ހައްގު ލިބިފައި ނުވާ ބަޔަކު ވޯޓުދިންތޯ އެއީ ބަލަންޖެހޭ ހަގީގަތެއް- ރައީސް ނަޝީދު

މިމަހުގެ 7 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގެ ފުރަތަމަ ބުރުގައި ވޯޓު ލުމުގެ ހައްގު ލިބިފައި ނުވާ މީހުން ވޯޓު ދީފައި އޮތްތޯ އެއީ ބަލަންޖެހޭ ހަގީގަތެއް ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް މުހައްމަދު ނަޝީދު ވިދާޅު ވެއްޖެއެވެ.

އެމަނިކުފާނު މިހެން ވިދާޅުވީ އިންތިޚާބުގެ ފުރަތަމަ ބުރު ބާތިލް ކޮށްދިނުމަށް އެދި ޖުމްހޫރީ ޕާޓީން ސުޕްރީމް ކޯޓަށް ހުށަހަޅާފައިވާ މައްސަލައާ ގުޅިގެން ދަރުބާރުގޭގައި މިއަދު ބޭއްވި އެމްޑީޕީގެ ގައުމީ މަޖިލީހުގެ ކުއްލި ޖަލްސާގައެވެ.

ރައީސް ނަޝީދު ވިދާޅުވީ ރިޔާސީ އިންތިޚާބުގެ ފުރަތަަމަ ބުރުގެ ކަންކަން ދިޔައީ ރަނގަޅަށްތޯ އެއީ ޖުމްހޫރީޕާޓީގެ އިތުރަށް އެންމެންނަށްވެސް އެނގެން ޖެހޭ ކަމެއް ކަމަށެވެ. ނަމަވެސް ޖުމްހޫރީޕާޓީން އެދިފައިވާ ގޮތަށް އިންތިހާބު ބާތިލް ކުރަން ޖެހޭ އެއްވެސް ސަބަބެއް އޮތް ކަމަށް ދެކިވަޑައި ނުގަންނަވާ ކަމަށް އެމަނިކުފާނު ވިދާޅުވިއެވެ. "އެފަރަގު (ޖޭޕީއާއި ޕީޕީއެމްއާ ދެމެދު އޮތް ފަރަގު) އެއީ ކަށަވަރު ފަރަގެއްތޯ ބަލައި ގަތުމަށް ކުރަން ޖެހޭ ވަކި ޚާއްސަ ކަންތައް ތަކެއް ހުރޭ. ފުރަތަމަ ކަމަކަށް ވޯޓު ހައްގުވާ މީހުންގެ ރަޖިސްޓްރީގައި ވޯޓު ހައްގު ނުވާ އެއްވެސް މީހަކު ހިމެނިފާ ވޭތޯ ނުވަތަ ނުވޭތޯ އެއެއް އަޅުގަނޑުމެން ދެނެގަންނަން ޖެހޭ." އެމަނިކުފާނު ވިދާޅުވިއެވެ.

ނަޝީދު ވިދާޅުވީ ވޯޓު ހައްގުވާ މީހުންގެ ރަޖިސްޓްރީ އިލެކްޝަންސް ކޮމިޝަނުން އިއުލާން ކުރެއްވި ކަމަށެވެ. އަދި ވޯޓު ހައްގުނުވާ މީހުންގެ ނަންތައް އެލިސްޓުގައި ހިމެނިފައިވޭތޯ ބެލުމުގެ ފުރުސަތު ދެއްވި ކަމަށެވެ. "އެމްޑީޕީން ފާހަގަ ކުރި އަޅުގަނޑު ހަނދާންވާ ގޮތުގައި އަށްސަތޭކައެއްހާ މީހުން ވޯޓު ހައްގުނުވާ މީހުން އެލިސްޓުގައި ހިމެނިފައިވާތީވެ އެއީ އުމުރު ހަމަނުވެގެން، ދުނިޔޭގައި ނެތިގެން ނުވަތަ އެއް އައިޑީކާޑު ނަންބަރެއް ދެފަހަރުގައި ޖެހިގެން،" ނަޝީދު ވިދާޅުވިއެވެ.

"ވޯޓު ހައްގުވާ ލިސްޓުގައި ޖުމްހޫރީ ޕާޓީއާއި، ޕީޕީއެމް އާ ދެމެދުގައި އެހުރި ވޯޓުގެ ތަފާތު (ފަރަގާ) އެއްވަރަށް ވޯޓު ހައްގުވާ ލިސްޓުގައި ވޯޓު ހައްގުނުވާ މީހުން ހިމެނިފައިވޭތޯ،" ބަލަން ޖެހޭ ކަމަށްވެސް ވިދާޅުވިއެވެ. "ހަމަ ގައިމު ވެސް އަޅުގަނޑުމެންނަކަށް ފާހަގައެއް ނުވި ދެހާސް ތިންސަތޭކަ މީހުން ކުށްކޮށް ވޯޓް ހައްގުވާ ލިސްޓުގައި ހިމެނިފައި އޮތް ކަމަކަށް،"

ޖުމްހޫރީ ޕާޓީން މިމައްސަލަ ކޯޓަށް ނުވަތަ އިލެކްޝަންސް ކޮމިޝަނަށް ހުށަހެޅުމުން ދެން ބަލަންޖެހެނީ ވޯޓުދިން މީހުންގެ ލިސްޓް ކަމަށްވެސް ނަޝީދު ވިދަޅުވިއެވެ. "އަޅުގަނޑަށް ޔަގީން ކަށަވަރު އަޅުގަނޑަށް ފެންނަފެނުމުގައި އެބާވަތުގެ ކަމެއް މިއިންތިހާބުގައި ހިނގާފައެއްނެތް،" އެމަނިކުފާނު ވިދާޅުވިއެވެ. ޖުމްހޫރީ ޕާޓީން އެބުނާ ވަރަށް ވޯޓު ދީފައިވޭތޯ އިލެކްޝަންސް ކޮމިޝަނުން ބެލެން އެބައޮތް ކަމަށްވެސް އެމަނިކުފާނު ވިދާޅުވިއެވެ. އެހެން ކަމުން މިކަމުގައި އެއްވެސް މައްސަލައެއް ނެތް ކަމަށްވެސް ވިދާޅުވިއެވެ. "އަޅުގަނޑުމެން ވަރަށް ރަނގަޅަށް ބަލައިގެން މިތިބީ ވޯޓުގެ ކަންކަން މިއޮތީ ވަރަށް ރަނގަޅަށް ކަމަށް،" ނަޝީދު ވިދާޅުވިއެވެ.

ރިޔާސީ އިންތިހާބުގެ ފުރަތަމަ ބުރުގެ ނަތީޖާ ބާތިލްކޮށް އަލުން ވޯޓު ނެގުމަށް އަމުރަކަށް އެދި ޖުމްހޫރީ ޕާޓީން ސުޕްރީމް ކޯޓަށް ހުށަހަޅާފައިވާ މައްސަލައިގެ ތެރެއަށް ދައުލަތުގެ ބަންޑާރަނާއިބު އާޒިމާ ޝަކޫރު ތަދައްޚުލްވެ ޖޭޕީއާ އެއްކޮޅަށް ވަކާލާތު ކުރައްވާތީ އެކަމަނާގެ ތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ހުށަހަޅަން ނިންމާފައިވާ ކަމަށް ދިއްދޫ ދާއިރާގެ މެންބަރު އަހުމަދު ސަމީރު މިއަދުގެ ޖަލްސާއިން ވަނީ ވިދާޅުވެފައެވެ.