ހުރުމަތްތެރި މަހުގައި "ހަނގުރާމަ" ނުކުރުމަށް ރައީސް ނަޝީދު އެދިވަޑައިގެންފި

މިހިނގާ ޒުގައިދާ މަހަކީ ހުރުމަތްތެރި ވެގެންވާ ހަތަރު މަހުގެ ތެރެއިން މަހަކަށްވާތީ އެމަހުގައި "ހަނގުރާމަ" ނުކުރުމަށް އެމްޑީޕީގެ ރިޔާސީ ކެންޑިޑޭޓް ރައީސް މުހައްމަދު ނަޝީދު އަދާލަތު ޕާޓީގެ ކިބައިން އެދި ވަޑައިގެންފިއެވެ.

އެމަނިކުފާނު މިކަމަށް އެދި ވަޑައި ގެންނެވީ ދަރުބާރުގޭގައި މިއަދު ބޭއްވި އެޕާޓީގެ ގައުމީ މަޖިލީހުގެ ކުއްލި ޖަލްސާގައި ވާހަކަފުޅު ދައްކަވަމުންނެވެ.

"އަޅުގަނޑު ވަރަށް އިޚުލާސްތެރި ކަމާއެކު އެދެން ޚާއްސަކޮށް ދިވެހިރާއްޖޭގައި އަދާލަތު ޕާޓީއާއި އަދި އެފިކުރުގެ ބައެއް ޕާޓީތަކަށް ވަރަށް އިޚުލާސްތެރި ކަމާއެކު ދަންނަވާލަން ބޭނުން މިއީ ޒުލްގައިދާ މަސް. އަޅުގަނޑުމެން މިއެދެނީ މިމަސް މިއީ އިސްލާމީ އުސޫލުތަކާ އެއްގޮތް ވާގޮތުގެ މަތިން ހުރުމަތްތެރި މަހެއްގެ ގޮތުގައި. މިމަސް ނިމެންދެން އަދާލަތު ޕާޓީން އެހުރުމަތް މިމަހަށް ދެއްވުމަށް. އަޅުގަނޑު މިދަންވާ ވާހަކައަކީ އިސްލާމީ އުސޫލުގައި މިވާގޮތަކީ ޒުލްގައިދާ މަހާއި، ޒުލްހައްޖާ މަހާއި، މުހައްރަމް މަހާއި އަދި ފަހުން ރަޖަބު މަސް މި ހަތަރު މަހަކީ ހަނގުރާމަ ކުރާ ހަތަރު މަހެއްނޫން. އަޅުގަނޑުމެން މިއެދެނީ އަދާލަތު ޕާޓީއަށް މިމަސް ނިމެންދެން ހަނގުރާމަ ނުކުރެއްވުމަށް،" ނަޝީދު ވިދާޅުވިއެވެ.

ނަޝީދު ވިދާޅުވީ މިމަސް ނިމެންދެން އެމްޑީޕީންވެސް އެއްވެސް ޕާޓީއަކަށް އެއްޗެއް ނުބުނެ ތިއްބަވާނެ ކަމަށެވެ. "މިމަސް ނިމެންދެން އަޅުގަނޑުމެންވެސް އަދާލަތު ޕާޓީއާ އަދި އެހެންވެސް ޕާޓީއަކާ ގުޅޭގޮތުންވެސް އެއްޗެއް ނުބުނެ ތިބުމަށް،" އެމަނިކުފާނު ވިދާޅުވިއެވެ.

ރާއްޖޭގައި ތިބި އަދާލަތު ޕާޓީގެ ފިކުރަށް ތާއިދު ކުރާމީހުންވެސް މިމަސްތަކަށް ހުރުމަތް ތެރިކޮށް ހިއްތެވުމަށް އެމަނިކުފާނު އެދި ވަޑައިގެން ނެވިއެވެ. "ރާއްޖޭގެ އަދާލަތު ޕާޓީގެ ފިކުރަށް ތާއިދު ކުރައްވާ ހުރިހާ ބޭފުޅުންގެ ކިބައިންވެސް މިއެދެނީ މިމަސް ހުރުމަތްތެރިކޮށް ހިއްތަވައި ދެއްވުމަށް. މީހަކު ހަމަލާ ނުދޭހާ ހިނދަކު ދެން މުހައްރަމް މަހުގެ ކުރީގައި ހަމަލާ ދިނުމަކީ އަޅުގަނޑު ދެކޭ ގޮތުގައި އިސްލާމީ އުސޫލެއްނޫން. އަޅުގަނޑު ވަރަށް އިޚުލާސްތެރި ކަމާއެކީގައި އަދާލަތު ޕާޓީއަށް މިދަންނަވާހެން އެދެން،" ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނުގެ މިހުށަހެޅުއްވުމަށް އެ ހުރީހާ ބޭފުޅުންވެސް އިޖާބަ ދެއްވާނެ ކަމަށް ގަބޫލު ކުރައްވާ ކަމަށެވެ.

އަދާލަތު ޕާޓީގެ އިސްތަރުޖަމާނު ޑރ. މުހައްމަދު ޝަހީމް އަލީ ސައީދަށް މިވާހަކަ ދެންނެވުމަށް އެމަނިކުފާނަށް އެސްއެމްއެސް އެއް ކުރެއްވި ކަމަށްވެސް އިއްޔެގެ ބައްދަލުވުމުގައި ވިދާޅުވިއެވެ.

"އަޅުގަނޑު މިއަދު އަދާލަތު ޕާޓީގެ އެއްލީޑަރ ޝަހީމަށް ފޯނުން ޓެކްސްޓެއް ފޮނުވިން އެބޭފުޅާއާ އަޅުގަނޑު ބައްދަލު ކޮށްލުމަށް އެދޭ ވާހަކަ ދަންނަވަން. އަޅުގަނޑު އެބޭފުޅާ އާ ބައްދަލު ކުރުމަށް މިއެދެނީ މިދެންނެވި ދެންނެވުމުން ހުށަހެޅުމަށްޓަކާ،" ނަޝީދު ވިދާޅުވިއެވެ.