ފުލުހުންގެ އެއްބާރުލުން ނުލިބެން މިއަދު އިންތިޚާބު ނުބޭއްވޭނެ: އިލެކްޝަންސް

ފުލުހުންގެ އެއްބާރުލުން ނުލިބުމުގެ ސަބަބުން އިލެކްޝަންސް ކޮމިޝަނުން މިއަދު ބާއްވަން އުޅުނު އިންތިޚާބު ނުބޭއްވޭނެ ކަމަށް އިލެކްޝަންސް ކޮމިޝަނުގެ ރައީސް ފުވާދު ތައުފީގު ވިދާޅުވެއްޖެއެވެ.

ފަތިހު 5.40 ގައި އިލެކްޝަންސް ކޮމިޝަނުގައި ބޭއްވި ނޫސްވެރިންގެ ބައްދަލުވުމެއްގައި ފުވާދު ވިދާޅުވީ އިންތިޚާބު ނުބޭއްވޭގޮތް މެދުވެރިވީ ވޯޓާ ގުޅޭ އެއްވެސް ލިއެކިއުމެއް އަދި ވޯޓުފޮށިވެސް ކޮމިޝަނުގެ އިމާރާތުން ބޭރު ނުކުރެވޭނެ ކަމަށް "ފުލުހުން ބުނެ ހުރަސް އެޅުމުން" ކަމަށެވެ.

ފުވާދު ވިދާޅުވީ ވޯޓުލުމަށް ބޭނުންވާ ސާމާނު ކޮމިޝަނުގެ އިމާރާތުން ނެރެގެން ގެންދަން ހަމަޖައްސާފައިވަނީ މައިމަރުކަޒު ކަމަށްވާ ދަރުބާރުގެއަށް ކަމަށެވެ. ދަރުބާރުގެއަށް އެސާމާނު ގެންދަން ތައްޔާރުވިއިރު ކޮމިޝަނުގެ އޮފިޝަލުން ވާރެއާ ތެމިގެންގޮސް ދަރުބާރުގޭގައި އިންތިޒާރު ކުރަމުންދިޔަ ކަމަށެވެ. އެއީ އެމީހުންވެސް އިންތިޚާބު ބޭއްވުމަށް ބޭނުންވެފައިވާ މިންވަރު ދައްކުވައިދޭ ކަމެއް ކަމަށްވެސް އޭނާ ވިދާޅުވިއެވެ. ނަމަވެސް ފުލުހުން ހުރަސް އެޅުމުން އެކޮމިޝަނަށްވަނީ ސްޕްރީމްކޯޓުގެ ހުކުމްވެސް ތަންފީޒު ކުރެވޭނޭ ގޮތެއް ނުވެފައި ކަމަށް ފުވާދު ވިދާޅުވިއެވެ.

ފުވާދު ވިދާޅުވީ ރިޔާސީ އިންތިޚާބު ނުބޭއްވުމުގައި ދިމާވި ހުރަސްތައް ނުވަތަ މައްސަލަތައް ސްޕްރީމްކޯޓަށާއި، ޕޮލިސް އިންޓަރގްރިޓީ ކޮމިޝަނާއި، ޕޮރޮސިކިޔުޓަރޖެނެރަލްގެ އިތުރަށް އަދިވެސް ކަމާބެހޭ ފަރާތްތަކަށް މިއަދު ހުށަހަޅުއްވާނެ ކަމަށެވެ. އޭނާ ވިދާޅުވީ އިންތިޚާބެއް ބާއްވާނެ ތާރީޚެއް ހޯދުމަށް ސްޕްރީމްކޯޓުގައި އެދިވަޑައި ނުގަންނަވާނެ ކަމަށެވެ. ނަމަވެސް ކަންހިނގާފައިވާ ގޮތް އެކޯޓަށް ހުށަހެޅުއްވުމުން އެތަނުން އަންގަވާ ގޮތަކަށް "ކިޔަމަން" ވާނެ ކަމަށެވެ. "ސްޕްރީމްކޯޓުން އަންގަވާ ގޮތަކަށް ކިޔަމަންވެ އަދިވެސް އިޚުލާސްތެރިކަމާއެކު މަސައްކަތް ކުރާނަން" އޭނާ ވިދާޅުވިއެވެ.

