ވޯޓު ލައިފައިވާ މީހުންގެ ލިސްޓްތައް މިއަދު ޖޭޕީއަށް ދައްކަނީ

ރިޔާސީ އިންތިހާބުގެ ފުރަތަމަ ބުރުގައި ވޯޓޫލައިފައިވާ މީހުންގެ ލިސްޓުތައް ޖުމްހޫރީ ޕާޓީއަށް ދެއްކުމަށް ހައިކޯޓުން އިލެކްޝަންސް ކޮމިޝަނަށް އެންގުމުން ކޯޓުގެ އަމުރަށް ކިޔަމަން ވުމުގެ ގޮތުން އެލިސްޓްތައް ޖޭޕީއަށް މިއަދު ދައްކާނެ ކަމަށް އިލެކްޝަންސް ކޮމިޝަނުން ބުނެފިއެވެ.

މިއަދު އެލިސްޓްތައް ދައްކާނެ ކަމަށް އިލެކްޝަންސް ކޮމިޝަނުން ހާމަ ކުރައްވާ ފައިވަނީ ރޭ ނެރުއްވި ބަޔާނެއްގައެވެ. މިބަޔާން ނެރުނު އިރު ޖޭޕީން ވަމީ އެލިސްޓުތައް ނުދައްކައިގެން ވަރަށް ބޮޑަށް އިލެކްޝަންސް ކޮމިޝަނަށް ފާޑު ކިޔައިފައެވެ. ޖޭޕީން ބުނެފައިވަނީ އެލިސްޓް ބަލާ ދިޔުމުން އެފުރުސަތު އެކޮމިޝަނުން ދީފައި ނުވާ ކަމަށެވެ. ކޯޓުގެ އަމުރާ އެއްގޮތަށް އަމަލު ނުކުރާ ކަމަށްވާނަމަ އެކޮމިޝަން ގޮވައިގެން އަނެއްކާވެސް ކޯޓަށް ދާނޭ ކަމަށް ޖޭޕީން ބުނެފައިވެއެވެ.

ރޭ އިރާކޮޅު އެކޮމިޝަނުގެ ސެކްރެޓަރީޖެނެރަލް އާސިމް އަބްދުއް ސައްތާރު ވިދާޅުވީ އެކޮމިޝަނުން ޖޭޕީއަށް އެއްގޮތަކަށްވެސް ޖެއްސުން ނުކުރާ ކަމަށެވެ. އެކޮމިޝަނުން މަސައްކަތް ކުރަމުން އައީ އެލިސްޓްތައް ދައްކާނެ ގޮތުގެ އިންތިޒާމް ހަމަޖެއްސުމަށް ކަމަށްވެސް ވިދާޅުވިއެއވެ. އެކަން ކުރާނީ ސީދާ އިލެކްޝަނުން ކަމަށްވެސް އޭނާ ރޭ ވިދާޅުވިއެވެ. މިއަދު މި ލިސްޓްތައް ދެއްކުމަށް ނިންމެވިޔަސް އާސިމް ރޭ ވިދާޅުވެފައިވަނީ އެލިސްޓްތައް ދައްކާނެ ދުވަހެއް އަދި އެނގިވަޑައި ނުގަންނަވާ ކަމަށެވެ.

އިލެކްޝަނުން ބުނެފައިވަނީ މިލިސްޓްތައް ޖޭޕިއަށް ދައްކާނީ މިއަދު ހެނދުނު 10:00 އިން ފެށިގެން މެންދުރު 12 އަށް ކަމަށެވެ. އެކަން ޖޭޕީއަށްވެސް އަންގާފައިވާނެ ކަމަށް އިލެކްޝަންސް ކޮމިޝަނުން ބުނެފައިވެއެވެ. މިވަގުތު ކޮޅު މާބޮޑަށް ކުޑަ ކަމަށް ޖޭޕީން ބުނެފައިވާ ކަމުގެ މައުލޫމާތުވެސް ލިބިފައިވެއެވެ.

ޖޭޕީން މިމައްސަލާގައި ކޯޓަށް ދިޔައީ އިންތިހާބުގައި ބޮޑެތި އޮޅުވާލުންތަކެއް ހުރިކަމަށް ބުނެ އެކަން އިލެކްޝަނުން ހައްލު ނުކޮށް ދިނީމާ ކަމަށް ޖޭޕީން ވަނީ ބުނެފައެވެ. ހައިކޯޓުން ހުކުމް ކުރައްވާފައިވަނީ ޖޭޕީގެ ރިޔާސީ ކެންޑިޑޭޓް ގާސިމް އިބްރާހީމަށް ނުވަތަ އެމަނިކުފާނު އައްޔަން ކުރައްވާ ބަޔަކަށް ލިސްޓް ދެއްކުމަށެވެ.