އިލެކްޝަންސް ކޮމިޝަނުން އުކާލަން އުޅުނު ކަރުދާސް ތަކެއް ފުލުހުންގެ ބެލުމުގެ ދަށަށް ގެނެސްފި

އިލެކްޝަންސް ކޮމިޝަނުން އުކާލަން އުޅުނު ކަރުދާސްތަކެއް ފުލުހުންގެ ބެލުމުގެ ދަށަށް ގެނެސްފިއެވެ.

މިކަރުދާސްތައް ފުލުހުންގެ ބެލުމުގެ ދަށަށް ގެނެސްފައިވަނީ ރޭ ފަތިހު 4.00 އެހާކަންހާއިރު އެވެ. މިމައްސަލައާ ގުޅިގެން ރައްޔިތުންގެ މަޖިލީހުގެ ފުވައްމުލަކު މެދުދާއިރާގެ މެންބަރު ޝީފާގު މުފީދު (ހިސްޓޯ) ވިދާޅުވީ ކަފައިވާ ކަރުދާސްތަކުގެ ތެރޭގައި ދެވަނަ ބުރަށް ވޯޓުލާން ރަޖިސްޓްރީ ކޮށްފައިވާ މީހުންގެ ނަންތައްވެސް ހިމެނޭ ކަމަށެވެ.

"އަޅުގަނޑަށް އައީ ކޯލެއް އިލެކްޝަންސް ކޮމިޝަނުގެ ބޭރުގައި އިންތިޚާބާ ގުޅޭ ލިޔެކިޔުން ތަކެއް ގޮނޑަށް އުކާލުމަށްޓަކައި ކޮތަޅު ކޮތަޅަށާއި އެކިގޮތް ގޮތުން ޕެކްކޮށްފައި އިލެކްޝަންސް ކޮމިޝަނާ މާދުރުނޫން ހިސާބެއްގައި ބަހައްޓާފައި ހުރިކަމުގެ މައުލޫމާތު ލިބުނީ،" އޭނާ ވިދާޅުވިއެވެ.

ޝިފާގު ވިދާޅުވީ އެޚަބަރު ލިބުމުން "އަޅުގަނޑުމެން ބަލާލިން އޭގައި އެބަހުރި އިލެކްޝަންސް ކޮމިޝަނުގެ މުވައްޒަފުންގެ ލިޔެކިޔުންތައް ނައްތާ ލުމަށްޓަކައި ޝްރެޑްކޮށްފައި ހުރި ކަރުދާސް ތަކަށް އަޅުގަނޑުމެން ޒޫމްކޮށްފައި ފޮޓޯތައް ނަގާފައި ބަލާލިއިރު އެއީ އަޅުގަނޑުމެންނަށް ލަފާކުރެވޭ ގޮތުގައި އިންތިޚާބުގެ ނަތީޖާތައް ގުނުމުގައި ޓޭލީ ކުރުމުގައި ބޭނުންކޮށްފައި ހުރި ޝީޓްތައް އެހުރީ، ނައްތާ ލުމަށްޓަކައި ޝްރެޑްކޮށްފައި. ދެން އެއާއެކީގައި އަޅުގަނޑުމެންނަށް ފާހަގަ ކުރެވުނު އިލެކްޝަންސް ކޮމިޝަން ގެ ވޯޓު ރަޖިސްޓްރީ ކޮށްފައި ބައެއް ބޭފުޅުންގެ މައުލޫމާތު ނައްތާލުމަށްޓަކައި ހަމަ ފޮޓޯއިން ރީކޮށް ފެންނާން އެބަހުރި،" އޭނާ ވިދާޅުވިއެވެ. "ވަރަށް ހައިރާން ކުރުވަނިވި ކަމެއް ދެވަނަ ބުރުގެ ރަޖިސްޓްރީ ކަންތައްތައް މިހާރުވެސް ހިނގަމުންދާ ކަމަށް. އަދި އެއްކޮށް މުޅިން ނުނިމޭ ކަމަށް. ކިޔުފަތި ދަމާލާފައިއޮތް ކަމަށް އަޅުގަނޑު މެންނަށް މައުލޫމާތު ލިބިފައިވަނީ. އޭގެ ތެދެއް ދޮގެއް އަޅުގަނޑަކަށް ނޭނގޭ. އެހެން ނަމަވެސް ދެވަނަ ބުރުގެ ރަޖިސްޓްރީ ކޮންމެ ގޮތެއް ވިޔަސް ކުރެވިފައިއޮތް މީހަކު އަދި ދެވަނަ ބުރުގައި ވޯޓެއް ނުލާ. އެހެންނަމަވެސް ފުރިހަމަ ނަމާއި އެޑުރެހާއި، އަދި ރަޖިސްޓްރީ ވެފައިއޮތް ފޮށީގެ މައުލޫމާތާއި މިހުރިހާ އެއްޗެހި ތަކެއް ހިމެނޭ ގޮތަށް ޕްލާސްޓިކް ކޮތަޅުތަކުގެ ބޭރުން ހަމަ ރީތިކޮށް ފެންނާން އެބަހުރި އެމައުލޫމާތު ތައްވެސް،" ޝިފާގު ވިދާޅުވިއެވެ.

