އިންތިޚާބުގެ ދެވަނަބުރު ހޮނިހިރު ދުވަހު ބޭއްވުމަށް އެމްޑީޕީން ހުށަހެޅި ގަރާރު ފާސްކޮށްފި
23 ސެޕްޓެމްބަރ 2013 22:55
ރިޔާސީ އިންތިޚާބުގެ ދެވަނަބުރު އެއްވެސް ވަރަކަށް ފަސް ކުރުމެއްނެތި ކުރިން ވެސް ހަމަޖެހިފައިވާ ތާރީޚުގައި (28 ސެޕްޓެމްބަރ) ބޭއްވުމަށް އެދި އެމްޑީޕީއިން ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅި ގަރާރު ފާސްކޮށްފިއެވެ.
ރައްޔިތުންގެ މަޖިލީހުގެ ތޮއްޑޫދާއިރާގެ މެންބަރު އަދި އެމްޑީޕީގެ ޕަރލިމެންޓްރީ ގްރޫޕްގެ ޑެޕިއުޓީ ލީޑަރ އަލީ ވަހީދު ހުށަހަޅުއްވައި މައްޗަން ގޮޅީ އުތުރު ދާއިރާގެ މެންބަރު މާރިޔާ އަހުމަދު ދީދީ ތާއިދު ކުރެއްވި މިގަރާރު ފާސްކުރައްވާފައިވަނީ ވޯޓުގައި ބައިވެރިވެ ވަޑައިގެންނެވި 37 މެންބަރުންގެ އިއްތިފާގުންނެވެ.
އެމްޑީޕީން މަޖިލީހަށް މިގަރާރު ހުށަހެޅީ އިންތިޚާބުގެ ފުރަތަމަބުރުގެ ނަތީޖާ ބާތިލްކޮށް އަލުން އިންތިޚާބު ބާއްވައި ދިނުމަށް އެދި ޖުމްހޫރީޕާޓީން ސުޕްރީމް ކޯޓަށް މައްސަލަ ހުށައަޅައި އެމައްސަލަ ކޯޓުގައި ބަލަމުން ދަނިކޮށްނެވެ.
ދިވެހިރާއްޖޭގެ ގާނޫނު އަސާސީއިން ދިވެހި ދައުލަތުގެ އެންމެހާ ބާރުތައް ފެށިގެން އަންނަނީވެސް އަދި ދެމި އޮންނާނީވެސް ރައްޔިތުންގެ ކިބައިން ކަމަށް މިގަރާރުގައިވަނީ ބުނެފައެވެ. އަދި ގާނޫނު އަސާސީ އާއި ޤާނޫނުތަކުގެ ދަށުން ދިވެހިރާއްޖޭގައި ބާއްވާ އިންތިޚާބުތަކަކީ ދިމުގްރާތީ އަސާސްތަކުގެ މައްޗަށް ބިނާކޮށް ސީދާ ރައްޔިތުންގެ ބައިވެރިވުން އޮންނަ، މިނިވަން، އިންސާފްވެރި، ހާމަކަންބޮޑު އިންތިޚާބަކަށް ވާންޖެހޭނެކަމަށް ލާޒިމްކުރާ ކަމަށެވެ.
ނަމަވެސް ރިޔާސީ އިންތިޚާބުގެ ފުރަތަމަބުރުގެ ކަންކަން ނިމިގެންދިޔައީ ރަނގަޅަށް ކަމަށް ބޭރު ގައުމުތަކުންނާއި، ބައިނަލްއަޤްވާމީ ޖަމާއަތްތަކާއި، ރާއްޖޭގެ ޖަމާއަތްތަކުންނާއި، ސިޔާސީ ޕާޓީތަކުންނާއި، ނޫސްވެރިން މޮނީޓަރކޮށް، އަދި އޮބްޒާވްކުރި އެއްވެސް ފަރާތަކުން އިންތިޚާބުގައި ކަންބޮޑުވާންޖެހޭ އެއްވެސް ޝަކުވާއެއް ފާހަގަކޮށްފައިނުވާ ކަމަށްވެސް އެގަރާރުގައި ވެއެއެވެ.
އިންތިޚާބުގެ ފުރަތަމަ ބުރަކީ، މިނިވަން، އިންސާފްވެރި އަދި ހާމަކަންބޮޑު ގޮތެއްގައި އިލެކްޝަންސް ކޮމިޝަނުން ފުރިހަމައަށް ތައްޔާރުވެގެން ބޭއްވި އިންތިޚާބެއް ކަމަށްވެސް ބުނެފައިވެއެވެ. އަދި އެއީ ވަކި ފަރާތަކަށް ބުރަވުމެއްނެތި އަމާން މާހައުލެއްގައި ކުރިއަށް ގެންދެދިޔަ އިންތިޚާބެއް ކަމަށް އެގަރާރުގައި ބުނެފައިވެއެވެ. "ގާނޫނު އަސާސީއިން ކަށަވަރުކޮށްދީފައިވާ ދިވެހިން އެދޭ ވެރިކަމެއް ޚިޔާރުކުރުމުގެ އަސާސީ ހައްގުގެ ބޭނުން ހިފައި، ސީދާ ރައްޔިތުންގެ ބައިވެރިވުން އޮވެ ނިންމައިފައިވާ ނިންމުމެއް، އެއްވެސް ފަރާތަކުން ނުވަތަ އެއްވެސް މުއައްސަސާއަކުން ނުވަތަ އެއްވެސް މަރުޙަލާއަކުން ބަދަލުކުރެވިދާނެކަމަށް ރައްޔިތުން އިންތިޚާބުކޮށްފައިވާ ރައްޔިތުންގެ މަންދޫބުންގެ މަޖިލީހުން ގަބޫލުނުކުރައްވާ" ކަމަށްވެސް ބުނެފައިވެއެވެ. ގާނޫނު އަސާސީގައި ކަނޑައެޅިގެން ވަކި ތާރީޚުތަކެއްގެ ކުރިން ނިންމަންޖެހޭނެކަމަށް ބުނެފައިވާ ކަންތައްތައް ގާނޫނު އަސާސީގައި ބުނެފައިވާ ގޮތަށް ނިންމުމަށްޓަކައި ކުރަންޖެހޭ ކަންތައްތައް ކުރުމަކީ ދައުލަތުގެ އެންމެހާ މުއައްސަސާތަކުގެ މައްޗަށް ގާނޫނު އަސާސީއިން ލާޒިމް ވެގެންވާ ކަމެއް ކަމަށްވެސް އެގަރާރުގައި ބުނެފައިވެއެވެ. އެހެން ކަމުން ދެވަނަބުރުގެ އިންތިޚާބު ބޭއްވުމަށް އެއްވެސް ހުރަހެއް އެއްވެސް ފަރާތަކުން ކުރިމަތިނުކުރުމަށާއި، ރިޔާސީ އިންތިޚާބުގެ ދެވަނަ ބުރު އެއްވެސް ސަބަބަކާހުރެ ލަސްނުކުރުމަށްވެސް އެގަރާރުގައި ބުނެފައިވެއެވެ.
މިގަރާރު ފާސްކުރުމުން އެމްޑީޕީއާ އިދިކޮޅު ބައެއް މެންބަރުންވަނީ އެގަރާރު ފާސްކޮށްފައިވަނީ ރަނަގަޅަށް ނޫންކަމަށް ބުނެފައެވެ.
ކިޔުންތެރިންގެ ހިޔާލު