އިލެކްޝަނުން އުކާލަން ނެރެފައިވާ ކުނީގެ ތެރޭގައި ނަތީޖާއަށް ބަދަލު ގެނެވޭނެ ފަދަ އެއްޗެއްނެތް- ފުލުސް އޮފީސް

ރޭފަތިހުގެ ވަގުތެއްގައި އިލެކްޝަންސްކޮމިޝަނުން އުކާލި ކުނީގެ ތެރޭގައި ރިޔާސީ އިންތިޚާބުގެ ފުރަތަމަ ބުރުގެ ނަތީޖާއަށް އެއްވެސް ބަދަލެއް ނުވަތަ އަސަރެއް ކޮށްފާނެ ފަދަ ލިޔެކިޔުމެއް އުކާލާފައި ނުވާ ކަމަށް ފުލުސްއޮފީހުން ހާމަކޮށްފިއެވެ.

ފުލުހުން ހާމަ ކުރައްވާފައިވާ ގޮތުގައި ރޭ ފަތިހު 4:11 އެހާކަންހާއިރު އިލެކްޝަނުން އިންތިޚާބާ ގުޅޭ ލިޔެކިޔުންތަކެއް އުކާލަން އުޅޭކަމުގެ ޝަކުވާއެއް ލިބުނު ކަމަށެވެ. އެޝކުވާ ލިބުމުން ފުލުހުންވަނީ އެކުނިތައް ފުލުހުންގެ ބެލުމުގެ ދަށަށް ގެނެސްފައެވެ. އަދި ފުލުހުންގެ ފޮރެންސިކް ޓީމާއި ތަޙުޤީޤު ޓީމުގެ މެމްބަރުން އިލެކްޝަންސް ކޮމިޝަންގެ އޮފިޝަލުންގެ ހާޒިރުގައި އެކުނިތައްވަނީ ބަލައި ފާސްކޮށްފައެވެ.

މިތަކެތި ބަލާ ފާސްކުރުމަށްފަހު ފުލުހުން ބުނެފައިވަނީ "އެކުނިތަކުގެ ތެރޭގައި އެއްވެސް ވޯޓުކަރުދާހެއް އަދި ފުރަތަމަ ބުރުގެ ނަތީޖާ ކަރުދާހެއްފަދަ އެއްވެސް އެއްޗެއް ނައްތާލަން ކުނިކޮތަޅުތަކަށް ލާފައި ނުވާކަން ވަނީ އެނގިފައެވެ. މިއާއެކު އިލެކްޝަންސް ކޮމިޝަނުން ނައްތާލަން ނެރެފައިވާ ކުނިތަކުގެ ތެރޭގައި އިންތިޚާބުގެ 2 ވަނަ ބުރުގައި ވޯޓުލާން ރަޖިސްޓްރީ ކޮށްފައިވާ މީހުންގެ މަޢުލޫމާތުތަކަށް ބަދަލުގެނެވިދާނެ ލިޔުމެއްވެސް ފުލުހުން ބަލައިފާސްކުރި ލިޔުންތަކުން ފެނިފައެއް ނުވެއެވެ،"ފުލުހުން ބުނެފައިވަނީ މިކުނިތައް ބަލައިފާސްކުރިއިރު އެލިޔުންތަކުގެ ތެރޭގައި ރިޔާސީ އިންތިޚާބުގެ ދެވަނަ ބުރުގައި ރަށްވެހިވެފައިވާ ރަށްނޫން އެހެން ރަށްރަށަށް ވޯޓުލާންޖެހޭ މީހުން ރީރެޖިސްޓްރޭޝަނަށް ހުޅުވާލުމުން އެފަރާތްތަކުން ރަޖިސްޓްރީ ކުރިކަމުގެ ލިޔުން ދިނުމަށްފަހު އިލެކްޝަންސް ކޮމިޝަންގައިހުރި ލިޔުންތަކުގެ ތެރެއިން ބައެއް ލިޔުންތަކާއި ބައެއް މީހުންގެ އައިޑެންޓިޓީ ކާޑުގެ ކޮޕީ ހުރިކަމަށެވެ.

މިފަދަ ބައެއް ލިޔެކިޔުންތައް ނައްތާލަން ނެރެފައިވަނީ ކަފައި ކުދިނުކޮށް ހުރިގޮތަށްކަންވެސް ފުލުހުން ބުނެފައިވެއެވެ. މީގެ އިތުރުން އިލެކްޝަންސް ކޮމިޝަންގެ ރަސްމީ ތައްގަނޑުޖަހައި އެކަރުދާސްތައްވެސް ކަފައި ކުދި ނުކޮށް އެއްވެސް އެއްޗެއް ލިޔެފައިނެތް ކަރުދާސްވެސް މިތަކެތީގެ ތެރޭގައި ހުރިކަމަށް ފުލުހުން ހާމަކުރައްވާފައިވެއެވެ.

ހަމައެއާއެކު މިކަރުދާސްތަކުގެ ތެރޭގައި އިންތިޚާބުގައި ޙަރަކާތްތެރިވާ އިލެކްޝަންގެ އޮފިޝަލުންނަށް ތަމްރީނު ދިނުމަށް ބޭނުންކުރި ބައެއް ކަރުދާސްތަކާއި ކެންޑިޑޭޓުންގެ މަންދޫބުންގެ ނަންތައް ހިމެނޭ ބައެއް ލިސްޓްތައް ކަފާފައި ކުނީގެ ގޮތުގައި އުކާލަން ނެރެފައި ހުރިކަމަށްވެސް ފުލުހުން ހާމަކުރައްވާފައިވެއެވެ.

އިލެކްޝަނުގެ އިސްބޭފުޅަކު ވިދާޅުވީ އިންތިޚާބާ ގުޅޭ އެއްވެސް ލިޔެކިޔުމެއް އުކާފައި ނުވާނެ ކަމަށެވެ. އިލެކްޝަންސް ކޮމިޝަނަކީ އިންތިޚާބާ ގުޅިގެން 24 ގަޑި އިރު ހުޅުވާފައި ހުންނަ ތަނަކަށް ވުމުން ކުނިތައް ހުންނާނެ ކަމަށެވެ. އެތަކެތި ކޮންމެ ރެއަކުވެސް އުކަމުންދާ ކަމަށެވެ. ރޭވެސް އުކާލާފައިވަނީ އެފަދަ އެއްޗެހި ކަމަށް އޭނާ ވިދާޅުވިއެވެ.