ހެނދުނު ހުޅުވާލި ވޯޓުފޮށިތައް ބަންދު ކުރަން ފަށައިފި

ކުރިއަށް އޮތް ފަސްއަހަރަށް ރާއްޖެގެ ރައީސުލްޖުމްހޫރިއްޔާ ކަމުގައި ހުންނަވާނެ ބޭފުޅަކު އިންތިޚާބު ކުރުމަށް ވޯޓުލުމަށްޓަކައި މިއަދު ހެނދުނު ހުޅުވާލި ވޯޓުފޮށިތައް ބަންދު ކުރަން ފަށައިފިއެވެ.

އިލެކްޝަންސް ކޮމިޝަނުން ހަމަޖައްސަވާފައިވަނީ މިއަދު ހެނދުނު 7.00 އިން ހަވީރު 3.30 އަށް ވޯޓުލުމުގެ ކަންކަން ކުރިއަށް ގެންދިޔުމަށެވެ.

ގަޑިޖެހުމުން ވޯޓުފޮށިތައް ބަންދުކުރަން ފެށިއިރުވެސް ފޮށިތައް ކައިރީގައި ކިޔޫގައި ބައެއް މީހުންތިއްބެވެ. ގަޑިޖެހުމުގެ ކުރިން ކިޔުޖެހޭ މީހުންނަށް ވޯޓުލުމުގެ ފުރުސަތު ދެއްވާނެ ކަމަށް އިލެކްޝަންސް ކޮމިޝަނުންވަނީ ބުނެފައެވެ.

އިލެކްޝަންސް ކޮމިޝަނުން ބުނެފައިވަނީ ވޯޓުފޮށި ބަންދުކުރާތާ ބައިގަޑިއިރުފަހުން ގުނަން ފަށާނެ ކަމަށެވެ. މިފަހަރުގެ އިންތިޚާބު މިބާއްވަނީ ދެފަހަރެއްގެ މަތިން ބާއްވަން އުޅެ ނުބޭއްވި ދިޔުމަށްފަހުގައެވެ.

މިއަދުނެގި ވޯޓުފޮށިތައް ބަންދު ކުރުމަށްފަހު މިހާރުވަނީ ބައެއް ފޮށިތައް ގުނަން ފަށައިފައެވެ. މިއަދުގެ ވޯޓު ލުމުގައިވެސް ބައެއް މައްސަލަތައްވަނީ ދިމާވެފައެވެ. އެގޮތުން ވޯޓުލާ މަރުކަޒުގައި އޮންނަ ލިސްޓުގައި އޮންނަ ނަމާއި، އައިޑީކާޑުގައި އޮންނަ ނަން ދިމާނުވުމުގެ ސަބަބުން ބައެއް މީހުންނަށް ވޯޓުލުމުގެ ހައްގުވަނީ ގެއްލިފައެވެ. އަދި އެމީހަކަށް ނޭނގި ބޭރުގެ ގައުމެއްގައި ރަޖިސްޓްރީ ވެފައިވާތީ ވޯޓުލުމުގެ ހައްގު ގެއްލިފައިވާ މީހުންވެސް ތިބިއެވެ.

އިލެކްޝަނުން ނިންމާފައިވަނީ އިންތިޚާބުގެ ދެވަނަބުރު މާދަމާ ބާއްވާށެވެ. ނަމަވެސް ބައެއް ޕާޓީތަކުން ވޯޓާސް ލިސްޓުގައި ސޮއިނުކުރާނެ ކަމަށް ބުނެފައިވާތީ މާދަމާ ދެވަނަ ބުރު ބޭއްވުމުގެ ފުރުސަތު ކުޑަކަމަށްވެސް އިލެކްޝަނުން ވަނީ ބުނެފައެވެ.

މާދަމާ ދެވަނަ ބުރު ބޭއްވި ރައީސަކު އިންތިޚާބު ކުރެވިއްޖެ ކަމަށްވާނަމަ ނޮވެމެބަރު 11 ވަނަ ދުވަހު ރައީސުލްޖުމްހޫރިއްޔާ ކަމުގެ ހުވައި އެބޭފުޅަކަށް ކުރެވޭނެއެވެ.