މިއަދު ބާއްވަން އުޅުނު އިންތިޚާބު ބޭއްވުމަށް ފުލުހުން ހުރަސް އެޅުމުން ފުވާދު ވިދާޅުވީ ފުލުހުންނަށް ވެސް ގޯސްވީ ވޯޓާސް ލިސްޓުގައި ސޮއިނުކުރި މީހުންނޫން ކަމަށެވެ. އޭގެ ބަދަލުގައި ގޯސްވެފައިވަނީ އިންތިޚާބު ބާއްވަން އުޅުނު މީހުންނާއި އިންތިޚާބުގައި ވޯޓުލާންތިބި މީހުންކަމަށެވެ.

އޭނާ ވިދާޅުވީ އިލެކްޝަންސް ކޮމިޝަނަކީ މިހާރު މާބޮޑު ބާރެއްއޮތް ތަނެއްކަމެއް ގަބޫލެއް ނުކުރައްވާ ކަމަށެވެ. ދެން އިންތިޚާބެއް ބާއްވަން ޖެހިއްޖެނަމަ ފުލުހުންނާ މަޝްވަރާ ކުރައްވާނެ ކަމަށްވެސް އޭނާ ވިދާޅުވިއެވެ.

ފުވާދު ވިދާޅުވީ މިފަދަ މައްސަލަތައް ދިމާވިޔަސް ކޮމިޝަނުގެ މެންބަރުން އިސްތިއުފާ ދެއްވުމަކީ ހައްލެއްނޫން ކަމަށެވެ. އެހެކަމުން ކޮމިޝަނުގެ އެއްވެސް މެންބަރަކަށް ސިއްހީ މައްސަލައެއް ދިމާނުވާހާ ހިނދަކު އިސްތިއުފާ ނުދެއްވާނެ ކަމަށެވެ. ދައުރު ހަމަވަންދެން ރައްޔިތުންގެ ޚިދުމަތުގައި ތިއްބަވާނެ ކަމަށްވެސް އޭނާ ވިދާޅުވިއެވެ.

ފުވާދު ވިދާޅުވީ އިންތިޚާބު ބޭއްވުމަށް ފުލުހުން ހުރަސްއަޅާފައިވަނީ ވޯޓާސް ލިސްޓުގައި ދެ ކެންޑިޑޭޓަކު ސޮއިކޮށްފައި ނުވާތީ ކަމަށެވެ. ނަމަވެސް އެކަމަކީ ފުލުހުން ބަލަންވީ ކަމެއް ނޫން ކަމަށްވެސް އޭނާ ވިދާޅުވިއެވެ. "ސްޕްރީމްކޯޓަކުން ނުބުނޭ ވޯޓާސް ލިސްޓުގައި ހުރިކަންކަން ފުލުހުން ބަލަންޖެހޭނެ ކަމަށް" ފުވާދު ވިދާޅުވިއެވެ. އޭނާ ވިދާޅުވީ ފުލުހުން ކުރަންވީ ކަމަކީ ސެކިޔުރިޓީގެ ކަންކަން ހަމަޖައްސަވައި ދެއްވުން ކަމަށްވެސް އޭނާ ވިދާޅުވިއެވެ. ތިން ކެންޑިޑޭޓުންގެ ތެރެއިން ދެ ކެންޑިޑޭޓަކު ވޯޓާސް ލިސްޓުގައި ސޮއިނުކުރި ކަމަށްވިޔަސް ދައުލަތުން ކަނޑައަޅާ އުސޫލުގެ މަތިން އިންތިޚާބު ބާއްވަންޖެހޭނެ ކަމަށްވެސް ވިދާޅުވިއެވެ. މިއީ ދުނިޔޭގެ އެހެން ގައުމެއްގައި ހިނގިކަމެއް ކަމަށްވާނަމަ 2 ކެންޑިޑޭޓުން ސޮއި ނުކުރެއްވިޔަސް އިންތިޚާބު ބާއްވާނެ ކަމަށް ވިދާޅުވިއެވެ.

