އެއްވެސް ޝަރުތަކާ ނުލައި ރިޔާސީ ރޭހުން ނަޝީދު އެއްފަރާތް ވުމަށް އިލްހާމް ގޮވާލައިފި

އެއްވެސް ޝަރުތަކާ ނުލައި ރިޔާސީ ރޭހުން އެމްޑީޕީގެ ކެންޑިޑޭޓް ރައީސް މުހައްމަދު ނަޝީދު ދުރަށް ވަޑައިގެންނެވުމަށް ޖުމްހޫރީޕާޓީގެ ނާއިބު ލީޑަރު އަދި އެޕާޓީގެ ރިޔާސީ ކެންޑިޑޭޓުގެ އިންތިޚާބީ އެޖެންޓް އިލްހާމް އަހުމަދު ނަޝީދަށް ގޮވައިލައްވައިފިއެވެ.

އިލްހާމް ރައީސް ނަޝީދަށް މިކަމަށް ގޮވައިލެއްވީ މިއަދު އިރުއޮއްސުނު ގަޑީގައި މ.ކުނޫޒުގައި ބޭއްވި ނޫސްވެރިންގެ ބައްދަލު ވުމެއްގައެވެ.

އިލްހާމް ރައީސް ނަޝީދަށް މިކަމަށް ގޮވައިލެއްވީ މިއަދު ހަވީރު ބޭއްވި ނޫސްވެރިންގެ ބައްދަލު ވުމެއްގައި ރައީސް ނަޝީދު ދެއްކެވި ވާހަކަފުޅުގައި ރިޔާސީ ކެންޑިޑޭޓުންގެ ތެރެއިން ގައުމަށް އެންމެ އިޚްލާސްތެރި ބޭފުޅަކީ ޖުމްހޫރީ ގުޅުމުގައި ރިޔާސީ ކެންޑިޑޭޓް ގާސިމް އިބްރާހިމް ކަމަށާއި އެހެން ކަމުން ރިޔާސީ ރޭހުން އެއްފަރާތް ވުމަށް އެންމެ އެކަށީގެންވަނީ ގާސިމް ކަމަށް ނަޝީދު ވިދާޅުވުމުން އެއަށް ރައްދު ދެއްވަމުންނެވެ.

އިލްހާމް ވިދާޅުވީ ރައްޔިތުން ބޭނުންވަނީ ގައުމަށާއި ރައްޔިތުންނަށް އިޚްލާސްތެރި ވެރިއެއް ކަމަށެވެ. އެފަދަ ވެރިއަކަށް ނޫނީ ރައްޔިތުންނަށް ކަމެއް ނުކޮށްދެވޭނެ ކަމަށްވެސް ވިދާޅުވިއެވެ. އެހެން ކަމުން ކެންޑިޑޭޓުންގެ ތެރެއިން އެންމެ އިޚްލާސްތެރި ބޭފުޅަކީ ގާސިމް ކަމަށް ރައީސް ނަޝީދު ވިދާޅުވުމުން އެކަމަށް ޝުކުރު އަދާ ކުރައްވާ ކަމަށް އިލްހާމް ވިދާޅުވިއެވެ. އޭނާ ވިދާޅުވީ އިޚްލާސްތެރި ކެންޑިޑޭޓް ވެރިކަމަށް ކުރިމަތި ލުމަށް ދޫކޮށްލުމަށްފަހު ރައީސް ނަޝީދު އެކަހެރި ވުމަށެވެ.

ރައީސް ނަޝީދަށް ވަރަށް ބޮޑަށް ފާޑު ވިދާޅުވަމުން އިލްހާމް ވިދާޅުވީ ރައީސް ނަޝީދު މިގައުމުގެ ވެރިކަމަށް ވަޑައިގެންފި ކަމަށްވާނަމަ ގައުމުގެ މިވަންކަމުގެ އިތުރަށް އިސްތިގުލާލްވެސް ގެއްލޭނެ ކަމަށެވެ. އަދި ރައީސް ނަޝީދު ތައުބާ ވުމަށް ގޮވާލައި ރާއްޖޭގެ 64 އިލްމުވެރިއަކު ފޮތެއް ނެރުއްވާފައިވާ ކަމަށްވެސް އިލްހާމް ވިދާޅުވިއެވެ. މިސަބަބާ ހެދިވެސް ނަޝީދު އިންތިޚާބުން ވަކިވާން ޖެހޭ ކަމަށް އިލްހާމް ވިދާޅުވިއެވެ.

އިލްހާމް ވިދާޅުވީ ނަޝީދު އެގޮތަށް ވާހަކަ ދެއްކެވީ ޖުމްހޫރީ ގުޅުމުގެ މެންބަރުން މާޔޫސް ކުރުވަން ކަމަށެވެ. ނަމަވެސް އެއީވާނެ ކަމެއްނޫން ކަމަށްވެސް އޭނާ ވިދާޅުވިއެވެ. މެންބަރުންގެ އިތުރަށް ގާސިމް އިބްރާހީމްވެސް ވަޑައިގަންނަވާނީ ކުރިއަށް ކަމަށް އިލްހާމް ވިދާޅުވިއެވެ. އަދި ﷲ ގެ އިރާދަފުޅުން އިންތިޚާބުވެސް ކާމިޔާބު ކުރައްވާނެ ކަމަށް އޭނާ ވިދާޅުވިއެވެ. ގާސިމް ރިޔާސީ ރޭހުންފަހަތަށް ޖެހެންވީ އެއްވެސް ސަބަބެއް ނެތް ކަމަށް އޭނާ ވިދާޅުވިއެވެ.