ޑިމޮކްރަސީއަކީ އެއްވެސް ހާލެއްގައި ފުރާފުރިހަމަ ނިޒާމެއް ނޫން- ރައީސް ވަހީދު

ޑިމޮކްރަސީއަކީ އެއްވެސް ހާލެއްގައި ފުރާފުރިހަމަ ނިޒާމެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު ވަހީދު ހަސަން ވިދާޅުވެއްޖެއެވެ.

ގައުމާ މުޚާތަބު ކުރައްވައި ރޭ ވާހަކަފުޅު ދައްކަވަމުން އެމަނިކުފާނު ވިދާޅުވީ "ޑިމޮކްރަސީއަކީ އެންމެގިނަ މީހުން ބޭނުންވާގޮތަށް ކަން ކުރެވުން. ޑިމޮކްރަސީއަކީ އެއްވެސް ހާލެއްގައި ފުރާފުރިހަމަ ނިޒާމެއް ނޫން. ސީދާ މާނަކުރުމަށް ބަލައިފިނަމަ، ޑިމޮކްރަސީއަކީ ދުނިޔޭގައި ވެރިކަން ކުރުމުގެ ނިޒާމުގެ ތެރެއިން އެންމެ ރަނގަޅު ނިޒާމް ކަމުގައި އެންމެގިނަ މީހުން ގަބޫލުކުރާ ނިޒާމް." ކަމަށެވެ.

އެމަނިކުފާނު ވިދާޅުވީ ޑިމޮކްރެޓިކް އިންތިޚާބެއްގެ ނަތީޖާއަކަށްވާނީ، ގިނަ މީހުންގެ ނިންމުން ކަމަށެވެ. ގިނަމީހުން ނިންމާ ގޮތަކަށް ދެންތިބި އެންމެންވެސް ތަބާވާންޖެހޭނެ ކަމަށް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ މާދަމާ ވޯޓުލާއިރު އެންމެ ޟައީފު މީހާއަށްވެސް ރައްކާތެރިކަމާއި މިނިވަން ކަމާއެކު ވޯޓުލެވޭނެ ގޮތް ހައްދަވައި ދެއްވަންޖެހޭ ކަމަށެވެ.

ރައީސުލްޖުމްހޫރިއްޔާ ވިދާޅުވީ ރިޔާސީ އިންތިޚާބަކީ ހުރިހާގޮތުންވެސް ކާމިޔާބު އިންތުޚާބަކަށް ހަދަންޖެހޭ ކަމަށެވެ. ޤައުމާއި ރައްޔިތުންގެ ޙައްޤުތައް ރައްކާތެރިކުރުމުގެ ޒިންމާ، ކުރިއަށް އޮތް ފަސްއަހަރު ދުވަހަށް ޙަވާލުކުރައްވާނެ ބޭފުޅަކު ކަނޑައަޅުއްވާނީ، ދިވެހި ރައްޔިތުން ކަމަށްވެސް ވިދާޅުވިއެވެ. މިކަން ކުރިއަށް ގެންދާނެ ގޮތް ކަނޑައަޅާނީވެސް ރައްޔިތުން ކަމަށް ވިދާޅުވިއެވެ.

އެމަނިކުފާނު ވިދާޅުވީ ޑިމޮކްރަސީ އައުމުން ކުރީގައި ޤައުމުގައިހުރި ހެޔޮ ރަނގަޅު ކަންކަން ގެއްލިގެންނުވާނެ ކަމަށެވެ. ރާއްޖެއަށް ޑިމޮކްރަސީ ގެނެވުނީ، ނިސްބަތުން އެހެން ޤައުމުތަކަށްވުރެ ފަހުން ކަމަށްވުމުން އެހެން ޤައުމުތަކުން ޑިމޮކްރަސީގެ މަގުގައި ހޯދާފައިވާ ފިލާވަޅުތަކުން ޢިބްރަތް ލިބިގަންނަން ޖެހޭނެ ކަމަށްވެސް އެމަނިކުފާނު ވިދާޅުވިއެވެ.

ކިތަންމެވަރަކަށް ޚިޔާލު ތަފާތުވިޔަސް، ކިތަންމެ ކުލަތަކެއްގެ ދަށުގައި ތިބި ނަމަވެސް، ކޮންމެ މީހަކަށް ތާއިދު ކުރިޔަސް ބަދަލު ނުކުރެވޭނެ ކަމެއް އެބައޮތް ކަމަށް އެމަނިކުފާނު ވިދާޅުވިއެވެ. "އަޅުގަނޑުމެންނަކީ ދިވެހިންނަށްވީކަން. އެއްބަހަކުން ވާހަކަ ދައްކައި، އެއްނަސްލެއްގައި ތިބި އެއްބަޔަކަށްވީކަން. މިދީބުގެ އަޑުތައް ފިޔަވައި އެހެން އަޑުތަކެއް، އަޅުގަނޑުމެން އެއްވެސް މީހަކަށް ކަމުނުދާނެކަން. މިކަމާ ދެބަސްވުމެއްނެތް ކިތަންމެ ކުޑަނަމަވެސް، ކިތަންމެ ނާޒުކު ނަމަވެސް، ކިތަންމެވަރަކަށް އަޅުގަނޑުމެން އަމިއްލައަށް ދެބަސްވިނަމަވެސް، މިޤައުމު ނޫން ޤައުމެއް، އަޅުގަނޑުމެން ހަމަ އެކަކަށްވެސް އިޚްތިޔާރެއް ނުކުރެވޭނެ." އެމަނިކުފާނު ވިދާޅުވިއެވެ.