އުންމީދުތައް ހާސިލްކޮށް ދެވޭނީ ޕްރޮގްރެސިވް ކޯލިޝަންގެ މެންބަރުން ކައުންސިލްތަކުގައި ތިބެގެން: ރައީސް މައުމޫން

ރައްޔިތުން ބޭނުންވާ އުންމީދުތައް ހާސިލްކޮށް ދިނުމަށްޓަކައި ލޯކަލްކައުންސިލްގައި ތިބެންޖެހޭނީ ޕްރޮގްރެސިވް ކޯލިޝަންގެ މެންބަރުން ކަމަށް ޕީޕީއެމްގެ ރައީސް އަދި ރާއްޖޭގެ ކުރީގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމް މިރޭ ވިދާޅުވެއްޖެއެވެ.

 އެމަނިކުފާނު މިހެން ވިދާޅުވީ ސަރުކާރުން ހިންގާ ޕްރިގްރެސިވް ކޯލިޝަނުން ލޯކަލް ކައުންސިލް އިންތިޚަބުގެ ކެމްޕޭން ފެށުމަށް ކާނިވަލް ސަރަހައްދުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

"ލޯކަލްކައުންސިލްތަކުގައި ތިބެންޖެހޭނީ އަޅުގަނޑު ދެކޭގޮތުގައި ޕްރޮގްރެސިވްކޯލިޝަންގެ މެންބަރުން. ޕްރޮގްރެސިވްކޯލިޝަންގެ އަޣުލަބިއްޔަތު. އެއަޣުލަބިއްޔަތު ނެތިއެއް އަޅުގަނޑުމެންނަކަށް އަޅުގަނޑުމެން ކުރަންބޭނުންވާ ކަންތައްތަކެއް އާދެ! ރައްޔިތުން ހާސިލްކުރަން ބޭނުންވާ އުންމީދުތަކެއް ރައްޔިތުންނަށް ހާސިލްކޮށެއް ނުދެވޭނެ. އެހެންވީމާ ހުރިހާ ބޭފުޅުންވެސް މިކަމަށް ވަރަށްބޮޑު ސަމާލުކަމެއް ދެއްވުންއެދެން،" ރައީސް މައުމޫން ވިދާޅުވިއެވެ.

އެމަނިކުފާނު ވިދާޅުވީ ކައުންސިލް އިންތިޚާބު ކާމިޔާބު ކުރެވޭނީ ކޯލިޝަނުގެ ބައިވެރިންގެ ވަރަށްބޮޑު އެއްބާރުލުމާއި ތާއިދު ލިބިގެން ކަމަށެވެ. އެމަނިކުފާނު ވިދާޅުވީ "މިސަރުކާރުގެ ސިޔާސަތުތަކާއި އުސޫލުތަކާއި، ސަރުކާރުގެ މަޝްރޫއުތަކާއި ސަރުކާރުން ރައްޔިތުންނަށް ކޮށްދޭން ބޭނުންވާ ޚިދުމަތްތައް އެޚިދުމަތްތަކުގެ އަހުލުވެރިންނަށް ފޯރުކޮށްދޭން ތިބިފަރާތަކީ ލޯކަލް ކައުންސިލްތައް." ކަމަށެވެ. "މިކައުންސިލްތަކުގައި އަޅުގަނޑުމެން ބޭނުންވާ ފެންވަރުގެ އަޅުގަނޑުމެން ބޭނުންވާ އަމާނާތްތެރިކަމުގެ، އިޚުލާސްތެރިކަމުގެ ބަޔަކުނެތް ކަމަށްވަންޏާ ސަރުކާރުން ކިތަންމެ ގަދައަޅާ މަސައްކަތް ކުރިނަމަވެސް ތަރައްގީ ރައްޔިތުންނާ ހަމައަކަށް ގެނެހެއް ނުދެވޭނެ." ރައީސް މައުމޫން ވިދާޅުވިއެވެ.

އެމަނިކުފާނު ވިދާޅުވީ ލޯކަލްކައުންސިލް އިންތިޚާބަކީ މާމުހިންމު އިންތިޚާބެއް ކަމަށް ބައެއް މީހުން ނުދުށްކަމަށްވިޔަސް "ލޯކަލްކައުންސިލް އިންތިޚާބަކީ ވަރަށް މުހިންމު އިންތިޚާބެއް،" ކަމަށެވެ. އެމަނިކުފާނު ވިދާޅުވީ މިއިންތިޚާބު ކާމިޔާބު ކުރެވޭނެކަމުގެ ފުރިހަމަ އުންމީދު އެބައޮތް ކަމަށެވެ. އެއީ އިންތިޚާބު ކާމިޔާބު ކުރުމަށް ކުރާ މަސައްކަތުގައި "މާލިމީން"ގެ ގޮތުގައި ތިއްބެވި ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހިމާއި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ލީޑަރު އަޙުމަދު ސިޔާމް މުހައްމަދާއި އަދަލާތު ޕާޓީގެ ރައީސް ޝެއިހް އިމްރާން އަބްދުﷲގެ އިތުރުން ރައީސް އަބްދުﷲ ޔާމިން އަބްދުލް ގައްޔޫމަކީ މިކަމަށް އެންމެ ގާބިލް ބޭފުޅުން ކަމަށެވެ. އެބޭފުޅުންނާއެކު "މަންޒިން މަގްސޫދަށް" ދެވޭނެކަމާމެދު ޝައްކެއްވެސް ނުކުރައްވާ ކަމަށެވެ.

އެމަނިކުފާނު ރައްޔިތުންނަށް ގޮވައިލެއްވީ ސަރުކާރު ހިންގާ ކޯލިޝަނުން މިރޭފެށި މަސައްކަތުގައި ބައިވެރިވެ ވަޑައިގެންނެވުމަށެވެ. "އަޅުގަނޑުމެން ކުރާ މަސައްކަތަކީ ވޭތުވެދިޔަތާންގައި މި ކުރި މަސައްކަތުގެއް އެއްބައި ކަން ދެކެވަޑައިގަތުން. އަޅުގަނޑުމެން ކާމިޔާބު ކަމާއެކު ނިންމި މަސައްކަތަކީ ރާއްޖޭގެ ރައީސުލްޖުމްހޫރިއްޔާއަކު އިންތިޚާބު ކުރުން،" މައުމޫން ވިދާޅުވި އެވެ.

ރައީސް ޔާމީނުގެ ސަރުކާރާ ބެހޭގޮތުން މައުމޫން ވިދާޅުވީ ފާއިތުވި 51 ދުވަސްތެރޭގައި ރާއްޖެއިންވަނީ ވަރަށް ބޮޑު ކުރި އެރުމެއް ދެކެފައި ކަމަށެވެ. މިހާރު ރާއްޖޭގައި އަމަންއަމާންކަން ގާއިމްވެއްޖެކަމަށެވެ. "ސުލްހަމަސަލަސްކަން ގާއިމްވެއްޖެ. ރާއްޖޭގައި މިހާރު އެއްވެސް ކަހަލަ ނާމާން ކަމެއް، މަގުތަންމަތީގައި ވެސް އެހެން ތަނެއްގައި ވެސް ނެތް. މާލެއަކު ވެސް ރާއްޖެ ތެރެއަކު ވެސް ނެތް. މިއީ މާތްﷲގެ ވަރަށް މަތިވެރި ނިއުމަތެއް،" އެމަނިކުފާނު ވިދާޅުވިއެވެ.