ފުލުހުން 100 ދުވަހުގެ މަގުޗާޓު އެކުލަވާލައި ތަންފީޒު ކުރަން ފަށައިފި

މިސަރުކާރުގެ ފުރަތަމަ 100 ދުވަހުގެ ތެރޭގައި ފުލުހުންގެ ޚިދުމަތްތައް ކުރިއަރުވައި ތަރައްގީ ކުރުމަށް މަގުޗާޓެއް އެކުލަވައި މިއަދު އަމަލު ކުރަން ފަށައިފި ކަމަށް ފުލުހުން ހާމަކުރައްވައިފިއެވެ.

ފުލުހުންގެ ވެބްސައިޓުގައި ބުނެފައިވަނީ މި 100 ދުވަހުގެ ތެރޭގައި ވަރަށްގިނަ ކަންކަން ހާސިލް ކުރުމަށް ކަނޑައަޅާފައިވާ ކަމަށެވެ. އެގޮތުން މިހާރު އެމުއައްސަސާއަށް ހުށަހެޅިފައިވާ މައްސަލަތަކުގެ ތެރެއިން 80 އިންސައްތަ ނިންމުމަށްފަހު ޕްރޮސެކިޔުޓާޖެނެރަލްގެ އޮފީހަށް ފޮނުވުމަށްވެސް ވަނީ ނިންމާފައެވެ.

މީގެތެރޭގައި ހިމެނޭ ކުދިކުދި މައްސަލަތައް 30 ދުވަސްތެރޭ ނިންމުމަށްވެސް ވަނީ ކަނޑައަޅާފައެވެ. ފުލުހުން މިހެން ބުނެފައިވިޔަސް މިހާރު އެތަނަށް ހުށަހަޅާފައިވަނީ ކިތައް މައްސަލަ ކަމެއް ހާމަކޮށްފައެއް ނުވެއެވެ.

ފުލުހުންގެ 100 ދުވަހުގެ މަގުޗާޓުގައި ބުނެފައިވަނީ ކުށްކުރުމުގެ ކުރިން އެކަމެއް ހުއްޓުވުމުގެ ގޮތުން ޚާއްސަ އޮޕަރޭޝަންސް ތަކެއްވެސް ހިންގާނެ ކަމަށެވެ. އަދި މާލެސިޓީގެ މަގުމަތީގައި މިހާރުހުރި ކެމެރާތަކުގެ އަދަދު 150 އަށް އިތުރު ކުރާނެ ކަމަށްވެސް ބުނެފައިވެއެވެ. އަދި އައްޑޫ ސިޓީ ޝަމްސުއްދީން ބޮޑުފަނޑިޔާރު ތަކުރުފާނު މަގު ނުވަތަ ލިންކު ރޯޑުގެ 5 ސަރަޙައްދެއްގައި ސީ.ސީ.ޓީ.ވީ ކެމެރާ މިމުއްދަތުގެ ތެރޭގައި ހަރުކުރެވޭނެ ކަމަށްވެސް ބުނެފައިވެއެވެ.

ރައްޔިތުންގެ މުދަލާއި ވިޔަފާރި ހިމާޔަތް ކުރުމުގެ ގޮތުން ރައްޔިތުން ބޭނުންވާ ގޮތަށް ރައްޔިތުންނާ ގާތުން ޚިދުމަތް ދިނުމަށްވެސް މަގުޗާޓުގައި ކަނޑައަޅާފައިވެއެވެ. އަދި ކުށްކުރުން މަދު ކުރުމުގެ ގޮތުން ކުޑަކުދިންނަށް ކުރާ ޖިންސީ އަނިޔާތަކުން ސަލާމަތްކޮށް އެފަދަ ޢަމަލުތައް ހުއްޓުވުމަށްޓަކައި މާލެއާއި، އިތުރު 2 އަތޮޅެއްގައި "ބީރެޑީ ކޭމްޕް" ހިންގުމަށްވެސް ވަނީ ނިންމަވާފައެވެ.

"ޒުވާނުންނަށް ވަޒީފާގެ ފުރުޞަތު ހޯދައިދިނުމުގެ ގޮތުން ކަނޑުމަތީގެ އުޅަނދުފަހަރު ދުއްވުމުގެ ލައިސަންސް ނަގައިދިނުމުގެ ކޯހެއް ހިންގުމާއި ކްރައިމް ޕްރިވެންޝަން ކޮމިޓީތަކުގެ ޤަވާޢިދު ފާސްކޮށް އެކޮމިޓީތައް އެކުލަވައިލުމުގެ މަސައްކަތް" މި 100 ދުވަސްތެރޭގައި ފަށާނެ ކަމަށްވެސް މަގުޗާޓުގައި ބުނެފައިވެއެވެ.

މިމަގުޗާޓުގައިވާ ގޮތުން ފުލުހުންގެ މުއައްސަސާ ހަރުދަނާކޮށް ތަރައްޤީ ކުރުމުގެ ގޮތުން ހިންގާ ޙަރަކާތްތަކުގެ ތެރޭގައި 2014 ން 2018 އަށް އެކުލަވާލާ ސްޓްރެޓިޖިކް ޕްލޭން މިމުއްދަތުގައި އިފްތިތާޙް ކުރުމަށްވެސް ވަނީ ނިންމަވާފައެވެ.

ފުލުހުންނާމެދު ކުރާ ޝަކުވާތައް ބެލޭނެ އައު ނިޒާމެއް ޤާއިމްކޮށް އެކަމުގެ ޤަވާޢިދު އެކުލަވައިލުމާއި، ބެލިސްޓިކްސް ހެކި ތަޙުލީލު ކުރުމުގެ ޚިދުމަތް ފެށުމަށް ރާއްޖެއިން ބޭރުން މުވައްޒަފުން ތަމްރީނު ކުރަން މިމުއްދަތުގައި ފަށާނެ ކަމަށްވެސް މަގުޗާޓުގައި ބުނެފައިވެއެވެ.

މިއާއެކު އަންހެނުންނަށް ޚާއްޞަ ކޮށްގެން ވަޒީފާގެ 50 ފުލުޞަތު ފުލުހުންގެ މުއައްސަސާއިން ދިނުމަށްވެސް މިމަގުޗާޓުގައި ވަނީ ކަނޑައަޅާފައެވެ. މީގެ އިތުރުން ފުލުހުންގެ ދާއިރާގެ ވަޒީފާތަކަށް ޒުވާނުން އަހުލުވެރި ކުރުމަށް ކެރިއަރ ފެއަރއެއް ވެސް ބޭއްވުމަށްވަނީ ކަނޑައަޅާފައެވެ. އަދި ދޫނިދޫގައި 10 ގޮޅި ބިނާކުރަން ފެށުމާއި، ކުޑަކުދިންނަށް ޚާއްޞަކޮށްގެން ޑިޓެންޝަން ފެސިލިޓީޒް ޤާއިމްކުރުމުގެ އިތުރުން މިހާރު ފުލުހުންގެ ޚިދުމަތް ޤާއިމް ކުރެވިފައިނުވާ 7 އިދާރާގައި ފުލުހުންގެ ޚިދުމަތް ޤާއިމް ކުރުމަށްވެސް ވަނީ މި މަގުޗާޓުގައި ހިމަނާފައެވެ.

މަގުޗާޓުގައިވާ ގޮތުން ފުލުހުންގެ ތަހުގީގުތައް ހަރުދަނާކޮށް ފުޅާކުރުމަށް މައިގަނޑު 4 ޙަރަކާތެއް ހިންގުމަށްވެސްވަނީ ކަނޑައަޅައިފައެވެ.