އެމްޑީޕީ މީހުންނަށް އަނިޔާކުރާ ފުލުހުންގެ އާއިލާތައް ގެއިން ނެރުމުގެ މަސައްކަތް ކުރާނަން-ރީކޯ މޫސަ

އެމްޑީޕީ މީހުންނަށް އަނިޔާކުރާ ފުލުހުންގެ އާއިލާތައް ގެއިން ނެރުމުގެ މަސައްކަތް މިއަދުން ފެށިގެން ކުރާނެ ކަމަށް އެމްޑީޕީގެ ޗެއާޕާސަން ރައްޔިތުންގެ މަޖިލީހުގެ ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު ރޭ ވިދާޅުވެއްޖެއެވެ.

ރާއްޖެޓީވީއާ ފޯނުން ވާހަކަ ދައްކަވަމުން އޭނޭ ރޭ ވިދާޅުވީ "އަޅުގަނޑުމެންގެ ގޭގެއިން މާދަމާ (މިއަދު) އެމީހުން (ފުލުހުން) ތިބިތަން ބަލާފައި އަޅުގަނޑުމެންނަށް (އެމްޑީޕީ މީހުންނަށް) އަނިޔާކުރާ ފުލުހުންތިބި ގޭގެއިން އެމީހުންގެ އާއިލާތައް ނެރުމުގެ މަސައްކަތްވެސް އަޅުގަނޑުމެން ކުރާނަން،" ކަމަށެވެ. މިކަމަކީ ކުރެވޭނެ ކަމެއް ކަމަށް އޭނާ ވިދާޅުވިއެވެ.

މޫސަ ވިދާޅުވީ ފުލުހުންގެ ތެރެއިން އެމްޑީޕީގެ މީހުންނަށް އަނިޔާކުރާ މީހުން އެނގިވަޑައި ގަނަންވާ ކަމަށެވެ. ރޭވެސް ފުލުހުންވަނީ ރައްޔިތުންގެ މަޖިލީހުގެ އެމްޑީޕީގެ މެންބަރެއް ކަމަށްވާ ބޮންޑޭ އަށް އަނިޔާކޮށްފައި ކަމަށެވެ. އަދި އަލީ ޢާޒިމް ހައްޔަރު ކުރިކަމަށްވެސް މޫސަ ވިދާޅުވިއެވެ. "ކުރިމަތި ލައިގެން ތަޅައި ނުގަތުމަށް ސަލާމަތުގެ ބާރުތަކަށް ވަރަށް އާދޭހާ އެކު ދެންނެވިން. އެކަމަކުވެސް އެކަން މިރޭ (ރޭ) އެގޮތަށް ކޮށްފި. ރައްޔިތުންގެ މަޖިލީހުގެ މެންބަރު ބޮންޑެއަށް އަނިޔާ ކޮށްފި. އަޒީމް ހައްޔަރުކުރި. ރައްޔިތުންގެ މަޖިލީހުގެ ރައީސް ގެ ލޮލަށް ޕެޕަސްޕްރޭ ޖަހައިފި،" އޭނާ ވިދާޅުވިއެވެ.

"އަޅުގަނޑު ދަންނަވަންއޮތީ ޕޮލިހުންގެ ތެރޭގައި ތިބި މަދު ފުލުހުން ކޮޅެއް އަޅުގަނޑުމެނަށް ތިޔަ އަނިޔާކުރާ ހުރިހާ ފަރާތްތައް އެނގޭ. އަޅުގަނޑުމެންގެ އެމްޑީޕީގެ ހުރިހާ މެންބަރުންނަށް އަޅުގަނޑު ގޮވާލާނަން މިރޭ (ރޭ) މިބުނަނީ މާލޭގެ ގެދޮރު ކުއްޔަށް ހިފައިގެން ތިބެގެން އަޅުގަނޑުމެންގެ ރައްޔިތުންނަށް އަނިޔާކުރާ ކަމަށްވަނީ ވިއްޔާ އަޅުގަނޑުމެން ދެން އެމީހުންނަށް ގެދޮރު ކުއްޔަށް ދީގެންވެސް ނުތިބޭނަން. މައްސަލައެއް ނޫންއެއީ. އެހެންވީމާ އެބޭފުޅުންނަށް އަބްދުﷲ ރިޔާޒު ދޭ ގެއަކަށް ވަޑައިގަންނަވަންވީ،" މޫސަ ވިދާޅުވިއެވެ.

މޫސަ ވިދާޅުވީ އެމްޑީޕީ ސަޕޯޓަރުންނަށް މަގުމައްޗަށް ރޭ ނުކުމެވުނީ ތަންކޮޅެއް ދަންވެފައި ހުއްޓައި ކަމަށެވެ. ނަމަވެސް މިއަދު ހެނދުނު އިތުރު ރައްޔިތުން މަގުމައްޗަށް ނިކުންނާނެ ކަމަށެވެ.

އޭނާ ރޭ ވަނީ ރާއްޖޭގެ ހުރިހާ ކަންކޮޅަކުން އެމްޑީޕީއަށް ވޯޓުދިން އެންމެން މާލެ އައުމަށް ގޮވާލައްވާފައެވެ. މިއެންމެން މާލެއަށް ގެނެސް ގެން މަގުތަކުގައި އިހުތިޖާޖު ކުރުމުގެ ވަގުތުވެސް "އިރާދަ ކުރެއްވިއްޔާ" ހޯދާނެ ކަމަށްވެސް އޭނާ ވިދާޅުވިއެވެ. ރަށްރަށުން މީހުން މާލެއައިސްގެން ދިވެހި ތާރީޚުގައި މާލޭގައި ކަންކަން ހިނގާފައި އެބަހުރި ކަމަށްވެސް އޭނާ ވިދާޅުވިއެވެ.