އޭނާ ވިދާޅުވީ ޖުމްހޫރީ ކޯލިޝަނުން ކޯޓަށް ވައްދާފައިވާ މައްސަލާގައި މިއަދު ގޮތެއް ނިންމާނެ ކަމަށް ލަފާ ކުރައްވާ ކަމަށެވެ. ނަމަވެސް ކޯޓުން ގޮތެއް ކަނޑައެޅުމުގެ ކުރިން ކަރުދާސްތައް ނައްތާލަން އުޅުނީ ކަމަށް އޭނާ ތުހުމަތު ކުރެއްވިއެވެ. އޭނާ ވިދާޅުވީ ދެވަނަބުރުގައި ވޯޓުލާން ތައްޔާރު ވަމުންދާއިރު ޝަރީއަތުގެ މަރުހަލާ އެހާ ދިގުވެގެން ދާނެ ކަމަށް ލަފާ ނުކުރެވޭ ކަމަށެވެ. "މިއަދުގެ ވަގުތެއްގައިވެސް ކޯޓުން ގޮތެއް ނިންމައިފާނެ. އެހެންވީމާ އޭގެ ކުރީގައި ކަރުދާސްތަކާއި ލިޔެކިޔުންތައް ނައްތާލުމުގެ ބޭނުމުގައި ކަމަށް އަޅުގަނޑުމެނަށް ތުހުމަތު ކުރަނީ މިކަން މިގޮތަށް ކޮށްފައި މިއޮތީ،" ޝިފާގު ވިދާޅުވިއެވެ.

ޝިފާގު ވިދާޅުވީ މިމައްސަލަ ސިފަކުރެވެނީ ގައުމީ ސަލާމަތާ ބެހޭ ކަމެއް ގޮތުގައި ކަމަށެވެ.

"ގައުމީ ސަލާމަތަށް ވަރަށް ބޮޑު ނުރައްކަލެއްގެ ގޮތުގައި އަޅުގަނޑުމެން މިކަން ސިފަކުރަނީ. އެއީ ދިވެހިރާއްޖޭގެ ރިޔާސަތުގައި އިންނަވާނެ ބޭފުޅަކު ކަނޑަ އެޅުމަށްޓަކައި ބޭއްވޭ އިންތިޚާބު ވެގެންދާނީ ދިވެހި ހުރިހާ ރައްޔިތުން އެއިންތިޚާބުގެ މައްޗަށް އިތުބާރުކުރާ އިންތިޚާބަކަށް. ދެން އިންތިޚާބުގެ ނަތީޖާ އިއުލާން ކުރި ހިސާބުން ފެށިގެން އަޅުގަނޑުމެން ދައްކަމުން މިގެންދާ ވާހަކައަކީ އިންތިޚާބުގައި މަކަރު ހަދާފައި އެބަވެޔޭ. މަކަރު ހަދާފައިވާ ކަމުގެ ހެއްކެއްގެ ގޮތުގައި އަޅުގަނޑުމެން މިދެކެނީ ކީއްކުރަންތޯއޭ މިދަނޑިވަޅުގައި ދެވަނަ ބުރަށް ރަޖިސްޓްރީ ކޮށްފައިތިބި މީހުންގެ ލިޔެކިޔުންތަކާއި އަދި ތަނުގެ ބައެއް މުވައްޒަފުންގެ ލިޔެކިޔުންތަކާއި، އަދި ކޯޓުގައި މައްސަލައެއް ހިނގަމުން ދަނިކޮށް ފުރަތަމަ ބުރުގެ ނަތީޖާތައް ގުނުމުގައި ބޭނުންކުރި ޝީޓްތައް ޕޭޕަރޝްރެޑަރއިން ޝްރެޑްކޮށްފައި ކޮތަޅު ކޮތަޅަށް އަޅާފައި ގޯނިގޯންޏަށް އަޅާފައި އަދި ނައްތާލަންޖެހޭ ވަގުތު އައިކަމަށް އަޅުގަނޑުމެން ގަބޫލެއް ނުކުރަން. ބައެއް ކޮތަޅުތައްހުރީ ޓްރާންސްޕޭރެންޓް ކޮތަޅުތައް. އެހެންވެ އެކޮތަޅު ތަކުގެބޭރުން ބަލާއިރު އެބަފެނޭ ރީތިކޮށް އިންތިޚާބު ތަކުގައި ޓެލީޝީޓް އެގެންގުޅޭ އުސޫލުން ހަމަ ޓެލީޝީޓްތައް ކަމަށް ޝްރެޑްކޮށްފައި އެހުރީ އަޅުގަނޑުމެން ތުހުމަތު ކުރަނީ،" އޭނާ ވިދާޅުވިއެވެ.

އިލެކްޝަންސް ކޮމިޝަނުން އުކާލަން ނެރެފައިވާ ކުނިތައް މައިގަނޑުގޮތެއްގައިހުރީ ކަޅުކޮތަޅުތަކުގައި ބަންދުކޮށްފައެވެ. ފެންނަންހުރި އެއްޗެއްސަށް ބަލާއިރު އޭގައި ހުރީ ބޮއިފައިހުރި ހުސްދަޅާއި، ފުޅިއާއި، ކުނިކަމަށް ބެލެވޭ ކަރުދާސް ތަކެވެ.

މިމައްސަލާގައި ފުލުހުންގެ މީޑިއާއިން ބުނީ ޖުމްހޫރީ ޕާޓީން ފުލުހުންނަށް ހުށަހެޅި މައްސަލައަކާ ގުޅިގެން އިލެކްޝަންސް ކޮމިޝަނުން އުކާލަން އުޅުނު ކުނިކޮތަޅު ތަކެއް ކަމަށް ބެލެވޭ އެއްޗެހި ތަކެއް ބަހައްޓާފައި ހުރި ސަރަހައްދު ފުލުހުން ބަންދު ކޮށްފައިވާ ކަމަށެވެ.

މިކަމާ ގުޅިގެން އިލެކްޝަންސް ކޮމިޝަނުގެ ބަހެއް ލިބޭ ގޮތެއް ނުވިއެވެ. އެކޮމިޝަންގެ ރައީސް ފުވާދު ތައުފީގުވެސް ފޯނު ނުނަންގަވައެވެ.