ރައްޔިތުންނަށް ލިބިފައިވާ މިނިވަންކަމަށް ސަރުކާރުން ހުރަސް ނޭޅުމަށް އެމްޑީޕީން އެދެފި

ރައްޔިތުންނަށް ލިބިފައިވާ މިނިވަންކަމަށް ޔާމިން އަބްދުލް ގައްޔޫމްގެ ސަރުކާރުން ސަރުކާރުން ހުރަސް ނާޅުއްވައި ރައްޔިތުން ބާރުވެރި ކުރެއްވުމަށް މަސައްކަތް ކޮށްދެއްވުމަށް އެމްޑީޕީން ސަރުކާރުގައި އެދެފިއެވެ.

އެޕާޓީން މިކަމަށް އެދިފައިވަނީ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން ރިޔާސީ އިންތިޚާބު ކާމިޔާބު ކުރައްވައި ރާއްޖޭގެ ވެރިކަމާ ހަވާލުވެ ވަޑައިގެންނެވުމުން އެމަނިކުފާނަށް މަރުހަބާ ވިދާޅުވެ ނެރުއްވާފާއިވާ ބަޔާނެއްގައެވެ.

އަބްދުﷲ ޔާމީން "ރިޔާސީ އިންތިޚާބުގައި ހޯދި ފުރިހަމަ ކާމިޔާބީއަށް މަރުހަބާ ދަންނަވައި ހިނދު، އެމްޑީޕީއިން އެދެނީ ޔާމިން އަބްދުލް ގައްޔޫމްގެ ވެރިކަމުގައި ރައްޔިތުންނަށް ލިބިދީފައިވާ މިނިވަންކަމަށް ހުރަސް ނާޅުއްވައި، އެރައްޔިތުން ބާރުވެރިކުރުވުމުގެ މަސައްކަތް ކޮށްދެއްވުމެވެ." އެބަޔާނުގައި ބުނެފައިވެއެވެ.

އެމްޑީޕީން ބުނެފައިވަނީ އެޕާޓީން އަބަދުވެސް ބޭނުންވަނީ ކުރިއަށްއޮތް 5 އަހަރު ދުވަހުގެ ތެރޭ މާތްވެގެންވާ އިސްލާމްދީން ބިނާވެފައިވާ މަތިވެރި މަޤްސަދުތަކާއި ޑިމޮކްރެޓިކް އުސޫލްތަކާއި އެއްގޮތްވާ ގޮތުގެ މަތިން ގައުމަށް އިސްލާޙީ ބަދަލުތަކެއް އައިސް ތަރައްޤީ ވެގެންދިޔުން ކަމަށެވެ.

"ޕްރޮގްރެސިވް ޕާޓީ އޮފް ދަ މޯލްޑިވްސް (ޕީޕީއެމް)ގެ ރިޔާސީ ކެނޑިޑޭޓު ޔާމިން އަބްދުލް ގައްޔޫމް ވާދަވެރި ރިޔާސީ އިންތިޚާބަކަށްފަހު ހަނި އަޣްލަބިއްޔަތަކުން އެއިންތިޚާބު ކާމިޔާބުކުރައްވައި، ކުރިއަށް އޮތް 5 އަހަރު ރައީސުލްޖުމްހޫރިއްޔާގެ މަޤާމަށް ހޮވި ވަޑައިގެންފައިވާތީ އެމަނިކުފާނަށާއި، އެމަނިކުފާނުގެ ޕާޓީ އާއި ސަޕޯރޓަރުންނަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން މަރުހަބާ ދަންނަވަމެވެ." އެމްޑީޕީގެ ނޫސްބަޔާނުގައި ބުނެފައިވެއެވެ.

އެމްޑީޕީން ބުނެފައިވަނީ އެޕާޓީއަކީ އަބަދުވެސް ރައްޔިތުންގެ ފަރާތުން ފެށިގެން އަންނަ ޤާނޫނީ ވެރިކަމެއް ގާއިމްކުރުމަށް ތަކުރާރުކޮށް ވަކާލާތުކުރާ ޕާޓީއެއް ކަމަށެވެ. އަދި މިމަހު 16 ވަނަ ދުވަހު ބޭއްވި ރިޔާސީ އިންތިޚާބަކީ ރައްޔިތުންގެ ނިންމުން ހާމަވެގެންދިޔަ އިންސާފުވެރި އިންތިޚާބެއް ކަމަށްވެސް ބުނެފައިވެއެވެ. ފާއިތުވި ދުވަސްތަކުގައި ރާއްޖޭގައި ރައްޔިތުންގެ ވެރިކަމެއް ގާއިމްވެފައި ނެތުމުން އަގުނުކުރެވޭ ވަރުގެ ގެއްލުންތަކެއް ގައުމަށް ލިބިފައިވާ ކަމަށްވެސް ބުނެފައިވެއެވެ.

ޔާމީންގެ ވެރިކަމަކީ ޑިމޮކްރެސީގެ އުސޫލުތައް ނަގަހައްޓާ، ލާމެހިފައިވާ ދުނިޔެއެއްގައި އެކަހެރިނުވެ ގައުމަށް ތަރައްޤީ ލިބޭނެ ވެރިކަމަކަށްވެގެން ދާނެ ކަމަށް އެޕާޓީން އުންމީދު ކުރާ ކަމަށްވެސް ބުނެފައިވެއެވެ. "އަދި ދައުލަތަށް އިޚުލާސްތެރި ވާދަވެރި ސިޔާސީ ޕާޓީގެ ހައިސިއްޔަތުން ސަރުކާރު ޖަވާބުދާރީކުރުވާއި، ވެރިކަމުގެ ބާރުތައް ބޭނުން ކުރަމުން އަންނަ ގޮތް ބަލާ ރައީސުލްޖުމްހޫރިއްޔާ ޒިންމާދާރު ކުރުމުގެ މަސައްކަތް އެމްޑީޕީއިން ކުރަމުން ގެންދާނެއެވެ. ތަފާތު ކުޑަކޮށް އިންތިޚާބު ކާމިޔާބު ކުރެއްވުމުން ގައުމުގައި ވާދަވެރިންގެ އަޑު އޮތް މިންވަރު ވަރަށް ފުރިހަމައަށް ހާމަވެގެންދިޔަކަމަށް މިޕާޓީއިން ދެކެމެވެ." އެބަޔާނުގައި ބުނެފައިވެއެވެ.