ވޯޓުލާ މީހުންގެ ލިސްޓުގައި ރައީސް ނަޝީދު ސޮއި ކުރައްވައިފި

ރާއްޖޭގައި މާދަމާ ބާއްވާ ރިޔާސީ އިންތިޚާބުގެ ވޯޓުލާމީހުންގެ ލިސްޓުތަކުގެ ތެރެއިން ބައެއް ލިސްޓުތަކުގައި އެމްޑީޕީގެ ރިޔާސީ ކެންޑިޑޭޓް ރައީސް މުހައްމަދު ނަޝީދު މިއަދު ސޮއި ކުރައްވައިފިއެވެ.

އެމަނިކުފާނު ލިސްޓުތަކުގައި ސޮއިކުރެއްވީ މިއަދު ހެނދުނު އިލެކްޝަންސް ކޮމިޝަނުގައެވެ. އެމަނިކުފާނު ސޮއިކުރައްވަން ވަޑައިހެންނެވިއިރު ހުރިހާ ލިސްޓެއް ޕްރިންޓްވެފައި ނުވާތީ ސޮއި ކުރައްވާފައިވަނީ ނިމިފައިހުރި ލިސްޓްތަކުގައެވެ.

މިލިސްޓު ތަކުގައި ރައީސް ނަޝީދާ އެކު ސޮއިކުރެއްވީ އެމަނިކުފާނުގެ ކެންޕޭން އެޖެންޓް އަލްއުސްތާޒު ހަސަން ލަތީފެވެ. މައުލޫމާތު ލިބިފައިވާ ގޮތުގައި އެމްޑީޕީން މިހާރުވަނީ ހުރިހާލިސްޓެއްގައިވެސް ސޮއިކުރައްވާފައެވެ. ނަމަވެސް ކަން ޔަގީން ކުރެވޭ ގޮތެއް ނުވެއެވެ.

އެމްޑީޕީން މިލިސްޓުތަކުގައި ސޮއިކުރެއްވި ކަމަށް ވިޔަސް ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނާއި ޖުމްހޫރީ ގުޅުމުގެ ކެންޑިޑޭޓް ގާސިމް އިބްރާހީމް އަދިވެސް ސޮއި ކުރައްވާފައެއް ނުވެއެވެ. އެބޭފުޅުންގެ ފަރާތުން ވިދާޅުވެފައިވަނީ ލިސްޓުގައި ސޮއިކުރައްވާނީ ސްޕްރީމްކޯޓުގެ ގައިޑުލައިންތަކަށް ފުރިހަމައަށް އިލެކްޝަނުން އަމަލުކުރުމުން ކަމަށެވެ.

ޕީޕީއެމް-އެމްޑީގެ ފަރާތުން ވާހަކަ ދެއްކެވި އެމްޑީއޭ ގެ ނާއިބު ލީޑަރު އަހުމަދު އާމިރު ވިދާޅުވީ ސޮއިކުރުމަށް އިލެކްޝަނުން ބުނެގެން ރޭ ދަންވަރު އިލެކްޝަންސް ކޮމިޝަނުން ބުނި ގަޑިއަށް އެތަނަށް ވަޑައިގެންނެވި ކަމަށެވެ. ނަމަވެސް އޭރުވެސް ލިސްޓްތައް ނިމިފައި ނުވާ ކަމަށެވެ.

އިލެކްޝަންސް ކޮމިޝަނުގެ ރައީސް ފުވާދު ތައުފީގު ވިދާޅުވީ ގާސިމް އިބްރާހީމާއި، އަބްދުﷲ ޔާމީނުގެ ފަރާތުން ވޯޓާސް ލިސްޓުގައި ސޮއިކުރައްވާނެ މީހަކު އިލެކްޝަންސް ކޮމިޝަނަށް ވަޑައިނުގަންނަވާތީ އެބޭފުޅުންގެ ގެއަށްވެސް މީހުން ފޮނުއްވި ކަމަށެވެ. އަދި ފޯނު ކުރެއްވުމުން އެބޭފުޅުންނަށް ޖަވާބުވެސް ނުދެއްވާ ކަމަށް ވިދާޅުވިއެވެ.

މިކަމާ ބެހޭ ގޮތުން އެދެބޭފުޅުންގެ ފަރާތުން ވިދާޅުވެފައިވަނީ އިންސާނުން ރޭގަނޑު ނިދަންވެސް ވާނެ ކަމަށެވެ. "މަހަށްދާން ގޮވާ އުސޫލުން" ދަންވަރު މީހުން ނިދާފައި ތިބޭއިރު ދޮރުގައި ޓަކިޖަހައި ހެދުމަކީ އެއްވެސް އުސޫލެއް ނޫން ކަމަށްވެސް އެބޭފުޅުންގެ ފަރާތުން ވިދާޅުވެފައިވެއެވެ. ގާސިމް ގެ ފަރާތުން ވާހަކަ ދައްކަވާ ފައިވަނީ ތަރުޖަމާނު އިބްރާހީމް ޚަލީލާއި، ކެންޕޭން މެނޭޖަރު މުހައްމަދު ސައީދެވެ. ޔާމީނުގެ ފަރާތުން ވާހަކަ ދެއްކެވީ އެމްޑީއޭގެ ނާއިބު ލީޑަރު އަހުމަދު އާމިރާއި، ވައިކަރަދޫ ދާއިރާގެ މެންބަރު އަލީ އާރިފެވެ.

މާދަމާ އިންތިޚާބު ބޭއްވުމަށް ލަންޑަނަށާއި އަދިވެސް ބައެއް ގައުމުތަކަށް އޮފިޝަލުން ވަނީ ފުރުވާފައެވެ. ނަމަވެސް މާދަން ވޯޓުލެވޭނެތޯ ނޫންތޯ އަދި ޔަގީންވެފައެއް ނުވެއެވެ.

ވޯޓާސް ލިސްޓް ގައުމުތަކަށާއި ރަށްރަށަށް ފޮނުވާނީ ހުރިހާ ކެންޑިޑޭޓުން އޭގައި ސޮއި ކުރެއްވުމުން ކަމަށް އިލެކްޝަންސް ކޮމިޝަނުން ވަނީ ބުނެފައެވެ.