ރިޔާސީ އިންތިޚާބު އަންނަމަހު 9 ގައި ބާއްވަން ނިންމައިފި

ރިޔާސީ އިންތިޚާބުގެ ފުރަތަމަ ބުރު އަންނަ ނޮވެމްބަރު 9 ވަނަ ދުވަހު ބާއްވާނެ ކަމަށް އިލެކްޝަންސް ކޮމިޝަނުން މިރޭ އިއުލާން ކޮށްފިއެވެ.

މިރޭ ބޭއްވި ނޫސްވެރިންގެ ބައްދަލުވުމެއްގައި އިލެކްޝަންސް ކޮމިޝަންގެ ރައީސް ފުވާދު ތައުފީގު ވިދާޅުވީ އިންތިޚާބު ދެވަނަ ބުރަކަށް ހިނގައްޖެ ކަމަށްވާނަމަ ދެވަނަބުރު ބާއްވާނީ ނޮވެމްބަރު 16 ވަނަ ދުވަހު ކަމަށެވެ.

ފުވާދު ވިދާޅުވީ މިމުއްދަތަކީ އެކޮމިޝަނަށް ނެގެން އޮތް އެންމެ ކުރުމުއްދަތު ކަމަށެވެ. އިލެކްޝަންސް ކޮމިޝަންގެ ނާއިބު ރައީސް އަހުމަދު ފަޔާޒު ވިދާޅުވީ ރިޔާސީ އިންތިޚާބުގެ ހުރިހާ ކަމެއްވެސް ކުރިއަށް ގެންދަވަނީ ގާނޫނު އަސާސީ އާއި ގާނޫނު ތަކުގެ ތެރެއިން ކަމަށެވެ. އެހެން ކަމުން ސްޕްރީމް ކޯޓުގެ ހުކުމާއި ހުކުމުގައި ބުނެފައިވާ ގައިޑްލައިންތަކަށްވެސް ތަބާވާނެ ކަމަށެވެ.

ފުވާދު ވިދާޅުވީ އެންމެ ފަހުން ބާއްވަން އުޅުނު އިންތިޚާބުގައި މައްސަލަ ދިމާވީ ލިސްޓުތަކުގައި ކެންޑިޑޭޓުންގެ ފަރާތުން ސޮއި ނުކުރުމުން ކަމަށެވެ. ރައީސް ނަޝީދު ފިޔަވައި އަނެއް ދެކެންޑިޑޭޓުން ވޯޓާސް ލިސްޓުގައި ސޮއި ކުރައްވާފައެއް ނުވެއެވެ. ނަމަވެސް ކެންޑިޑޭޓުންގެ މަންދޫބުން މިހާރުވެސް ވޯޓާސް ލިސްޓުގައި ސޮއިކުރުމުގެ ޓައިމްފްރޭމަށްވެސް އެއްބަސްވެފައި ކަމަށް ފުވާދު ވިދާޅުވިއެވެ. މި ޓައިމް ލައިން މާދަމާ އާއްމު ކުރާނެ ކަމަށްވެސް ވިދާޅުވިއެވެ.

ފުވާދު ވިދާޅުވީ 4 ވަނަ ފަހަރަށް އިންތިޚާބު ބާއްވަން މަސައްކަތް ކުރައްވާއިރު ކުރިން ދިމާވި މައްސަލަތައް ދިމާނުވާނެ ކަމަށް ވަރަށް ބޮޑަށް ޔަގީން ކުރައްވާ ކަމަށެވެ. އެއީ ސަރުކާރުގެ ފަރާތްތަކުންވެސް އެފަދަ ޔަގީންކަން ދެއްވާފައިވާތީ ކަމަށްވެސް އޭނާ ވިދާޅުވިއެވެ. ރައީސަކު ހުންނަން ޖެހޭނެކަމަށް ގާނޫނު އަސާސީގައި ބުނެފައިވާ މުއްދަތު މިހާރު ފަހަނަޅާފައިވާ އިރު ވީހާވެސް އަވަހަކަށް އިންތިޚާބު ބާއްވަން ޖެހޭ ކަމަށް ގަބޫލު ކުރައްވާ ކަމަށްވެސް އިލެކްޝަނުން ބުނެފައިވެއެވެ.

އިލެކްޝަންސް ގެ ނާއިބު ރައީސް ވިދާޅުވީ ގާނޫނުގައި ބުނާ މުއްދަތު ހަމަވާއިރު އިންތިޚާބު ކުރެވިފައިވާ ރައީސަކު ނެތް ކަމަށްވާނަމަ އެމައްސަލަ ހައްލު ކުރުމަކީ އެކޮމިޝަނުގެ މަސްއޫލިއްޔަތެއް ނޫންކަމަށެވެ. އެކަން ހަމަޖައްސަވާނީ ތިންބާރު ވާހަކަ ދައްކައިގެން ކަމަށް އޭނާ ވިދާޅުވިއެވެ.

ފުވާދު ވިދާޅުވީ މިފަހަރުވެސް ވޯޓާސް ލިސްޓުގައި ފިންގަޕްރިންޓް ޖަހަން ޖެހޭ ކަމަށެވެ. ފިންގަޕްރިންޓް ވެރިފައި ކުރަން ޖެހިއްޖެނަމަ އެކަން ކޮށްދެއްވާނެ ކަމުގެ ޔަގީންކަން ސަރުކާރުން ދެއްވާފައިވާ ކަމަށްވެސް އޭނާ ވިދާޅުވިއެވެ.

އިލެކްޝަންސް ކޮމިޝަންގެ މެންބަރު އަލީ މުހައްމަދު ވިދާޅުވީ މިފަހަރު އިތުރު ރަޖިސްޓްރޭޝަނެއް ނޯންނާނެ ކަމަށެވެ. މިފަހަރު ކުރިއަށް ގެންދާނީ އޮކްޓޯބަރު 19 ވަނަ ދުވަހަށް ރަޖިސްޓްރީކޮށްފައިވާ ހިސާބުން ފަށައިގެން ކަމަށެވެ. ނަމަވެސް ނޮވެމްބަރު 9 އަށް 18 އަހަރު ފުރޭ މީހުންނާއި، ރަޖިސްޓްރީ ވެފައިވާ ތަންނޫނޫ އެހެން ތަނަކަށް ވޯޓުލާ މީހުން ރަޖިސްޓްރީ ކުރުމުގެ ފުރުސަތުދެއްވާނެ ކަމަށެވެ.