އެމްޑީޕީން ދަނީ އީސީގެ ސާވަރއަށް ލައިވްކޮށް ވަންނަމުން: ރިޔާޒު
16 އޮކްޓޯބަރ 2013 23:55
ރެއިން ފެށިގެން އެމްޑީޕީން ގެންދަނީ އިލެކްޝަންސް ކޮމިޝަން (އީސީ) ގެ ސާވާ އަށް ލައިވްކޮށް" ވަންނަމުން ކަމަށް ޖުމްހޫރީކޯލިޝަނުގެ ފަރާތުން އީސީއަށް ލަފާދެއްވާ ރިޔާޒު ރަޝީދު ވިދާޅުވެއްޖެއެވެ.
ޖުމްހޫރީގުޅުމުން މިއަދު ބޭއްވި ނިއުސް ކޮންފަރެންސެއްގައި ނޫސްވެރިންނަށް މައުލޫމާތު ދެއްވަމުން ރިޔާޒު ވިދާޅުވީ އެމްޑީޕީންދަނީ އިލެކްޝަން ކޮމިޝަންގެ ސާވާ އަށް ވަދެ އެ ޕާޓީން ބޭނުންވާ މީހުންގެ ނަންތައް ރަޖިސްޓްރީ ކުރަމުން ކަމަށެވެ.
"އެމްޑީޕީން ދަނީ އިލެކްޝަން ކޮމިޝަންގެ ސާވާ ތެރެއަށް ލައިވްކޮށް ވަދެ، އެ ބޭފުޅުން ބޭނުންވާ ގޮތަށް މީހުންގެ ނަންތައް ރަޖިސްޓްރީ ކުރުމާއި ރަޖިސްޓްރީ ކޮށްފަ ތިބި މީހުންގެ ނަންތައް އެހެން ދިމަ ދިމާއަށް ބަދަލު ކުރަމުން،" ރިޔާޒު ވިދާޅުވިއެވެ. އޭނާ ވިދާޅުވީ މިމައުލޫމާތު ލިބުމުން އެކަން ފުލުހުންނަށް ހުށަހަޅާފައިވާނެ ކަމަށެވެ. މިމައުލޫމާތު ލިބުނު ގޮތެއް ރިޔާޒު ވިދާޅުވެފައެއް ނުވެއެވެ.
މިކަމާ ގުޅިހެން ފުލުހުންނަށް އެއްވެސް ޝަކުވާއެއް އައިސްފައިވޭތޯ ދެންނެވުމުން ފުލުހުންގެ މީޑިއާއިން ވިދާޅުވީ "އެފަދަ ޝަކުވާއެއްވަނީ ލިބިފައި. އެކަމާ ގުޅިގެން އަޅުގަނޑުމެން ބަލަންޖެހޭ ކަންތައްތައް މިދަނީ ބަލަމުން" ކަމަށެވެ.
ރިޔާޒު ރަޝީދުގެ މިތުހުމަތުތައް އިލެކްޝަންސް ކޮމިޝަނުން ވަނީ ދޮގުކޮށްފައެވެ. އިލެކްޝަންސް ކޮމިޝަނުގެ ސެކްރެޓަރީޖެނެރަލް އާސިމް އަބްދުއް ސައްތާރު ވިދާޅުވީ "އެއީ ރަނގަޅު ވާހަކައެއް ނޫން،" ކަމަށެވެ.
މިކަމާ ގުޅިގެން ރައީސް ނަޝީދުގެ ކެންޕޭން އެޖެންޓް އަލްއުސްތާޒު ޙަސަން ލަތީފް ވިދާޅުވީ އެމްޑީޕީ އައީ ވަރަށް ކުރިން ފެށިގެން އިންތިޚާބަށް ތައްޔާރު ވަމުން ކަމަށެވެ. މެނިފެސްޓޯއެއް ހަދައި، ރައްޔިތުންގެ ތާއީދު ހޯދަމުން ކަމަށެވެ. އަދި އެޕާޓީން އައީ ލިބޭނެ ވޯޓުގެ އަދަދު މާކުރިން ފެށިގެން "ހިސާބުޖަހައި" ބަލަމުން ކަމަށްވެސް އޭނާ ވިދާޅުވިއެވެ.
އެހެން ކަމުން ރިޔާޒު ރަޝީދު ތުހުމަތު އެކުރެއްވި ފަދަ އެއްވެސް ކަމެއް އެމްޑީޕީން ނުކުރާނެ ކަމަށް ހަސަން ލަތީފް ވިދާޅުވިއެވެ. އިންތިޚާބަށް "ތައްޔާރު ނުވާމީހުން އެކަހަލަ މަކަރު ހަދާނީ. އެމްޑީޕީން އައީ ކުރިން ފެށިގެން ތައްޔާރު ވަމުން އެހެން ވީމާ އެކަހަލަ ނުރަނގަޅު ކަމެއް އެމްޑީޕީ ނުކުރާނެ،"
ރިޔާޒު ވިދާޅުވީ ރިޔާސީ އިންތިޚާބު ބޭއްވުމަށް ސްޕްރީމްކޯޓުންވަނީ 16 ކަމެއްގެ މައްޗަށް އެކުލެވޭ ގައިޑުލައިނެއް ދެއްވާފައި ކަމަށެވެ. އޭގައި ބުނެފައިވާ ހުރިހާ ކަމެއްވެސް އަމުރާ އެއްގޮތަށް އިލެކްޝަނުން ފުރިހަމަ ކުރަންޖެހޭނެ ކަމަށްވެސް އޭނާ ވިދާޅުވިއެވެ. ނަމަވެސް އީސީން މި ގައިޑުލައިނާ ޚިލާފަށް ކުރާ ކަންކަން ވަރަށް ބޮޑަށް ކުށްވެރި ކުރައްވާ ކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު