ފަސްމިލިއަން ފަތުރުވެރިން އަންނާނެހެން އެއާޕޯޓުތައް ތަރައްގީ ކުރާނަން-ރައީސް ނަޝީދު
18 ސެޕްޓެމްބަރ 2013 4:56
އެމްޑީޕީގެ ސިޔާސަތަކީ ރާއްޖެއަށް އަހަރަކު އެއް މިލިއަން ފަތުރުވެރިން ގެނައުމުގެ ބަދަލުގައި އަހަރަކު ފަސްމިލިއަން ފަތުރުވެރިން އަންނާނޭ ގޮތަށް އެއާޕޯޓުތައް ތަރައްގީ ކުރުން ކަމަށް އެޕާޓީގެ ރިޔާސީ ކެންޑިޑޭޓް ރައީސް ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ކާމިނީ މަގުގައި ރޭ ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަވަމުން ނެވެ.
ރައީސް ނަޝީދު ވިދާޅުވީ ރާއްޖެއަށް އެންމެ ބޮޑު އާމްދަނީއެއްވެސް ލިބެނީ ފަތުރުވެރިކަމުގެ ވިޔަފާރިން ކަމަށެވެ. އެހެން ކަމުން އެމްޑީޕީގެ ވެރިކަމެއްގައި ފަތުރުވެރިކަން އިތުރަށް ތަރައްގީ ކުރުމަށް މަސައްކަތް ކުރައްވާނެ ކަމަށް ވިދާޅުވިއެވެ. މިހާރުވެސް އެމަނިކުފާނު ގެންދަވަނީ ގެސްޓްހައުސްގެ ފިޔަފާރި އާލާކޮށް ފުޅާ ކުރުމަށް ކެންޕޭން ކުރައްވަމުންނެވެ.
މިބައްދަލުވުމުގައި އެމަނިކުފާނު ވިދާޅުވީ އެމްޑީޕީގެ ވެރިކަމެއްގައި އަދިވެސް "ވެށިފަހިމާލެ" ޕްރޮގްރާމެއް ފަށްޓަވާނެ ކަމަށެވެ. އެއީ ކުރިއެކޭ އެގޮތަށް މާލޭ ތޮއްޖެހުން ނައްތާލުމަށް ނުވަތަ ކުޑަ ކުރުމަށް ފަށާ ކަމެއް ކަމަށެވެ. އެކަން ކުރުމަށް 800 މިލިއަން ޑޮލަރު ހޭދަކުރައްވާނެ ކަމަށްވެސް ވިދާޅުވިއެވެ. އެކަން ކުރައްވާނީ ޕަބްލިކް ޕްރައިވެޓް ޕާޓްނާޝިޕްގެ ދަށުން ކަމަށްވެސް ވިދާޅުވިއެވެ.
މާލެއަށް ދިމާވެފައިވާ ތޮއްޖެހުމުގެ މައްސަލަ ހައްލު ކުރުމުގެ ގޮތުން މާލޭގެ އިތުރަށް ވިލިގިއްޔާއި، ހުޅުމާލޭގައި އިތުރު ހައުސިން ޔުނިޓުތައް އަޅުއްވައި ދެއްވާނެ ކަމަށްވެސް ރައީސް ނަޝީދު ވިދާޅުވިއެވެ.
ކިޔުންތެރިންގެ ހިޔާލު