ރިޔާސީ އިންތިޚާބާ ބެހޭ ހުކުމް ސްޕްރީމް ކޯޓުން މިއަދު އިއްވަނީ

މިދިޔަ ސެޕްޓެމްބަރު މަހުގެ 7 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގެ ފުރަތަމަ ބުރު ބާތިލް ކުރުމަށް ޖުމްހޫރީ ޕާޓީގެ ފަރާތުން ސުޕްރީމް ކޯޓަށް ހުށަހަޅާފައިވާ މައްސަލައިގެ ހުކުމް އިއްވުން މިއަދު 2.30 އަށް ތާވަލު ކޮށްފި އެވެ.

ރިޔާސީ އިންތިޚާބުގެ ފުރަތަމަ ބުރުގައި މަކަރު ހަދާފައިވާ ކަމުގެ ތުހުމަތުގައި އެ ނަތީޖާ ގަބޫލު ނުކުރާނެ ކަމަށް ބުނެ ޖޭޕީން ކޯޓަށް މައްސަލަ ހުށަހަހަޅާފައިވަނީ މިދިޔަ ސެޕްޓެމްބަރުމަހުގެ 16 ވަނަ ދުވަހުއެވެ. އަދި 17 ވަނަ ދުވަހުން ފެށިގެން އަޑު އެހުންތައް ބޭއްވުމަށްފަހު އަޑު އެހުންތައް ނިންމާފައިވަނީ 25 ސެޕްޓެމްބަރު ގައެވެ.

ޖުމްހޫރީ ޕާޓީން މިމައްސަލަ ސްޕްރީމްކޯޓަށް ވެއްދުމުން އެކޯޓުންވަނީ އިންތިޚާބު ފަސް ކުރުމަށް އަމުރެއް ނެރެފައެވެ. މިއަމުރާއެކު އެމްޑީޕީންވަނީ އިންތިޚާބު އަވަސް ކުރުމަށް ގޮވާލައި މުޒާހަރާ ކުރަން ފަށައިފައެވެ. އެޕާޓީން މިހާރު ނިންމާފައިވަނީ ސްޕްރީމްކޯޓުން ހުކުމް އިއްވަންދެން މުޒާހަރާ ކުރިއަށް ގެންދާނެ ކަމަށެވެ.

ސެޕްޓެމްބަރުމަހު 25 ވަނަ ދުވަހު އަޑު އެހުންތައް ނިންމާލަމުން އުއްތަމަ ފަނޑިޔާރު ވިދާޅުވެފައިވަނީ އިތުރު އަޑުއެހުމެއް ބާއްވަން ޖެހިއްޖެއްޔާ ފަހުން އަންގަވާނެ ކަމަށެވެ. އެހެން ކަމުން މިއަދު ބާއްވަނީ އިތުރު އަޑުއެހުމެއްތޯވެސް ބައެއް ފަރާތްތަކުންވަނީ ސުވާލު އުފައްދާފައެވެ. ނަމަވެސް މިމައްސަލައިގެ ނާޒުކު ކަމަށްބަލާއިރު ބޮޑަށް ބުރަވެވެނީ މިއަދު ހުކުމް އިއްވާނެ ކަމަށެވެ.

ފުރަޔަމަ ބުރުގައި އެއްވަނަ ހޯއްދެވީ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދެވެ. ދެވަނަ ހޯއްދެވީ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނެވެ. ތިންވަނަ ހޯއްދެއްވީ މިމައްސަލަ ކޯޓަށް ވެއްދި ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހީމެވެ. ގާސިމް ވިދާޅުވެފައިވަނީ ސްޕްރީމްކޯޓުން ކޮންމެ ގޮތަކަށް ނިންމިޔަސް އެގޮތެއް ގަބޫލު ކުރައްވާނެ ކަމަށެވެ.

ވެރިކަމަށް ވަޑައިގަނެވޭނީ ރައްޔިތުންގެ ތެރެއިން ވޯޓުލާ މީހުންގެ 51 އިންސައްތައަށްވުރެ އިތުރަށް ވޯޓު ލިބިގެންނެވެ. ނަމަވެސް އެވަރަށް އެއްވެސް ކެންޑިޑޭޓަކަށް ލިބިފައެއް ނުވެއެވެ. އެހެންކަމުން ފުރަތަމަ ބުރަށްފަހު 21 ދުވަހުގެ ތެރޭގައި ދެ ވަނަ ބުރެއް ބާއްވަން ގާނޫނު އަސާސީގައި ބުނެފައިވެއެވެ. އެގޮތުން ސެޕްޓެމްބަރު 28 ވަނަ ދުވަހު ދެ ވަނަ ބުރުގެ ވޯޓުލުން ކުރިއަށް ގެންދަން ނިންމާފައި ވަނިކޮށް، ސްޕްރީމް ކޯޓުގެ ހުކުމުގެ ސަބަބުން ދެވަނަ ބުރުވަނީ ނުބޭއްވިފައެވެ.