ސިޔާސީ ކަންކަމަކީވެސް ޕްރޮފެޝަނަލްކޮށް ކުރެވޭނެ ކަމެއްކަން ދައްކައިދޭނަން:ރިޔާޒު

ރައްޔިތުން ފުރުސަތު ދެއްވައިފި ކަމަށްވާނަމަ ސިޔާސީ ކަންކަމަކީވެސް ޕްރޮފެޝަނަލްކޮށް ކުރެވިދާނެ ކަމެއް ކަން ސާބިތު ކޮށްދެއްވާނެ ކަމަށް ފުލުހުންގެ ޚިދުމަތުން މިރޭ ރިޓަޔާކުރެއްވި ކުރީގެ ޕޮލިސް ކޮމިޝަނަރ އަބްދުﷲ ރިޔާޒު ވިދާޅުވެއްޖެއެވެ.

 ރިޔާޒުގެ ޝަރަފުގައި އިސްކަންދަރު ކޮށީގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރިޓަޔާ ކުރެއްވުމަށްފަހު ދެން ނިކުމެ ވަޑައިގަންނަވާނީ އާދިމާއަކަށް ކަމަށެވެ. އެމަނިކުފާނު ދެން ނިކުމެ ވަޑައިގަންނަވާނީ ސިޔާސީ ދާއިރާއަށް ކަމަށްވެސް ވިދާޅުވިއެވެ. އެމަނިކުފާނު އެދާއިރާއަށްވެސް ނިކުންނަވަނީ ދިވެހި ރައްޔިތުންނަށް ޚިދުމަތް ކުރެއްވުމުގެ ނިޔަތުގައި ކަމަށްވެސް ވިދާޅުވިއެވެ.

އެމަނިކުފާނުގެ ސިޔާސީ ހަޔާތް ފެށުމަށް މަސައްކަތް ކުރައްވަނީ ﷲގެ ރަހުމަތާއި ރައްޔިތުންގެ ތާއީދާއި އެއްބާރުލުމާއެކު ކަމަށް ވިދާޅުވިއެވެ. މިދާއިރާއަށް ކުރިމަތި ލައްވާއިރު އެމަނިކުފާނުގެ ވިސްނުންފުޅަކީ ސިޔާސީ މަސައްކަތަކީވެސް ޕްރޮފެޝަނަލް މަސައްކަތެއްކަން އިތުބާރާއެކު ރައްޔިތުންނަށް ހާމަކޮށްދެއްވުން ކަމަށް ވިދާޅުވިއެވެ.

ރިޔާޒު ވިދާޅުވީ މިހާރު ރާއްޖޭގައި އޮތް ސަރުކާރަކީ ވަރަށްގިނަ މީހުންގެ އެއްބާރުލުމާއި ތާއީދާއެކު ހޮވިފައިވާ ސަރުކާރެއް ކަމަށެވެ. އަދި ވަރަށްގިނަ ކަންތައްތައް ރައްޔިތުންނަށް ކޮށްދެއްވާނެ ކަމަށް ވައުދުވަމުން އައިސްފައިވާ ސަރުކާރެއް ކަމަށެވެ. އެމަނިކުފާނު ވިދާޅުވީ ލިބިވަޑައިގެންފައިވާ ތައުލީމަކާއި ތަޖުރިބާއެއް ބޭނުންކޮށްގެން ރައްޔިތުންނަށް ޚިދުމަތް ކޮށްދެއްވުގައި ހުންނަވާނެ ކަމަށެވެ. "އަދި ﷲގެ ރަހުމަތާއެކު ދިވެހިރާއްޖޭގެ ރައްޔިތުން އަޅުގަނޑަށް ފުރުސަތު ދެއްވައިގެން އެރައްޔިތުންގެ ސަލާމަތާއި ރައްކާތެރި ކަމަށް އަދި އެރައްޔިތުންގެ ތަރައްގީއަށް މަސައްކަތް ކޮށްދިނުމުގެ އެމްބެސެޑަރ އެއްގެ ގޮތުގައި ނުވަތަ އިންތިޚާބު ކުރެވޭ މީހެއްގެ ގޮތުގައި އެފަދަ ފުރުސަތެއް އަޅުގަނޑަށް ލިބިއްޖެއްޔާ އަޅުގަނޑު ދިވެހިރާއްޖޭގެ ރައްޔިތުންނަށް ދައްކައިދޭނަން ﷲގެ ރަހުމަތްފުޅާއެކު ސިޔާސީ ކަންކަމަކީވެސް ޕްރޮފެޝަަނަލްކޮށް ގައުމަށް މަސައްކަތް ކުރެވޭނެ ކަމެއްކަން،" ރިޔާޒު ވިދާޅުވިއެވެ.

