ދެވަނަބުރުގައި ޔާމީނަށް ތާއިދު ކުރުމަށް ޖުމްހޫރީޕާޓީގެ ކައުންސިލުން ނިންމައިފި

ރިޔާސީ އިންތިޚާބުގެ ދެވަނަބުރުގައި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނާއި، އެމަނިކުފާނުގެ ރަނިންމޭޓް ޑރ. މުހައްމަދު ޖަމީލް އަހުމަދަށް ތާއިދު ކުރުމަށް ޖުމްހޫރީޕާޓީގެ ކައުންސިލުން ދެންމެ ނިންމަވައިފިއެވެ.

މިއަދުހަވީރު 4.30 ގައި ފެށި އެޕާޓީގެ ކައުންސިލްގެ ބައްދަލުވުމުގައި ވަރަށް ފުޅާކޮށް މިކަމަށް ބަހުސް ކުރުމަށްފަހު ޔާމީނަށް ތާއީދުކުރަން ނިންމާފައިވަނީ ކައުންސިލުގައި ނެގި ވޯޓަކުން ދެންމެއެވެ.

ޖުމްހޫރީޕާޓީގެ ލީޑަރު ގާސިމް އިބްރާހީމް ކުރިން ވިދާޅުވެފައިވަނީ ދެވަނަ ބުރުގައި ކެންޑިޑޭޓަކަށް ތާއިދު ކުރަން ޖެހިއްޖެ ކަމަށްވާނަމަ، ސިފައިންނާއި، ފުލުހުންނާއި، ޖުޑިޝަރީ ހިމާޔަތް ކުރުމަށް ބޮޑަށް މަސައްކަތްކުރައްވާ ކެންޑިޑޭޓަކަށް އިސްކަން ދެއްވާނެ ކަމަށެވެ. އެއީ މިތަންތަނަކީ ގައުމެއް ކުރިއަރައި ދިޔުމަށް މުހިންމު ތަންތަން ކަމަށް ގަބޫލުކުރައްވާތީ ކަމަށެވެ.

ރިޔާސީ އިންތިޚާބުގެ ފުރަތަމަބުރުން ގާސިމް އިބްރާހީމް ފެއިލްވުމުން އެޕާޓީގެ ކައުންސިލުން ފުރަތަމަ ނިންމާފައިވަނީ އިންތިޚާބުގެ ދެވަނަބުރުގައި އެއްވެސް ކެންޑިޑޭޓަކަށް ތާއިދު ނުކުރުމަށެވެ. ނަމަވެސް ފުރަތަމަ ބުރަށްފަހު ކުރީގެ ރައީސް އަދި އެމްޑީޕީގެ ރިޔާސީ ކެންޑިޑޭޓްވަނީ އެމްޑީޕީއަށް ގާސިމްގެ ތާއީދު ހޯއްދެވުމަށް މަސައްކަތް ކުރައްވާފައެވެ. އެގޮތުން އެމްޑީޕީގެ އިސްބޭފުޅުންތަކެއް ވަނީ ގާސިމާ ބައްދަލު ކުރައްވާފައެވެ. އަދި ޕީޕީއެމްއަށް ތާއިދު ކުރެއްވުމަށް ކުރީގެ ރައީސް އަދި ޕީޕީއެމްގެ ރައީސް މައުމޫން އަބްދުލް ގައްޔޫމްވަނީ ގާސިމާ ބައްދަލު ކުރައްވާފައެވެ.

މިބައްދަލު ކުރެއްވުންތަކަށްފަހު ގާސިމް ވިދާޅުވެފައިވަނީ އެބޭފުޅުން ދެއްކެވި ވާހަކަތައް ބަލައިގަންނަކަމަށެވެ. ނަމަވެސް ގޮތެއް ނިންމާނީ ކައުންސިލުން ކަމަށެވެ.

މިރޭގެ ކައުންސިލް ބައްދަލުވުމުން ޕީޕީއެމްއާ އެއްކޮޅަށް އެރުމަށް 15 މެންބަރުން ވޯޓުދީފައިވެއެވެ. 5 މެންބަރުން އެއްވެސް ކޮޅަކަށް ވޯޓެއް ނުދެއެވެ. ޕީޕީއެމްއަށް ތާއިދު ކުރުމާ ދެކޮޅަށް އެއްވެސް މެންބަރަކު ވޯޓެއް ނުދެއްވައެވެ. އެއްވެސް ކޮޅަކަށް ވޯޓު ނުދެއްވާ މެންބަރުންގެ ތެރޭގައި ޕާޓީގެ ލީޑަރު ގާސިމްވެސް ހިމެނިވަޑައިގަންނަވައެވެ.

ގާސިމް ވިދާޅުވީ ކައުންސިލް ބައްދަލުވުމަށް ޕީޕީއެމްއާއި، އެމްޑީޕީން ޕްރޮޕޯސަލަ ހުށަހަޅާފައިވާ ކަމަށެވެ. މިދެ ޕްރޮޕޯސަލްގައި މާބޮޑު ތަފާތެއްނެތް ކަމަށް އޭނާ ވިދާޅުވިއެވެ. ނަމަވެސް ދެޕާޓީގެ މެނިފެސްޓޯއަށް ބަލާއިރު ބޮޑަށް ރަނގަޅީ ޕީޕީއެމްގެ މެނިފެސްޓޯ ކަމަށް ވިދާޅުވިއެވެ. 

ގާސިމް ވިދާޅުވީ މިނިންމެވުމަކީ އެއްވެސް ބަޔަކާ ޒާތީކަމެއް އޮވެގެން ނިންމެވި ނިންމެވުމެއް ނޫންކަމަށެވެ.