ދިވެހި ރައްޔިތުން އަމާޒުހިފައިގެން ތިބީ ރަންރީނދޫ ފަހަރަކަށް: ރައީސް ނަޝީދު

ދިވެހިރާއްޖޭގެ ރައްޔިތުން މިހާރު އަމާޒުހިފާފައިވަނީ "ރަންރީނދޫ ފަހަރަކަށް" ކަމަށް އެމްޑީޕީގެ ރިޔާސީ ކެންޑިޑޭޓް އަދި ރާއްޖޭގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީން "އެއްބުރުން" ކެންޕޭން އަލުން ފެށުމަށްޓަކައި ރޭ ބޭއްވި ޖަލްސާގައި ވާހަކަ ދައްކަވަމުން ރަންރީނދޫ ފަރަހަރަކަށް ރައްޔިތުން ބޭނުންވާ ކަންހާމަވަނީ ފާއިތުވި މުއްދަތުގައި އެމްޑީޕީން ރައްޔިތުންށް ދީފައިވާ ވޯޓުން ކަމަށް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ 2008 ވަނަ އަހަރު 44000 ވޯޓު އެމްޑީޕީއަށް ލިބިފައިވާ ކަމަށެވެ. އަދި 2009 ވަނަ އަހަރު 55000 ވޯޓު ލިބުނު ކަމަށެވެ. އަދި 2011 ވަނަ އަހަރު 67000 ވޯޓު ރައްޔިން ދީފައިވާ ކަމަށެވެ. އަދި މިއަހަރު (2013 ވަނަ އަހަރު) ވަނީ 95000 ރައްޔިތުން އެމްޑީޕީއަށް ވޯޓު ދީފައިވާ ކަމަށެވެ. މިއިން ދޭހަކޮށްދެނީ ރަންރީނދޫ ފަހަރަކަށް މިފަހަރު ހެދުން ކަމަށް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ރާއްޖޭގެ ތަބިއްޔަތު މިހާރު މިސްރާބު ހިފާފައިވަނީ ރާއްޖެ ބަދަލުކޮށް، ޑިމޮކްރެސީ އާއި ދިމާއަށް ކަމަށެވެ. މިކަން ބަދަލުކޮށްލެވޭނެ އިތުރު އެއްވެސް ފަރާތެއް ނާންނާނެ ކަމަށްވެސް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނުގެ ސިޔާސީ ވާދަވެރިން ބޭނުންވަނީ އެމަނިކުފާނު ދިގު މުއްދަތަކަށް ޖަލަށް ލުމަށް ކަމަށެވެ. އަދި ސިޔާސީ ވާދަވެރިން ހައްޔަރުކުރަން ކަމަށެވެ. މީގެ އިތުރަށް ރިޔާސީ އިންތިޚާބު މުއްދަތެއް ނެތްގޮތަށް ފަސްކުރުމަކީވެސް އެބޭފުޅުންގެ ބޭނުމެއް ކަމަށް ވިދާޅުވިއެވެ. އެފަދަ ފަރާތްތަކުން ބޭނުންވަނީ ސިފައިންނާއި ފުލުހުންނަށް ވެރިކަން ހަވާލު ކުރަން ކަމަށްވެސް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ މިފަދަ ބޭފުޅުން ރާއްޖޭގައި ޑިމޮކްރެޓިކް ނިޒާމް ގާއިމު ކުރަން ބޭނުން ނުވާކަމަށެވެ. އަދި ރައްޔިތުންނަށް ވޯޓު ދިނުމުގެ ހައްގު ލިބުމަށްވެސް އެބޭފުޅުން އެދިވަޑައި ނުގަންނަވާ ކަމަށެވެ. މިފަދަ ބޭފުޅުން އަބަދުވެސް ބޭނުންވަނީ ރާއްޖޭގައި ޚުދުމުޚުތާރު ވެރިކަމެއް ފައްކާ ކުރަން ކަމަށްވެސް ވިދާޅުވިއެވެ.

ރޭގެ ޖަލްސާގައި ނަޝީދު ވިދާޅުވީ އެމްޑީޕީ މަސައްކަތް ކުރަނީ އަދި މަސައްކަތް ކުރައްވާނީވެސް ރާއްޖެ ތަރައްގީ ކުރުމަށް ކަމަށެވެ. އަދި މިހާރު ލިބޭ އެއްޗަކަށް ވުރެ ބޮޑު އެއްޗެއް ރައްޔިތުންނަށް ހޯދައި ދިނުމަށް ކަމަށެވެ.

ވަޒީރުންގެ މަޖިލީސް "ބަހައިލުމަށް" ބޭނުންފުޅު ނުވާކަމަށް އެމަނިކުފާނު ވިދާޅުވާ ވިދާޅުވުން ރޭވެސް ތަކުރާރު ކުރެއްވިއެވެ. "އެއްބުން" އިންތިޚާބު ކާމިޔާބު ކުރައްވަން މަސައްކަތް ކުރައްވަނީވެސް އެކަން އެގޮތަށް ނުކުރައްވަން ކަމަށްވެސް ވިދާޅުވިއެވެ. އެއްވެސް ބަޔަކާ މިފަހަރު އިއްތިހާދު ނުވީވެސް "ވަޒީރުންގެ މަޖިލީސް ބަހައިލައިގެން ވެރިކަން ކުރުމަށް ބޭނުންނުވާތީ" ކަމަށްވެސް ވިދާޅުވިއެވެ.