ރައްޔިތުން ބާރުވެރި ކުރުމަށް ކުރެވެންހުރި މަސައްކަތެއް މަޖިލިސް ތެރެއިން ކުރާނަން-އެމްޑީޕީ

ރައްޔިތުންގެ ބާރުވެރިކަން ކަނޑުވާލައި ގާނޫނު އަސާސީ ބުގުރާލަން "ބަޔަކު" މަސައްކަތް ކުރަމުންދިޔަސް އެކަންކަން ހައްލު ކުރުމަށް ރައްޔިތުންގެ މަޖިލީހުގެ ތެރެއިން ކުރެވެންހުރި ހުރިހާ މަސައްކަތެއް ކުރާނެ ކަމަށް އެމްޑީޕީން ބުނެފިއެވެ.

އެމްޑީޕީގެ ތަރުޖަމާނު މާފަންނު ދެކުނުދާއިރާގެ މެންބަރު އިމްތިޔާޒު ފަހުމީ (އިންތި) ވިދާޅުވީ މާދަމާ ބާއްވާ ރައްޔިތުންގެ މަޖިލީހުގެ ޚާއްސަ ޖަލްސާގެ ތެރެއިންވެސް މިކަންކަން ހައްލު ކުރުމަށް މަގުފަހި ވެގެންދާނެ ކަމަށެވެ.

މާދަމާގެ ޖަލްސާއަކީ ރިޔާސީ އިންތިޚާބުގެ ފުރަތަމަ ބުރުގެ ވޯޓަށްފަހު ޖުމްހޫރީޕާޓީން ކޯޓަށް ވައްދާފައިވާ މައްސަލައާ ގުޅިގެން ރައްޔިތުންގެ މެދުގައިހުރި ކަންބޮޑުވުންތައް ފިލުވައި ރައްޔިތުން ބާރުވެރި ކުރުމަށް ކުރެވެންހުރި ކަންކަން ކުރުމަށް އެމްޑީޕީގެ އެދުމުގެ މަތިން ބާއްވަ ޖަލްސާއެކެވެ.

އިންތި ވިދާޅުވީ މާދަމާގެ ޖަލްސާގައި އެޖެންޑާ ކޮށްފައިވަނީ މަޖިލިސް ޗުއްޓީގައި ވަނިކޮށް ޚާއްސަ ޖަލްސާއެއް ބޭއްވުމަށް އެމްޑީޕީން އެދިފައިވާ ސަބަބާ ބެހޭގޮތުން ވާހަކަ ދެއްކުން ކަމަށެވެ. އެފަހުން އެހެން ކަންކަން ކުރިއަށް ގެންދިޔުމަށް ގޮތްތަކެއް ކަނޑައެޅޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.

އިންތި ވިދާޅުވީ ޖުމްހޫރީޕާޓީން ސްޕްރީމް ކޯޓަށް ހުށަހަޅާފައިވާ މައްސަލައިގެ ތެރެއަށް ދައުލަތުގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ތަދައްޚުލްވެ ދައުލަތުގެ މުއައްސަސާއަކާ ދެކޮޅަށް ވާހަކަ ދައްކަވާތީ އެކަމާ ކަންބޮޑުވާ ކަމަށެވެ. "ދައުލަތުގެ ބަންޑާރަ ނާއިބު ދައުކަތުގެ މުއައްސަސާއަކާ ދެކޮޅަށް ވަކާލާތު ކުރައްވަމުން ވިދާޅުވެފައިވަނީ އިންތިޚާބު ބާތިލް ކުރަން. މިގޮތަށް ވަކާލާތު ކުރުމުގެ ހައްގެއް ބަންޑާރަ ނާއިބަށް ނޯންނާނެ. އެހެން ކަމުން މިއީވެސް މަޖިލީސް ތެރޭގައި ބަހުސް ކުރެވޭނެ ކަމެއް،" އިންތި ވިދާޅުވިއެވެ.

އެމްޑީޕީން މިހާރުވެސްވަނީ އާޒިމާގެ އިތުބާރުނެތް ކަމުގެ ވޯޓެއް ނެގުމަށް މަޖިލީހަށް ހުށަހެޅުމަށް ނިންމަވާފައެވެ. ނަމަވެސް މާދަމާގެ ޖަލްސާއަށް އެމައްސަލަ ހުށަހަޅާނެ ކަމަށް އިންތި ވިދާޅެއް ނުވެއެވެ. އިންތި ވިދާޅުވީ މަޖިލީސް ތެރެއިން އެމްޑީޕީއަށް އެއްބާރުލުން ދޭނެ ކަމަށް ޑީއާރުޕީން ބުނެފައިވާ ކަމަށެވެ. އެހެން ކަމުން މިފަދަ މައްސަލަތައް ހުށަހަޅައިގެން ކާމިޔާބު ކުރެވޭނެ ކަމުގެ އިތުބާރުވެސް އެބައޮތް ކަމަށް އިންތި ވިދާޅުވިއެވެ.

މަޖިލިސް ތެރެއިން އިތުރަށް ކުރެވޭނީ ކޮންކަމެއްތޯ ދެންނެވުމުން އޭނާ ވިދާޅުވީ ސްޕްރީމް ކޯޓު ބެންޗުގެ ސައިޒު ކުޑަކޮށް ބޮޑު ކުރުމުގެ ބާރުވެސް އޮތީ މަޖިލީހަށް ކަމަށެވެ. އެހެންކަމުން ރައްޔިތުންގެ ވޯޓާ ކުޅުމަށް އެކޯޓުން "ހިންގާ ޖަރީމާ" ހުއްޓުވުމަށްވެސް މަސައްކަތް ކުރެވިދާނެ ކަމަށެވެ. އަދި ޖުޑީޝަލް ސާވިސްކޮމިޝަނަށް މެންބަރަކު ހޮވުމުގެ މަސައްކަތްވެސް މިވަގުތު ކުރެވޭނެ ކަމަށް އިންތި ވިދާޅުވިއެވެ.