ރައީސް މައުމޫން ދައްކަވާ ބޭފުޅަކަށް ވޯޓުދެވޭކަށް ނެތް-ޑރ. ސައުދު

ކުރީގެ ރައީސް އަލްއުސްތާޒު މައުމޫން އަބްދުލް ގައްޔޫން ދައްކަވާ ބޭފުޅަކަށް ވޯޓު ދެވޭކަށް ނެތްކަމަށް ޕީޕިއެމް ކައުންސިލްގެ ކުރީގެ މެންބަރު ޑރ. މުހައްމަދު ސައުދު މިރޭ ވިދާޅުވެއްޖެއެވެ.

ޑރ. ސައުދު މިހެން ވިދާޅުވީ ޖުމްހޫރީ ގުޅުމުގެ ފަރާތުން ޅ. ނައިފަރުގައި މިހާރު ކުރިއަށް ގެންދާ ޖަލްސާގައި ވާހަކަ ދައްކަވަމުންނެވެ.

ސައުދު ވިދާޅުވީ ރައީސް މައުމޫން ވިދާޅުވެގެން ވަރަށްގިނަ ބޭފުޅުނަށް ރައްޔިތުންވަނީ ވޯޓު ދީފައި ކަމަށެވެ.

އަހުމަދު ތަސްމީން އަލީ އަކީ ޑީއާރުޕީގެ ލީޑަރ ޝިޕަށް ވަރަށް އެކަށީގެންވާ ބޭފުޅެއް ކަމަށް ވިދާޅުވެ ޑީއާރުޕީގެ ލީޑަރަކަށް އޭނާ ހޮވައިދެއްވުމަށް މައުމޫން އެދިވަޑައި ގެންނެވުމުން ރައްޔިތުން އެކަމަށް ތާއީދުކޮށް އެމަގާމަށް ތަސްމީން ހޮވި ކަމަށެވެ. ނަމަވެސް ތަސްމީން ވެގެންދިޔައީ ޑީއާރުޕީން މައުމޫން ދުރުކުރައްވަން މަސައްކަތް ކުރައްވައި މައުމޫންގެ ސިޔާސަތާ އިދިކޮޅަށް މަސައްކަތް ކުރެއްވި ބޭފުޅަކަށް ކަމަށް ސައުދު ވިދާޅުވިއެވެ.

ރައްޔިތުންގެ މަޖިލީހުގެ ރައީސް ޢަބްދުﷲ ޝާހިދަށް ވޯޓުދެއްވައި އެމަގާމަށް އޭނާ ހޮއްވަވައި ދެއްވުމަށް މައުމޫން އެދި ވަޑައިގެންނެވުމުން އެކަންވެސް ކޮށްދެއްވި ކަމަށް އޭނާ ވިދާޅުވިއެވެ. ނަމަވެސް ޝާހިދުވެސް މިހާރު ހުންނެވީ މައުމޫން ހުންނެވި ޕާޓީގައި ނޫންކަމަށް ސައުދު ވިދާޅުވިއެވެ. ޝާހިދު މިހާރު ހުންނެވީ މައުމޫނާ މުޅިން އިދިކޮޅު ސިޔާސީ ޕާޓީއެއްގައި ކަމަށް ސައުދު ވިދާޅުވިއެވެ. ޝާހިދު ކަންތައް ކުރެއްވީ މައުމޫން ބޭނުންފުޅުވާ ގޮތަށްތޯ ސައުދު ސުވާލު ކުރެއްވިއެވެ.

ފޭދޫދާއިރާގެ މެންބަރު އަލްހާން ފަހުމީ އަކީ ގާބިލް ބޭފުޅެއް ކަމަށް ރައީސް މައުމޫން ވިދާޅުވުމުން ރައްޔިތުން ނިކުމެ އޭނާވެސް ފޭދޫދާއިރާގެ ގޮނޑިއަށް ހޮވައިދިނެވެ. ނަމަވެސް އަލްހާންވެސް ކަންތައް ކުރެއްވީ މައުމޫން ވިދާޅުވި ގޮތާ ޚިލާފަށް ކަމަށް ޑރ. ސައުދު ވިދާޅުވިއެވެ. އަދި އޭނާ މިހާރު ހުންނެވީ އެހެން ޕާޓީއެއްގައި ކަމަށްވެސް ވިދާޅުވިއެވެ. އަދި ތޮއްޑޫ ދާއިރާގެ މެންބަރު އަލީ ވަހީދު ރައްޔިތުންނަށް ދެއްކެވުމަށްފަހު އޭނާއަށް ވޯޓު ދިނުމަށް ރައީސް މައުމޫން އެދިވަޑައި ގެންނެވުމުން އެކަންވެސް ރައްޔިތިމން ކޮށްދިން ކަމަށެވެ. އެއަށްފަހު ރައްޔިތުންގެ މަޖިލީހުގެ ތިމަރަފުށީ ދާއިރާގެ ގޮނޑިއާއި، ކާށިދޫ ދާއިރާގެ ގޮނޑި ހުސްވުމުން އެދެގޮނިޑިއަށް ކުރިމަތި ލެއްވި ދެބޭފުޅުން ކަމަށްވާ ޝަރީފާއި، ޖާބިރު ހޮއްވަވައި ދެއްވުމަށް މައުމޫން އެދި ވަޑައިގެންނެވުމުން އެދެބޭފުޅުންވެސް ހޮވައިދިން ކަމަށް ސައުދު ވިދާޅުވިއެވެ. ނަމަވެސް އެދެބޭފުޅުންވެސް މިހާރު ތިބީ އެހެން ޕާޓީތަކުގައި ކަމަށް އޭނާ ވިދާޅުވިއެވެ.

އެހެން ކަމުން މިފަހަރުގެ ރިޔާސީ އިންތިޚާބުގައި މައުމޫން ދައްކަވާ ބޭފުޅަކަށް ވޯޓުދެވެންނެތް ކަމަށް އޭނާ ވިދާޅުވިއެވެ. ސައުދު ވިދާޅުވީ މިހާރުވެސް މައުމޫނަށް އިހުތިރާމް ކުރައްވާ ކަމަށެވެ. މައުމޫނަށް އިހުތިރާމް އަދާކުރުމަކީ އެމަނިކުފާނު ވިދާޅުވާ ބޭފުޅަކަށް ވޯޓު ދިނުން ނޫންކަމަށްވެސް އޭނާ ވިދާޅުވިއެވެ. ޑރ. ސައުދު ވިދާޅުވީ ރިޔާސީ އިންތިޚާބުގައި އޭނާ ތާއީދު ކުރައްވާނީ އަދި ވޯޓު ދެއްވާނީވެސް ޖުމްހޫރީ ކޯލިޝަންގެ ރިޔާސީ ކެންޑިޑޭޓް ޤާސިމަށް ކަމަށެވެ. އަދި އޭނާއަށް ތާއިދު ކުރާ މީހުންވެސް ވޯޓުލާނީ ޤާސިމަށް ކަމަށެވެ.