ފުލުހަކަށް އަނިޔާކުރި ކަމުގެ ތުހުމަތުގައި ހޯދަމުންދާ މީހާގެ މައުލޫމާތު ހާމަކޮށްފި

ފުލުހަކަށް ހަމަލާ ދީ ދައުލަތުގެ މުދަލަށް ގެއްލުން ދިނުމުގެ ތުހުމަތުގައި ފުލުހުން ރެއިން ފެށިގެން ހޯދަމުންދަނީ އއ. އުކުޅަސް، ބީޗުހައުސް ކާމިލް އިބްރާހީމް ކަމަށް ފުލުހުން މިއަދު ހާމަކުރައްވައިފިއެވެ.

އުމުރުން 24 އަހަރުގެ މިޒުވާނާ ހޯދުމުގެ މަސައްކަތް ފުލުހުން ފަށައިފައިވަނީ އެމްޑީޕީން ރޭ ބޭއްވި މުޒާހަރާގައި ދައުލަތުގެ މުދަލަށް ގެއްލުންދީ ފުލުހަކަށް ހަމަލާދިނުމަށް އުޅުނުކަމުގެ ތުހުމަތުގައެވެ.

 ފުލުހުން ހާމަކުރައްވާފައިވާ ގޮތުގައި ރޭގެ މުޒާހަރާގައި އޭނާވަނީ " ފުލުހުން އަޅާފައިވާ ބެރިގޭޑްތައް ފޫއަޅުވާލުމަށްފަހު ފުލުހުން ބަންދުކޮށްފައިވާ ސަރަޙައްދަށް ވަދެ ޗާންދަނީ މަގު އޯކިޑްމަގު ގުޅުނު ކަންމަތީގައި މޯލްޑިވްސް ޕޮލިސް ސަރވިސްއިން ހަރުކޮށްފައިވާ ހުރި ސީ.ސީ.ޓީ.ވީ ކެމެރާއަށް ގެއްލުންދީ" ފައެވެ. މީގެ އިތުރަށް އޭނާވަނީ "ފުލުހުންނަށް ހަތިޔާރު ބޭނުންކޮށްގެން ބިރުދައްކައި މާރާމާރީ ހިންގަން" މަސައްކަތް ކޮށްފައި ކަމަށްވެސް ފުލުހުންވަނީ ތުހުމަތު ކޮށްފައެވެ.

ކާމިލަކީ "މަނާކުރެވިފައިވާ މަސްތުވާއެއްޗެއް ބޭނުންކުރުމާއި ބޭނުންކުރުމަށްޓަކައި އަތުގައި ބެހެއްޓިކަމަށް ސާބިތުވެ 6 އަހަރު ދުވަހަށް ޖަލަށް ލުމަށް ޙުކުމްކޮށްފައިވާ މީހެއް" ކަމަށްވެސް ފުލުހުން ހާމަކުރައްވާފައިވެއެވެ.

ކާމިލު ވަނީ މިއަހަރުގެ މާޗް މަހުގެ 06 ވަނަ ދުވަހުގެ ވަގުތެއްގައި އދ. ކަނބުރުދޫ ކައިރީގައި އޮތް ތެޔޮ ބޯޓަކަށް އަރައި އެބޯޓުގައި ތިބި މީހުންނަށް ބިރުދައްކައި މާރާމާރީ ހިންގައި އިންޒާރުދީފައިވާކަމުގެ ތުހުމަތުގައި ފުލުހުންގެ ބެލުމުގެ ދަށަށް ގެނެވިފައިވާ މީހެއް ކަމަށްވެސް ފުލުހުންވަނީ ހާމަކޮށްފައެވެ.

 ކާމިލް އިބްރާހިމާ ބެހޭ އެއްވެސް މަޢުލޫމާތެއް ލިބިލައްވާފައިވާ ފަރާތެއްވާނަމަ އެ މަޢުލޫމެއް ވީއެންމެ އަވަހަކަށް މޯލްޑިވްސް ޕޮލިސް ސަރވިސްގެ ކްރިމިނަލް އިންވެސްޓިގޭޝަން ޑިޕާޓްމަންޓްގެ ނަމްބަރު 9631696 ނުވަތަ މޯލްޑިވްސް ޕޮލިސް ސަރވިސްގެ ހޮޓްލައިން ނަމްބަރު 3322111 އަށް ގުޅުއްވައި އެމައުލޫމާތު އަންގަވައި ދެއްވުމަށްވެސް ފުލުހުންވަނީ އެދިފައެވެ. މިފަދަ މަޢުލޫމާތު ފުލުހުންނާ ހިއްސާކުރާ ފަރާތްތަކަށް ލިބިދޭންޖެހޭ ރައްކާތެރިކަން ފޯރުކޮށްދޭނެކަމުގައިވެސް ފުލުހުންވަނީ ބުނެފައެވެ.

އެމްޑީޕީން ރޭ ބޭއްވި މުޒާހަރާގައިވަނީ ހަމަލާ ދިނުމަށް ބޭނުން ކުރެވިދާނެ ލަކުޑިބުރިވެސް ގެންގުޅެފައެވެ. ފުލުހުން ރޭ ހާމަކުރައްވާފައިވާ ވީޑިއޯއަކުން ފެންނަ ގޮތުގައި ލަކުޑިބުރިއެއް ހިފައިގެން ހުރި މީހަކު ފުލުހަކާ ދިމާއަށް އޭތިހޫރާލައެވެ. އަދި ފުލުސް މީހާފަހަތަށް ޖެހޭތަންވެސް އެވީޑިއޯއިން ފެނެއެވެ.

މުޒާހަރާގެ ބައެއް ބައިވެރިން ބުނެފައިވަނީ މީހުން ހައްޔަރު ކުރުމުގެ ތެރޭގައި ފުލުހުންވަނީ އެމީހުންނަށް ވަރަށް ބޮޑަށް އަނިޔާވާ ގޮތަށް އަމަލުކޮށްފައެވެ. ނަމަވެސް ފުލުހުން ބުނެފައިވަނީ މުޒާހަރާތަކުގައި ފުލުހުން އަމަލުކޮށްފައިވާނީ ޕްރޮފެޝަނަލްކޯށް ކަމަށެވެ.

ރޭގެ މުޒާހަރާގައި ހެލްމެޓާއި، ލަކުޑިބުރި ފަދަ "ހަތިޔާރު" ބޭނުން ކޮށްފައިވާތީ ހިޔުމަންރައިޓްސް ކޮމިޝަން އޮފްދަ މޯލްޑިވްސް އިންވަނީ އެކަން ކުށްވެރި ކޮށްފައެވެ.

 ރޭގެ މުޒާހަރާ އަކީ ރިޔާސީ އިންތިޚާބުގެ ދެވަނަބުރު ލަސްވަމުންދާތީ އަވަސް ކޮށްދިނުމަށް އެދި ގޮވާލައި ބޭއްވި މުޒާހަރާއެކެވެ.