ޕީ.ޕީ.އެމް ކޯލިޝަންގެ މެނިފެސްޓޯ ތަންފީޒު ކުރައްވަން ފަށްޓަވައިފި

ޕީ.ޕީ.އެމް.ގެ މެނިފެސްޓޯގައި ހުރި ކަންތައްތަކާއި، އެ ޕާޓީއާ ގުޅިގެން މަސައްކަތްކުރާ އެހެން ޕާޓީތަކުގެ މެނިފެސްޓޯގައި ހުރި ކަންތައްތައް އިއްޔެ ތަންފީޒު ކުރައްވަން ފަށްޓަވައިފި ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ ޕީ.ޕީ.އެމް.ގެ ރައީސް އަދި ރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫން ޢަބްދުލްޤައްޔޫމާ މިއަދު މެންދުރު ރައީސުލްޖުމްހޫރިއްޔާގެ އޮފީހުގައި ބައްދަލުކޮށްލެއްވުމަށްފަހު، ދެއްކެވި ވާހަކަފުޅުގައި ކަމަށް ރައީސް އޮފީހުން ހާމަކުރެއްވިއެވެ.

ރައީސް ޔާމީން ވިދާޅުވީ މެނިފެސްޓޯގައި ހުރި ކަންތައްތަކުގެ ފައިދާ، ވަރަށް އަވަހަށް ރައްޔިތުންނަށް ފެނިގެންދިޔުމަށް ބޭނުންފުޅުވާ ކަމަށެވެ. މެނިފެސްޓޯ ތަންފީޒުކޮށް އެކަމުގެ ފައިދާ ރައްޔިތުންނަށް ފޯރުކޮށް ދިނުމުގައި ރައްޔިތުންގެ މަޖިލީހުގައި ތިއްބެވި ޕީ.ޕީ.އެމް.ގެ މެންބަރުންނާއި، ގުޅިފައިވާ އިއްތިޙާދުގައި ތިއްބެވި މެންބަރުންގެ އެއްބާރުލެއްވުން ބޭނުންފުޅުވާނެ ކަމުގައިވެސް ރައީސް ވިދާޅުވިއެވެ.

މެނިފެސްޓޯގައި ކަނޑައަޅާފައިވާ ކަންކަން ހާސިލް ކުރުމުގައި އެންމެ ބޮޑަށް ބޭނުންވަނީ ފައިސާ ކަމަށްވެސް ވިދާޅުވިއެވެ. އެހެންކަމުން އެކަމަށް ބޭނުންވާ ފައިސާ ހޯދުމުގެ މަސައްކަތް ކުރައްވަމުން ގެންދަވާ ކަމަށްވެސް އެމަނިކުފާނު ވިދާޅުވިއެވެ. ފައިސާ ހޯއްދެވުމުގެ މަސައްކަތް ކުރައްވަމުން ގެންދަވާއިރު ސަރުކާރުގެ ޚަރަދު ކުޑަކުރެއްވުގެ މަސައްކަތް ކުރައްވަމުން ގެންދަވާ ކަމަށްވެސް ރައީސް ވިދާޅުވިއެވެ. ނަމަވެސް މިކަމާ ބެހޭ ތަފްސީލެއް ރައީސް ދެއްވާފައެއް ނުވެއެވެ. ރައްޔިތުންގެ މަޖިލީހުގައި މިއަދު ބޭއްވި ޖަލްސާގައި މެންބަރުންވަނީ ރައީސް ޔާމީންގެ ވައުދުތައް ފުއްދޭ ވަރުގެ ބަޖެޓެއް މަޖިލީހަށް ހުށަހެޅުމަށް ގޮވާލައްވާފައެވެ.

ކުރީގެ ރައީސް މައުމޫން ވިދާޅުވީ މެނިފެސްޓޯގައިވާ ކަންތައްތައް ކުރިއަށް ގެންދެވުމަކީ، ޕީޕީއެމްގެ ފަރާތުންވެސް ވަރަށް ބޮޑަށް އެދިވަޑައިގަންނަވާ ކަމެއް ކަމަށެވެ. އެމަސައްކަތްތައް ފަށްޓަވައިގެން ވަރަށް ރަނގަޅަށް ކުރިއަށް ގެންދަވާނެ ކަމަށް ޔަޤީން ކުރައްވާ ކަމުގައިވެސް އެމަނިކުފާނު ވިދާޅުވިއެވެ.

ރައީސް މައުމޫން ވިދާޅުވީ މި ސަރުކާރަކީ، ކުރިއަށް އޮތް 5 އަހަރު ތެރޭގައި، ރައްޔިތުންނަށް އެކަށީގެންވާ ރަނގަޅު ޚިދްމަތްތަކެއް ކޮށްދެއްވައި، ރައްޔިތުންގެ އުންމީދުތައް ޙާޞިލުކޮށްދޭނެ ސަރުކާރަކަށް އިރާދަކުރެއްވިއްޔާ ވާނެކަމަށެވެ.

"ޕީ.ޕީ.އެމް.ގެ ރައީސް އަލްއުސްތާޛު މައުމޫން ޢަބްދުލްޤައްޔޫމް، ރައީސުލްޖުމްހޫރިއްޔާގެ އޮފީހަށް މިއަދު ވަޑައިގަތީ، ރައީސުލްޖުމްހޫރިއްޔާއަށާއި، ރައީސުލްޖުމްހޫރިއްޔާގެ ނައިބަށް ހިތްވަރު ދެއްވައި، ސަރުކާރުން ރައްޔިތުންނަށް ފޯރުކޮށްދެއްވަން ބޭނުންވާ ހުރިހާ ޚިދްމަތްތަކެއް ފޯރުކޮށްދެއްވުމުގަޔާއި އަދި ދެއްވަންވާ ހުރިހާ ސިޔާސީ އެއްބާރުލުމާއި، ޕާޓީގެ ފަރާތުން ކޮށްދެއްވަންޖެހޭ ހުރިހާ ކަމެއް، ރައްޔިތުންގެ މަޖިލީހުގެ ތެރެއިން ކޮށްދެއްވުމުގެ ފުރިހަމަ ޔަޤީންކަން ދެއްވުމަށްޓަކައެވެ." ރައީސް އޮފީހުގެ ވެބްސައިޓުގައި ވެއެވެ.