ ކުރައްވާފައެވެ.