ސްޕްރީމްކޯޓުން އުޅެނީ ރައްޔިތުންގެ ހައްގުތައް ނިގުޅައިގަންނަން-އެމްޑީޕީ

ސްޕްރީމްކޯޓުން އުޅެނީ ރިޔާސީ އިންތިޚާބުގެ ފުރަތަމަ ބުރުގައި ވޯޓުލީ އެންމެންގެ ޙައްޤު އަދި ޚާއްސަކޮށް އެމްޑީޕީގެ ރިޔާސީ ކެންޑިޑޭޓަށް ތާއީދުކޮށް ވޯޓު ދިން 95000 ހަށް ވުރެ ގިނަ ރައްޔިތުންގެ ޙައްޤު ނިގުޅައިގަންނަން ކަމަށް އެމްޑީޕީގެ ޗެއާޕާސަން އަދި ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު ވިދާޅުވެއްޖެއެވެ.

މިއަދު ހަވީރު ބޭއްވާ އެއްވުމަށް ތައްޔާރުވުމާ ބެހޭ ގޮތުން ވާހަކަ ދައްކަވަމުން އޭނާ ވިދާޅުވީ ރިޔާސީ އިންތިހާބުގެ 2 ވަނަ ބުރުގެ ވޯޓް ލުން ލަސްކުރުމަށް ސުޕްރީމް ކޯޓުން ނެރުނު އަމުރު ކުށްވެރި ކުރާ ކަމަށެވެ.

އޭނާ ވިދާޅުވީ އިންތިޚާބާ ބެހޭ ގޮތުން ޖުމްހޫރީ ޕާޓީން ސްޕްރީމް ކޯޓަށް ހުށަހަޅާފައިވާ މައްސަލަ ނިމި އިންސާފު ޤާއިމު ވަންދެން އިހްތިޖާޖް ކުރުންމަތީ އެމްޑީޕީ ސަޕޯޓަރުން ދެމިތިބުމަށެވެ.

އޭނާ މިހެން ވިދާޅުވިއިރު އެޕާޓީގެ ގައުމީމަޖިލީހުން ރޭ ނިންމާފައިވަނީ ސުޕްރީމް ކޯޓުން ނެރުނު އަމުރު ކުށްވެރިކޮށް، ކޯޓުގެ މައްސަލަ ނިމެންދެން މަގުމައްޗަށް ނިކުމެ އިހުތިޖާޖް ކުރުމަށް ގަރާރެއްވެސް ފާސްކޮށްފައެވެ. "އެހެންކަމާއިއެކު މިއަދު 5ޖަހާއިރު މި ފަށާ އިތިޖާޖްތައް ރައްޔިތުންނަށް މިކަމުގައި އިންސާފު ލިބެންދެން ހުއްޓާ ނުލާ ކުރިއަށް ގެންދާގޮތަށް ވަނީ ނިންމާފައިކަމުގައިވެސް ޗެއަރޕާސަން ވިދާޅުވި" ކަމަށް އެމްޑީޕީގެ ވެބްސައިޓުގައި ބުނެފައިވެއެވެ.