ޒަޢާމަތާ ހަވާލުވީ ރައްޔިތުންގެ ވަރަށްގިނަ އުންމީދުތަކެއް ފުރިހަމަ ކޮށްދިނުމަށްޓަކައި

ރާއްޖޭގެ ވެރިކަމާ ހަވާލުވީ، ރައްޔިތުންގެ ވަރަށްގިނަ އުންމީދުތަކެއް ފުރިހަމަ ކޮށްދިނުމަށްޓަކައި ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.

އެމަނިކުފާނު މިހެންވިދާޅުވީ އެމަނިކުފާނުގެ ކެބިނެޓަށް މިއަދު 6 ވަޒީން އައްޔަން ކުރެއްވުމަށްފަހު އެބޭފުޅުންނާ ވާހަކަ ދައްކަވަމުންނެވެ. "އަޅުގަނޑުމެންގެ ހަމަ ކޮންމެ ވަޒީރަކީ އިޚްލާޞްތެރި ކަމާއެކީ މަސައްކަތް ކުރައްވާ ބޭފުޅަކަށްވުމުގެ އިތުރުން، އަޅުގަނޑު މި މަސައްކަތް މިކުރަނީ، ޓައިމްލައިނެއް ހަދައިގެން. އަޅުގަނޑު މަސައްކަތް މިކުރަނީ، ކުރު މުއްދަތެއްގެ ތެރޭގައި، އަޅުގަނޑުމެން މިދެކެން ބޭނުންވާ ޙަޤީޤަތާ ހަމައަށް ވާސިލުވުމަށްޓަކައި މަސައްކަތްތަކެއް ކުރަން" ރައީސް ވިދާޅުވިއެވެ.

މިކަން ހާސިލް ކުރުމަށްޓަކައި ކޮންމެ ވަޒީރަކުވެސް އެބޭފުޅެއްގެ "ލިޔާޤަތާއި ޤާބިލިއްޔަތު ތަންދިން އެންމެ ފުރިހަމަ މިނެއްގައި،" މަސައްކަތް ކޮށްދެއްވުމަށް އެމަނިކުފާނު އެދިވަޑައިގެންނެވިއެވެ. އެމަނިކުފާނު ވިދާޅުވީ ރައްޔިތުން އެތިބީ ވަރަށް ކެތްތެރިކަން މަދުވެފައި ކަމަށެވެ. "އަޅުގަނޑުމެންނަށް ފެނިގެން މިދިޔައީ، ހަމަ ވީރާނާވަމުންދާ މުއައްސަސާތަކެއް. މުއައްސަސާތައް އާރާސްތުކުރަން އެބަޖެހޭ. އަދި ހަމައެއާއެކީ، ރައްޔިތުންނަށް ހިތްހަމަޖެހުން ހޯދައިދޭން އެބަޖެހޭ. ރައްޔިތުންނަށް ކަށަވަރުކަން ހޯދައިދޭން އެބަޖެހޭ. އަދި ދިވެހިރާއްޖޭގައި ޤާނޫނީ ޙުކޫމަތް ދަމަހައްޓާނެ ކަމުގެ ކަށަވަރުކަން، ރައްޔިތުންނަށް އެބަ ހޯދައިދޭންޖެހޭ،" ކަމަށް ރައީސް ޔާމީން ވިދާޅުވިއެވެ.

މިކަންކަން ކޮށްދެއްވުމުގައި އެއްވެސް ވަޒީރަކު ފަސްޖެހިވަޑައިނުގެންނެވުމަށްވެސް ރައީސުލް ޖުމްހޫރިއްޔާ އެދިވަޑައިގެންނެވިއެވެ. "ވަރުބަލިފުޅުވުމެއްނެތި، މަސައްކަތުގައި މަޝްޣޫލުވެވަޑައިގެން ތިއްބަވައިގެން އަޅުގަނޑަށް، އަޅުގަނޑުގެ ސަރުކާރަށް ތިޔަބޭފުޅުންގެ އިޚްލާޞްތެރި ޚިދްމަތް ދެއްވުމަކީ، އަޅުގަނޑު އެދޭ ކަމެއް. އަދި ދިވެހި ރައްޔިތުން އެކަމުގެ އިންތިޒާރުގައި ތިބި ކަމެއް. ތިޔަބޭފުޅުންގެ ފަރާތްޕުޅުން މި އެއްބާރުލުން ލިބޭނެކަމާ ދޭތެރޭގައި އަޅުގަނޑު ޝައްކެއްނުކުރަން،" އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ކުރިއަށްއޮތް 5 އަހަރަކީ، ދިވެހި ރައްޔިތުން ދުވަހަކުވެސް ނުދެކޭފަދަ އުފާފާގަތި، މަޞްލަޙަތު އޮތް، ޞުލްޙަވެރިކަމާއެކީ ދިވެހި ރައްޔިތުން ކުރިއަށް ދިޔުމުގެ މިޞްރާބު ޖަހައިދޭ 5 އަހަރު ކަމަށް ދައްކުވައިދެއްވާނެ ކަމަށެވެ.

އެމަނިކުފާނު ވިދާޅުވީ ރައްޔިތުން އެދޭ ކަންކަމުގެ އެންމެ ބޮޑެތި ކަންކަން އެކުލެވޭ 100 ދުވަހުގެ ރޯޑްމެޕެއް ކެބިނަޓަށް ހުށަހަޅުއްވާނެ ކަމަށެވެ. "މިއާއެކީ މި މުއްދަތުގެ ތެރޭގައި އަޅުގަނޑުމެން ބޭނުންވަނީ، ރައްޔިތުންނަށް ބޭނުންވާ ޚިދްމަތްތައް ފޯރުކޮށްދިނުމަށް. އެހެންވީމާ، އަޅުގަނޑު ދެކެން ބޭނުންވަނީ، ތިޔަބޭފުޅުންނާއެކީ، ގާތް ގުޅުމަކާއެކީ މަސައްކަތް ކުރުމުގެ އުފާވެރި ވެށްޓެއް ޤާއިމްވެގެންދިޔުން،" ކަމަށްވެސް ވިދާޅުވިއެވެ.