އިލެކްޝަންސް ކޮމިޝަނުގެ ބެލުމުގެ ދަށުން ލިސްޓްތައް ދެއްކުމަށް ހުކުމް ކޮށްފި

ރިޔާސީ އިންތިޚާބުގެ ފުރަތަމަ ބުރުގައި ވޯޓު ލީ މީހުންގެ ލިސްޓް ހޯދަން ޖުމްހޫރީ ގުޅުމުން އިލެކްޝަންސް ކޮމިޝަނާ ދެކޮޅަށް ހުށަހެޅި މައްސަލައިގެ ހުކުމް ހައިކޯޓޫން މިއަދު ކޮށްފިއެވެ.

އެހުކުމުގައި ބުނެފައިވަނީ އިލެކްޝަންސް ކޮމިޝަނުން ކަނޑައަޅާ އުސޫލެއްގެ މަތިން އެލިސްޓްތައް ބެލުމުގެ ފުރުސަތު ޖުމްހޫރީގުޅުމަށް ދިނުމަށެވެ. މިގޮތަށް ހުކުމް ކުރައްވާފައިވަނީ 3 ފަނޑިޔާރުންގެ އިއްތިފާގުންނެވެ.

ހައިކޯޓުން މިއަދު މިގޮތަށް ހުކުމްކުރި ކަމަށްވިޔަސް ސާބިތު ހިފޭ ހެއްކެއް ޖުމްހޫރީީ ގުޅުމުން ކޯޓަށް ހުށަހަޅާފައެއްނުވެއެވެ.

ނަމަވެސް އެކޯޓުގެ ތިން ފަނޑިޔާރުންގެ އިއްތިފާގުން މިގޮތަށް ހުކުމް ކުރެއްވީ އިންތިޚާބުގެ ހުރިހާ ކަމެއްވެސް ހިނގާފައި ވަނީ އަދި ހިނގަމުންދަނީ ހަމަހަމަކަމާއި، ހާމަކަމާއި އިންސާފުވެރިކަމާ އެކުގައިކަން ކަށަވަރުކުރުމަކީ ކޮންމެ ކެންޑިޑޭޓަކަށް ވެސް ލިބިގެންވާ ޙައްގަކަށް ވާތީ އެވެ. އަދި އެކަންކަން ކަށްވަރުކޮށްދިނުމަކީ އިލެކްޝަންސް ކޮމިޝަނަށް އޮތް ޒިންމާއެއް ކަމަށްވެސް ހުކުމުގައި ބުނެފައިވެއެވެ.

ހައިކޯޓުން މިއަދު ކޮށްފައިވާ ހުކުމުގައި ބުނެފައިވަނީ ވޯޓު އޮޅުވާލާފައިވާ ކަމަށް ބުނެ ޖުމްހޫރީކޯލިޝަނުން ހުށަަހަޅާފައިވާ މައްސަލަ ސާބިތުކޮށް ދިނުމަށް އެވަރުގެ އެއްވެސް ހެއްކެއް ހުށަހެޅިފައި ނުވާކަމަށެވެ.

މިމައްސަލަ ސާބިތު ކުރުމަށް ޖޭޕީކޯލިޝަނުން ހުށަހަޅާފައިވަނީ މަރުވެފައިވާ މީހުން ވޯޓުލީ ކަމަށް ބުނެ ހުށަހަޅައިފައިވާ މީހުންގެ ލިސްޓަކާއި، ވޯޓުލުމުގެ ހައްގު ލިބިފައިވާ މީހުންގެ ލިސްޓުގައި ނަންތައް ތަކުރާރުވެފައިވާ ކަމަށް ބުނެ ހުށަހަޅާފައިވާ ލިސްޓަކާއި، ގޭގެ ވެރިނަށް ނޭނގި އެގެތަކުގައި ރަޖިސްޓްރީ ކޮށްފައިވާ ކަމަށް ބުނެ ހުށަހަޅާފައިވާ މީހުންގެ ލިސްޓެކެވެ.

މި ތިން ނުކުތާއަށް ޖަވާބުދާރީވެ އިލެކްޝަންސް ކޮމިޝަނުންވަނީ ޖުމްހޫރީކޯލިޝަނުގެ ހެކިތައް ނަފީ ކޮށްފައެވެ.

އިލެކްޝަނުން ބުނެފައިވަނީ މަރުވެފައިވާ ކަމަށް ބުނާ 568 މީހުންގެ ތެރެއިން 41 މީހެއްގެ ނަން ވޯޓާސް ރަޖިސްޓްރީގައި ނެތް ކަމަށެވެ. އަދި 144 މީހަކު 1800 ވަނަ އަހަރުގެ ޖެނުއަރީ 1 ވަނަ ދުވަހުގެ އެއް ގަޑިއެއްގައި މަރުވެފައިވާ މައްސަލަ އިލެކްޝަނުންވަނީ ފަނޑިޔާރުންގެ ސަމާލު ކަމަށް ގެނެސްފައެވެ.

މަރުވެފައިވާ މީހުންގެ ތެރެއިން ހަތް މީހެއްގެ ނަމުގައި ވޯޓުލާފައިވާ ކަމަށް ބުނާ މައްސަލާގައި އިލެކްޝަނުންވަނީ އޭގެތެރެއިން ހަތަރު މީހުން ދިރި ދުނިޔޭގައި އެބަތިކަން ކޯޓަށް ކަށަވަރު ކޮށްދީފައި ކަމަށްވެސް ހައިކޯޓުގެ ހުކުމުގައި ބުނެފައިވެއެވެ.

މީގެ އިތުރަށް ޖޭޕީން ފާހަގަކޮށްފައިވާ އެެނެއް ދެނުކުތާވެސް އިލެކްޝަންސް ކޮމިޝަނުންވަނީ ޖަވާބުދާރީވެ ނަފީ ކޮށްފައެވެ.