އަފްރާޝީމް އަވަހާރަ ކޮށްލުމުގައި މިޕާޓީގެ ޝާމިލް ވުމެއް ނޯންނާނެ- އެމްޑީޕީ

ޖަމްޢިއްޔަތުލް ސަލަފުން އިންތިޒާމްކޮށްގެން ދަރުބާރުގޭގައި ރޭ ބޭއްވި ދަރުސުގައި ވާހަކަ ދެއްކެވި އައްޝައިޚް އާދަމް ޝަމީމްގެ ވާހަކަފުޅުގައި ރައްޔިތުންގެ މަޖިލިހުގެ އުނގޫފާރު ދާއިރާގެ ކުރީގެ މެމްބަރު އަލްމަރުޙޫމް ޑރ. އަފްރާޝީމް ޢަލީ އަވަހާރަ ކޮށްލުމުގައި އެމްޑީޕީގެ ބައިވެރިވުމެއް އޮތް ކަމަށް ދޭހަވާ ގޮތަށް ވާހަކަ ދެއްކެވި ކަމަށް ބުނެ އެމްޑީޕީން އެކަން ކުށްވެރި ކޮށްފިއެވެ.

އެޕާޓީން މިހެން ބުނެފައިވަނީ މިއަދު ނެރެފައިވާ ނޫސްބަޔާނެއްގައެވެ. "މިފަދަ ޙައްސާސް މައްސަލައެއްގެ ޝަރީޢަތް ހިނގަމުން ދަނިކޮށް، އިންތިޚާބަށް ނުފޫޒު ފޯރުވުމުގެ މަގްސަދުގައި ރައްޔިތުންގެ މެދުގައި ނަފްރަތު އުފެއްދުމަށް ދީނީ ވައުޟު ބުނުމާއި ނަސޭޙަތް ދިނުމުގެ ކަންކަމުގައި ހަރަކާތްތެރިވާ މަދަނީ ޖަމްޢިއްޔާއެއް މަސައްކަތް ކުރަމުން އަންނަ ކަމީ މި ޕާޓީން ނުހަނު ހިތާމަކުރާ ކަމެކެވެ." އެބަޔާނުގައި ބުނެފައިވެއެވެ.

އެބަޔާނުގައި އެމްޑީޕީން ބުނެފައިވަނީ ޑރ.އަފްރާޝީމް ޢަލީ އަވަހާރަކޮށްލުމުގެ އަނިޔާވެރި ޢަމަލުގައި އެޕާޓީން އެއްވެސް މިންވަރަކަށް ޝާމިލުވެފައިނުވާނެކަން ސާބިތުކަމާއެކު ދަންނަވާ ކަމަށެވެ. "މިފަދަ ހިތާމަވެރި ޖަރީމާއެއް ދީނުގެ ނަމުގައި ސިޔާސީ ވާދަވެރިކަމުގެ ތެރޭގައި ރައްޔިތުންނަށް އޮޅުވާލުމުގެ މަސައްކަތް އެއްވެސް ފަރާތަކުން ނުކުރެއްވުމަށް މި ޕާޓީން ގޮވާލަމެވެ." އެބަޔާނުގައި ވެއެވެ.

ސަލަފު ފަދަ މަދަނީ ޖަމްޢިއްޔާއަކުން ރައްޔިތުންނަށް ