ވަގުތު ޖެހޭއިރު ވެރިއަކު އިންތިޚާބު ކުރެވިފައި ނެތްކަމަށް ވާނަމަ ނަޝީދާ ވެރިކަން ހަވާލު ކުރަންޖެހޭ- އެމްޑީޕީ

ނޮވެމްބަރު 11 2013 އަންނަ އިރު ރާއްޖޭގައި ވެރިއަކު އިންތިޚާބު ކުރެވިފައިނެތް ކަމަށްވާނަމަ އެމްޑީޕީގެ ރިޔާސީ ކެންޑިޑޭޓް ރައީސް ނަޝީދުގެ ސަރުކާރެއް އެކުލަވާލުމަށް ކުރަން ޖެހޭ މަސައްކަތް ފެށުމުގެ ގަރާނެއް އެމްޑީޕީގެ ގައުމީ މަޖިލީހުން މިއަދު ނިންމައިފިއެވެ.

އެޕާޓީގެ ޤައުމީ މަޖިލީހުގެ 119 ވަނަ ޖަލްސާއަށް ހާޒިރުވި 78 މެންބަރުންގެ އަޣްލަބިއްޔަތުން މިގަރާރު ފާސްކުރައްވާފައިވަނީ ރާއްޖޭގެ މިހާރުގެ ހަލާތާ ބެހޭގޮތުން މަޝްވަރާ ކުރެއްވުމަށްފަހު ގައެވެ.

ނޮވެމްބަރު 11 އަންނައިރު ވެރިކަމަށް މީހަކު އިންތިޚާބު ނުކުރެވިއްޖެ ކަމަށްވާނަމަ ރައީސް ނަޝީދުގެ ސަރުކާރެއް އެކުލަވާ ލުމަށް ގަރާރެއް ފާސްކުރެއްވީ އެމަނިކުފާނަކީ ރިޔާސީ އިންތިޚާބުގެ ފުރަތަމަ ބުރުގައި އެންމެގިނަ ވޯޓު ލިބިވަޑައިގެންނެވި ކެންޑިޑޭޓަށް ވާތީއެވެ. " ރައްޔިތުން އިންތިޚާބުކުރާ ރައީސުލްޖުމްހޫރިއްޔާއަކު 11 ނޮވެމްބަރ 2013 ގައިނެތްނަމަ، 7 ސެޕްޓެމްބަރ 2013 ގައި ބޭއްވުނު ރިޔާސީ އިންތިޚާބުގެ ފުރަތަމަ ބުރުގެ ނަތީޖާއަށް ބަލައި، ރައްޔިތުންގެ އެންމެ ބޮޑު ތާޢީދެއް ލިބި ރައްޔިތުން ތަމްސީލްކުރަން އެންމެ އެކަށޭނެ ފަރާތަކީ ދިވެހިރައްޔިތުންގެ ޑިމޮކްރެޓިކް ޕާޓީގެ ރިޔާސީ ކެންޑިޑޭޓް ރައީސް މުޙައްމަދު ނަޝީދު ކަމަށް ވާތީ، މިކަމާ ގުޅިގެން 11 ނޮވެމްބަރު 2013 ގެ ކުރިން ރައީސް މުޙައްމަދު ނަޝީދުގެ ސަރުކާރެއް އުފެއްދުމަށް ކުރަންޖެހޭ މަސައްކަތްކުރުން،" އެގަރާރުގައި ވެއެވެ.

އެމްޑީޕީގެ ގައުމީ މަޖިލީހުން ބުނެފައިވަނީ ރައްޔިތުންނަށް ލިބިފައިވާ ވޯޓުލުމުގެ ޙައްޤު އަނބުރައި ރައްޔިތުންނަށް ހޯދައި ދިނުމަށްޓަކައި ކަންތައްތަކެއް ކުރަން ޖެހޭކަމަށެވެ. އެގޮތުން އެޕާޓީން ރިޔާސީ އިންތިޚާބުގެ 2 ވަނަ ބުރަށް ތައްޔާރު ވުމުގެ ގޮތުން ކެމްޕޭން ހަރަކާތްތައް ކުރިއަށް ގެންދިއުމާއި، މާލެއާއި އަތޮޅުތަކުގައި ކުރިއަށް ގެންދާ އެމްޑީޕީގެ ރިޔާސީ އިންތިޚާބުގެ ކެމްޕޭނުގެ އެންމެހައި ކަންކަން ފެއްޓުމަށް އެމްޑީޕީގެ ހަރުގެތަކާއި ޖަގަހަތަކުގައި މަސައްކަތް ކުރިއަށް ގެންދިއުން ހިމެނެއެވެ. މީގެ އިތުރަށްކޮންމެ ރަށެއްގައިވެސް ދޮރުން ދޮރަށް ހިނގައި ރައްޔިތުންގެ ޙާލު އޮޅުންފިލުވައި އެމްޑީޕީގެ ސަރުކާރުގައި ތަންފީޒުކުރާނެ ސިޔާސަތުތައް ރައްޔިތުންނަށް އޮޅުންފިލުވައިދިނުމާއި، މިކަމާ ގުޅިގެން ރާއްޖޭގެ ހުރިހާ ރަށްތަކަށް އެމްޑީޕީގެ ކެމްޕޭން ޙަރަކާތްތެރިންގެ ދަތުރުތައް ފެށުމާއި، ރައްޔިތުން އިންތިޚާބުކުރާ ސަރުކާރެއް އުފެއްދުމަށް ރިޔާސީ އިންތިޚާބުގެ 2 ވަނަ ބުރުގެ ތާރީޚަކަށް އެދި މިހާރު ކުރިއަށް ގެންދާ ސުލްޙަވެރި އިހްތިޖާޖުތައް ކުރިއަށް ގެންދިއުމާއި، "ރައްޔިތުންގެ ވެރިކަމެއް އުފެއްދުމަށް” ގޮވާލާ ބޮޑުމުޒާހަރާއަކަށް ގޮވާާލައި، އެ އިހްތިޖާޖު ކުރުމާއި،މާލެއާއި ރާއްޖޭގެ ރަށްތަކުގައި ކޮންމެ ދުވަހުކު ސުލްޙަވެރި ސިޔާސީ ޙަރަކާތް ކުރިއަށް ގެންދިއުމެވެ. އަދި މަދަނީ ބަސްނޭހުމަކަށް ދިޔުމަށް ވެސް ނިންމާފައިވެއެވެ.މީގެ އިތުރަށް ބައިނަލްއަޤްވާމީ މުޖުތުމަޢާއި މަޝްވަރާކޮށް ބާރުވެރިކަން ހޯދުންވެސް ހިމެނެއެވެ.