އެމްޑީޕީ މުޒާހަރާގައި މިހާތަނަށް އަށްމީހުން ހައްޔަރު ކޮށްފި

އެމްޑީޕީން މިހާރު ކުރިއަށް ގެންދާ "ހުކުމް ބުނުން" މުޒާހަރާގައި މިހާތަނަށް 8 މީހުން ފުލުހުންގެ ބެލުމުގެ ދަށަށް ގެނެފައިވާ ކަމަށް ފުލުހުން ހާމަކު ރައްވައިފިއެވެ.

ފުލުހުން ބުނީ މިމީހުން ފުލުހުންގެ ބެލުމުގެ ދަށަށް ގެނެސްފައިވަނީ އަމުރަށް ނުކިޔަމަންތެރި ވެގެންނާއި ފުލުހުންގެ ވަޖިބަށް ހުރަސް އެޅުމުގެ އިތުރަށް ފުލުހުންނަށް ހަމަލާ ދިނުމަށް މަސައްކަތް ކޮށްފައިވާތީއެވެ.

ފުލުހުންގެ ބެލުމުގެ ދަށަށްގެނެސްފައިވާ މީހުންގެ ތެރޭގައި ހެލްމެޓް އަޅައިގެން ލަކުޑިބުރި ހިފައިގެން ތިބި މީހުންވެސް ހިމެނޭ ކަމަށެވެ.

މި މުޒާހަރާގައި އެމްޑީޕީންވަނީ މާލޭގެ 4 ސަރަހައްދަކަށް ބެހިލާފައެވެ. އެ ސަރަހައްދު ތަކަކީ، ރައްޔިތުންގެ މަޖިލިސް ކުރާގެކައިރި، އެމްއެމްއޭ ކައިރި، ހިލާލީގެ ސަރަހައްދު، ޗާންދަނީ މަގު ސަރަހައްދެވެ.

ފުލުހުންވަނީ މިރޭ 12 ޖެހުމާއެކު މުޒާހަރާގެ ބައިވެރިން ގެންގުޅުނު އަޑުގަދަކުރާ ސާމާނު އަތުލައިގެންފައެވެ. މުޒާހަރާ ކުރަމުންދާ ސަރަހައްދުގައި ހަރަކާތްތެރި ވަމުންދާ ބައެއް ނޫސްވެރިން ބުނާ ގޮތުގައި މުޒާހަރާ ގެ ބައިވެރިން މިހާރުވަނީ އެއްތަނަކަށް ޖަމާވެފައި ކަމަށެވެ. އެންމެން މިހާރު ތިބީ ޗާންދަނީ މަގާއި މަޖީދީމަގު ޖަންކްޝަން ސަރަހައްދުގައެވެ. އެސަރަހައްދުގައި ފުލުހުން ޖަހާފައިވާ ބެރިކޭޑް ހުރަސް ކޮށްފައި ދާން ބޭނުންވާ މީހުންގެ ހަށިގަނޑު ޗެކްކުރެވިގެން ނޫނީ ނުދެވޭ ކަމަށްވެސް އެ ސަރަހައްދުގައި ހަރަކާތްތެރިވާ ނޫސްވެރިން މައުލޫމާތު ދެއެވެ. މިމުޒާހަރާގައި ހަރަކާތްތެރިވާ ބައެއް މީހުންނާއި އެމީހުން ތިބި ޕިކްޕްތަކުން ލަކުޑިބުރިއާއި، ކްރިކެޓް ކުޅޭ ބެޓް ފަދަ ސާމާނު ފެނިފައިވާ ކަމަށް ނޫސްވެރިން ވެސް ވަނީ ބުނެފައެވެ.

ފުލުހުން މިހާރުވަނީ މިމުޒާހަރާއަކީ ޣައިރުގާނޫނީ އެއްވުމެއް ކަމަށް އަންގަވާފައެވެ. އެއީ ފުލުހަކަށް ހަމަލާދީ އަދި ޗާންދަނީ މަގުގައި ހަރުކޮށްފައިވާ ކެމެރާއެއް ހަލާކުކޮށްލާފައިވާތީ ކަމަށް ފުލުހުން ވަނީބުނެފައެވެ.

މިރޭގެ މުޒާހަރާގައި ރައީސް ނަޝީދު ބައިވެރިއެއް ނުވެއެވެ. ނަމަވެސް އެމަނިކުފާނުގެ ގެކޮޅު ގ. ކެނެރީގެ ކައިރީގައި ގިނައަދަދެއްގެ ފުލުހުން ހަރަކާތްތެރި ވަމުންދާ ކަމަށް މައުލޫމާތު ލިބިފައިވެއެވެ.

މި މުޒާހަރާގައި އިސްކޮށް ހަރަކާތްތެރިވާ ބޭފުޅުންގެ ތެރޭގައި އެމްޑީޕީގެ ޗެއާޕާސަން ރީކޯ މޫސާމަނިކު، ކުރީގެ ފޮރިން މިނިސްޓަރ އަހުމަދު ނަސީމް، ކުރީގެ ހައުސިން މިނިސްޓަރ މުހައްމަދު އަސްލަމް، ކުރީގެ ޑިފެންސް މިނިސްޓަރ އަމީން ފައިސަލް، އިބްރާހީމް ހުސައިން ޒަކީ، ރައީސް ނަޝީދުގެ ރަނިންމޭޓް ޑރ. މުސްތަފާ ލުތުފީ ހިމެނި ވަޑައިގަނަންވައެވެ. މީގެ އިތުރަށް އެމްޑީޕީގެ ޕާލަމެންޓްރީ ގްރޫޕުގެ ބައެއް މެންބަރުން ވެސް ހިމެނި ވަޑައި ގަންނަވައެވެ.

މިމުޒާހަރާ އަކީ ރާއްޖޭގައި އަވަސް އިންތިޚާބެއް ބާއްވައި ރާއްޖެ ވެއްޓެންދާ "ގާނޫނީ ހުސްކަމުން" ސަލާމް ކުރުމަށް ގޮވައިލާ މުޒާހަރާއެކެވެ.