ރިޔާޒު ވިދާޅުވީ އެންމެނަށްވެސް އެންމެ މުހިންމުވާންވާނީ ގައުމު ކަމަށެވެ. ވެރިކަމުގައި ހުންވާ ބޭފުޅަކަށް ސިޔާސީ ގޮތުން ވަކި ކަންކަމެއް ކޮށްދިނުމުގެ ބަދަލުގައި ގައުމު މުހިންމު ވާންޖެހޭ ކަމަށެވެ. ގައުމުގެ ތަރައްގީއަށްޓަކައި މަސައްކަތް ކުރައްވާނީ އެވިސްނުމުގައި ކަމަށްވެސް ވިދާޅުވިއެވެ.

ރިޔާޒު ފުލުހުންގެ ޚިދުމަތުން ރިޓަޔާ ކުރެއްވީ 24 އަހަރު އެތަނުގައި މަސައްކަތް ކުރެއްވުމަށްފަހުއެވެ. މިމުއްދަތުގައި އެންމެ އުފާވި ދުވަހަކީ 16 ނޮވެމްބަރު ކަމަށެވެ. އެއީ ގައުމު ސިޔާސީ ގޮތުން ވަރަށް ބޮޑަށް ބައިބައިވެފައިވާ ދަނޑިވަޅެއްގައި ރިޔާސީ އިންތިޚާބުގެދެވަަނަ ބުރުގެ ވޯޓުންލުން ބާއްވައި އައުސަރުކާރު ހޮވިދުވަހެވެ. އެންމެ އުފާވީ އަލަށް ހޮވިސަރުކާރަކީ ފުލުހުންގެ މުއައްސަސާއި، އެހެނިހެން މުއައްސަސާތަކަށް އިހުތިރާމް ކުރާ ސަރުކާރަކަށްވީތީ ކަމަށް ވިދާޅުވިއެވެ.

އެމަނިކުފާނުގެ ފަރާތުން އެއްވެސް ފުލުހަކު ހިތްހަމަނުޖެހޭ ކަމެއްވެފައިވާ ކަމަށްވާނަމަ މައާފަށްވެސް އެދިވަޑައިގެންނެވިއެވެ.

އެމަނިކުފާނު ވިދާޅުވީ އަބަދުވެސް ފުލުހުންނަށް އެހީވުމަށް ތައްޔާރަށް ހުންނެވި ކަމަށެވެ. "މިފުރުސަތުގައި ދަންނަވާލަން ތިޔަބޭފުޅުން ދެކޭށޭ އަޅުގަނޑަކީ ހަމަ ޕޮލިސްއަށް އޮތް އެސެޓެއްގެ ގޮތުގައި. އަޅުގަނޑު ކޮންމެ ދާއިރާއެއްގައި ކޮންމެ މަސައްކަތެއް ކުރިޔަސް އަޅުގަނޑަށް ވެވެންއޮތް ކޮންމެ އެހީތެރި ކަމެއް ކޮންމެ ވަގުތަކުވެސް ފުލުހުންނަށް ދޭނަން،" އެމަނިކުފާނު ވިދާޅުވިއެވެ.

"އަޅުގަނޑުމެން މިއަށްވުރެ ބޮޑަށް ލޯބިވާ ތަނެއް، އިންސްޓިޓިއުޝަނެއް، ޚިދުމަތެއް ނޯންނާނެ. އެހެންވީމާ އެޔަގީންކަން ތިޔަ އެންމެ ބޭފުޅުންނަށް އަޅުގަނޑު އަރުވަން،" އެމަނިކުފާނު ވިދާޅުވިއެވެ. މިރޭގެ ޖަލްސާގައި ނާއިބު ރައީސް ޑރ. މުހަމައްދު ޖަމީލް އަހުމަދާއި، ހޯމްމިނިސްޓަރ އުމަރު ނަސީރާއި، ޑިފެންސް މިނިސްޓަރ މުހައްމަދު ނާޒިމާއި، ކޮމިޝަނަރ އޮފްޕޮލިސް ހުސައިން ވަހީދު ބައިވެރިވެ ވަޑައިގެންނެވިއެވެ. އަދި ފުލުހުންގެ ބައެއް އޮފިސަރުންވެސް ބައިވެރިވެ ވަޑައިގެންނެވިއެވެ.