ރިޔާސީ އިންތިޚާބުގެ ދެވަނަ ބުރު ރައީސް ނަޝީދާއި ޔާމީން ކަށަވަރު ކޮށްފި

މިއަދު ބޭއްވި ރިޔާސީ އިންތިޚާބުން އެއްވެސް ކެންޑިޑޭޓަކަށް ރައީސް ކަމަށް ވަޑައިގެންނެވޭ ވަރަށް ވޯޓު ލިބިފައި ނުވާތީ ދެވަނަ ބުރަކަށް ދާންޖެހިއްޖެއެވެ.

ދެވަނަބުރުގައި ވާދަކު ރައްވާނީ ފުރަތަމަ ބުރުގައި އެންމެ ގިނަ ވޯޓު ހޯއްދެވި ދެ ކެންޑިޑޭޓުން ކަމަށްވާ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދާއި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނެވެ.

މިއަދު ބޭއްވި އިންތިޚާބުގައި އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދުވަނީ މިއަދުލީ ވޯޓުގައި 47 އިންސައްތަ ހޯއްދަވާފައެވެ. ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނަށް ލިބިވަޑައިގެންނެވީ 30 އިންސައްތައެވެ. ޖޭޕީގެ ކެންޑިޑޭޓް ގާސިމް އިބްރާހީމަށް ލިބިވަޑައިގެންނެވީ 23 އިންސައްތައެވެ. ނަމަވެސް އަދި ޔޫކޭގައިހުރި ވޯޓު ފޮށީގެ ނަތީޖާ އިއުލާން ކޮށްފައެއް ނުވެއެވެ.

ދެވަނަ ބުރުގެ ވޯޓުލުން ބާއްވާނެ ދުވަހެއް އަދި ޔަގީން ވެފައި ނުވާއިރު ޕީޕީއެމް އިންވަނީ ޖުމްހޫރީކޯލިޝަނާ ގުޅުމަށްޓަކައި ވާހަކަ ދައްކަން ފަށައިފައެވެ. މިރޭ ބޭއްވި ނޫސްވެރިންގެ ބައްދަލު ވުމެއްގައި ޕީޕީއެމްގެ ރިޔާސީ ކެންޑިޑޭޓް ޔާމީން ވިދާޅުވީ ދެވަނަ ބުރުގައި ގާސިމް އިބްރާހީމާ ގުޅުމުގެ ޝައުގުވެރިކަން ވަރަށް ބޮޑަށް އެބަހުރި ކަމަށެވެ. އަދި ކޮންމެވެސް ވަރަކަށް އެވާހަކަ ދެއްކިފައިވާ ކަމަށްވެސް ވިދާޅުވިއެވެ. ގާސިމްގެ ފަރާތުންވެސް ފެހި ސިގްނަލް ލިބިފައިވާ ކަމަށް ޔާމީން ވިދާޅުވިއެވެ. އޭނާ ވިދާޅުވީ އޭނާގެ ރަނިންމޭޓް މުހައްމަދު ޖަމީލް އަހުމަދު މިހާރުވަނީ އަދާލަތު ޕާޓީއާވެސް މަޝްވަރާ ކުރައްވާފައި ކަމަށެވެ. މިކަންކަމާ ބެހޭ ގޮތުން މާދަމާ އިތުރަށް މަޝްވަރާކޮށް ގޮތެއް ހޯއްދަވާނެ ކަމަށް ވިދާޅުވިއެވެ.ޔާމީން ވިދާޅުވީ ދެވަނަ ބުރުގައި ވާދަކުރައްވާއިރު ފުރަތަމަ ބުރުގައި ގާސިމަށް ލިބިވަޑައިގެންނެވި ވޯޓުގެ ބޮޑު އިންސަތައެއް ޕީޕީއެމަށް ލިބޭނެ ކަމަށް ވަރަށް ބޮޑަށް އުންމީދު ކުރައްވާ ކަމަށެވެ.

ރައީސް ނަޝީދަށް ވޯޓު ދޭ މީހުން މިފަހަރުވެސްވަނީ އެމަނިކުފާނަށް ވޯޓު ދެއްވާފައިކަން ގަބޫލު ކުރައްވާ ކަމަށްވެސް ޔާމީން ވިދާޅުވިއެވެ. އެހެން ކަމުން ދެވަނަ ބުރުގައި ރައީސް ނަޝީދަށް އިތުރަށް މާގިނަ ވޯޓު ނުލިބުމަކީ އެކަށީގެންވާ ކަމެއް ކަމަށްވެސް ވިދާޅުވިއެވެ.

ޔާމީން ވިދާޅުވީ މާދަމާ ދެވަނަ ބުރު ނުބޭއްވޭނެކަން ޔަގީން ކުރައްވާ ކަމަށެވެ. އެހެން ކަމުން މާދަމާއިން ފެށިގެން ދެވަނަ ބުރުގެ ކެންޕޭން ވަށްޓަވާނެ ކަމަށެވެ.

މިރޭގެ ނަތީޖާއަށްފަހު ރައީސް ނަޝީދުވަނީ ޕީޕީއެމްއާއި ޔާމީނަށް މަރުހަބާ ވިދާޅުވެ ޓްވީޓެއް ކުރައްވާފައެވެ. އަދި ދެވަނަ ބުރުގައި ޔާމީނާ ވާދަ ކުރެއްވުމަށް ތައްޔާރަށް ހުންނެވި ކަމަށްވެސް ވިދާޅުވެފައިވެއެވެ.

އުމަރު ނަސީރުވެސް ވަނީ ޕީޕީއެމްއާއި ޔާމީނަށް މަރުހަބާ ވިދާޅުވެ ޓްވީޓެއް ކޮށްފައެވެ. އޭގައި އުމަރު ވިދާޅުވެފައިވަނީ ޕީޕީއެމްއާއި ޖުމްހޫރީ ކޯލިޝަން ގުޅިގެން ރައީސް ނަޝީދު ބަލިކޮށްލެވޭނެ ކަމަށްވެސް ވަނީ ވިދާޅުވެފައެވެ. އިންތިޚާބުގެ ދެވަނަ ބުރަކަށް ގޮސްފައިވާއިރު ޖުމްހުރީޕާޓީގެ ޒުވާނުންގެ ގޮފީގެ ރައީސް މޫސާ އަންވަރު ވަނީ ދެވަނަ ބުރު ފަސްކޮށްދިނުމަށް އެދި ސްޕްރީމް ކޯޓަށް ސިޓީއެއް ފޮނުވާފައެވެ.

ނޮވެމްބަރު 11 ވަނަ ދުވަސް އަންނައިރު ރާއްޖޭގައި އިންތިޚާބީ ރައީސަކު ނެތް ކަމަށްވާނަމަ އިންތިޚާބީ ރައީސް ހުވައި ކުރައްވަންދެން މިހާރު ހުންނެވި ރައީސް ޑރ. މުހައްމަދު ވަހީދު ވެރިކަމުގައި ހުންނަވާ ގޮތަށް ސްޕްރީމްކޯޓުންވަނީ ހުކުމް ކުރައްވާފައެވެ.

ސްޕްރީމްކޯޓުން މިފަދަ ހުކުމެއް ކުރެއްވިއިރު ބައެއް ގައުމުތަކުން ބުނެފައިވަނީ ނޮވެމްބަރ 11 އަށް ފަހު އިންތިޚާބީ ރައީސަކު ނޫނީ ބަލައި ނުގަންނާނެ ކަމަށެވެ.