ފުވާދު ވިދާޅުވީ އިންތިޚާބުގެ ސަލާމަތީ ކަންކަމާބެހޭ ގޮތުން އެމްއެންޑީއެފް އާ ވެސް މަޝްވަރާ ކުރެއްވި ކަމަށެވެ. އެކަމަކު އެމްއެންޑީއެފްއިން ކުރަނީ ފުލުހުންނަށް ނުކުރެވިގެންދާ ކަންކަން ނުވަތަ ފުލުހުންނަށް ކަންކަން ނުކުރެވޭ ހާލަތުގައި ދިމާވާ ކަންކަން ކަމަށްވެސް އޭނާ ވިދާޅުވިއެވެ.

ދެން އިންތީޚާބު ބާއްވާނެ ތާރީޚެއް ލިބި އަލުން ބާއްވާއިރު މަދުވެގެން 21 ދުވަސް ބޭނުންވާ ކަމަށް ފުވާދު ވިދާޅުވިއެވެ. އޭރުން 8 ގަޑިއިރު ނިދާފައި، 10 ވަރަކަށް ގަޑިއިރު މަސައްކަތް ކޮށްގެން އިންތިޚާބު ބޭއްވިދާނެ ކަމަށެވެ. ނަމަވެސް އެންމެ އެކަށީގެންވާ ގޮތުގައި އިންތިޚާބެއް ބޭއްވޭނީ 45 ދުވަސް ލިބިގެން ކަމަށްވެސް އޭނާ ވިދާޅުވިއެވެ.

ފުވާދު ވިދާޅުވީ މިއަދު ގައުމަށް ދިމާމިވީ ވަރަށް ދެރަގޮތެއް ކަމަށެވެ. ގާނޫނު އަސާސީ ބުނާގޮތުން މިހާހިސާބަށް އަންނައިރު ކުރިއަށްއޮތް ފަސްއަހަރަށް ރާއްޖޭގައި ރައީސްކަން ކުރައްވާނެ ވެރިއަކު ހުންނަންވާނީ އިންތިޚާބު ކުރެވިފައި ކަމަށްވެސް އޭނާ ވިދާޅުވިއެވެ.

ކޮމިޝަންގެ މެންބަރު އަލީ މުހައްމަދު ވިދާޅުވީ މިއީ ފައިސާ ގޮތުންނާއި، ވަގުތުގެ ގޮތުންވެސް ގައުމަށް ގެއްލުން ބޮޑު ދުވަހެއް ކަމަށެވެ. އަދި މިއަދަކީ ރާއްޖޭގެ ޑޮމޮކްރަސީގައި "އަނދިރި" ދުވަހެއް ކަމަށްވެސް އޭނާ ވިދާޅުވިއެވެ.

އަލީ މުހައްމަދު ވިދާޅުވީ ރާއްޖެތެރެއަށް ފޮނުވި އޮފިޝަލުންގެ ޚަރަދު ބޭރަށް ފޮނުވި އޮފިޝަލުންނަށްވުރެ ބޮޑު ކަމަށެވެ. ފުވާދު ވިދާޅުވީ ރާއްޖެއިން ބޭރުގެ ގައުމަތަކަށް ދިޔަ އޮފިޝަލުން އެނބުރި މާދަމާ އަންނާނެ ކަމަށެވެ. އޭނާ ވިދާޅުވީ ދެން އިންތިޚާބީ ތާރީޚެއް އިއުލާން ކުރެވުނަސް އިންތިޚާބު ބޭއްވޭނެ ކަމާމެދު ރައްޔިތުން ސުވާލު އުފައްދާނެ ކަމަށެވެ.

ފުލުހުން ބުނެފައިވަނީ ސްޕްރީމްކޯޓުގެ ގައިޑްލައިންތަކާ ޚިލާފަށް ކުރިއަށްދާ އިންތިޚާބެއްގެ ކަންކަމުގައި އިލެކްޝަނަށް އެއްބާރުލުން ނުދެވޭނެ ކަމަށެވެ.