މޫސަ ވިދާޅުވީ އެމްޑީޕީގެ މިއަދުގެ އިހުތިޖާޖުތައް ވަރަށް ބޮޑުތަން ވަރުގަދަވެގެންދާނެ ކަމަށެވެ. "ބައެއް ބޭފުޅުން އަދި ބައެއް ސިޔާސީ ޕާޓީތަކުގެ އެހެން މީހުން ބައެއް ކަހަލަ ގްރޫޕުތައް މެދުވެރި ކޮށްގެން ބައެއްކަހަލަ ކަންތައްތައް ކުރައްވަން އުޅޭނެ ކަމެއްނެތް. މާލޭ މަގުމަތީގައިވެސް ރާޖޭގެ ތަންތަނުގައިވެސް އެމްޑީޕީގެ އަދަދާއި އެމްޑީޕީގެ ބޯ ގިނަވާނެ. އަޅުގަނޑުމެންގެ ދިފަތިތައްވެސް ކަނޑާނެ ކަމެއްނެތް. އަޅުގަނޑުމެންގެ ބޮލުގައި އަޅުވާކަށް ކާރުގައި ރޯކުރާނެވެސް ކަމެއްނެތް. އަޅުގަނޑުމެން މިތިބީ އެކަންކަން ކުރާގޮތަކަށް ނޫން،" އޭނާ ވިދާޅުވިއެވެ.

އޭނާ ވިދާޅުވީ މިހާރު ރާއްޖޭގައި ހިނގަމުންދާ ކަންތައްތަކީ "ބަޔަކު މީހުން" ދެތިން ފަނޑިޔާރުންނާ ގުޅިގެން ދެވަނަ ބަޣާވަތް ކުރުމަށް ކުރާ ކަންތައްތަކެއް ކަމަށެވެ. އަދި މިކަންކަމަކީ ރާއްޖޭގައި މައިނޯރިޓީއެއްގެ ގޮތުގައި އޮތް އެކަށީގެންވާ ބާރުނެތް ސިޔާސީ ފަރާތްތަކުން ކުރާ ކަމެއް ކަމަށްވެސް އޭނާ ވިދާޅުވިއެވެ. އޭނާ ވިދާޅުވީ ރައްޔިތުންގެ މަޖިލީހުގެ ފުލްމެޖޯރިޓީ އެމްޑީޕީއަށް އެބައޮތް ކަމަށެވެ. އަދި ބައިނަލް އަގުވާމީ ފަރާތްތަކުގެ ގުޅުންވެސް އެބައޮތް ކަމަށެވެ.

އެމްޑީޕީން މަގުތަކަށް ނިކުތުމުން ގޯސްވާނެ ކަމަށް ބައެއް މީހުން ހީކުރިޔަސް ގޯސް ނުވާނެ ކަމަށްވެސް އޭނާ ވިދާޅުވިއެވެ. "ގޯސްވާނެ ކަމަށްވާނަމަ ފާއިތުވި ދޮޅު އަހަރު ނުވަތަ ދެ އަހަރު މަގުމައްޗަށް ނިކުތުމުން ރައްޔިތުން 95 ހާސް ވޯޓު އަޅުގަނޑުމެންނަށް ނުދޭނެ. އެއީ ހައްގަށް އަޅުގަނޑުމެން މަސައްކަތް ކުރާނީ،" އޭނާ ވިދާޅުވިއެވެ.

އޭނާ ވިދާޅުވީ އެމްޑީޕީން ޖުމްހޫރީ މައިދާނަންވެސް ވަންނަން ގޮސްފިއްޔާ ވަންނާނާނެ ކަމަށެވެ. "އެދުވަސް ދައްކާނަން ދިވެހިރާއްޖޭގެ ސަލާމަތީ ބާރުތަކަށް. އަޅުގަނޑު މިދަންނަވަނީ ދައްކާނަމޭ،" އޭނާ ވިދާޅުވިއެވެ.

"އަޅުގަނޑުގެ އިލްތިމާސް އަކީ މާލެ ފިޔަވައި ރާއްޖޭގެ ހުރިހާރަށެއްގައިވެސް އެބަޔަކަށް ވީވަރަކުން މަގުމަތީ ތަނެއްގައި މަޑުމައިތިރި ކަމާއެކު ތަނެއްގައި އިށީދެގެން ތިބެގެން މާދަމާއިން ފެށިގެން (މިއަދު) މުޒާހަރާ ތައް ކުރިއަށް ގެންދިޔުމަކީ ވަރަށް އެދޭ ކަމެކޭ. އަދި ކުރިއަށްއޮތް ތަނުގައި ރާއްޖޭގެ ހުރިހާ ރައްޔިތުން މާލެއަށް އައުމަށް އަޅުގަނޑުމެން ގޮވާލަމޭ. އެކަންކަން ކުރިއަށް ގެންދާނަން،" މޫސަ ވިދާޅުވިއެވެ. އޭނާ ވިދާޅުވީ އެކަމުގެ އިންތިޒާމް ތައް ގައުމީ ހިންގާ ކޮމިޓީމެދުވެރިކޮށް މިއަދުން ފެށިގެން ހަމަޖައަސަމުން ގެންދަވާނެ ކަމަށެވެ.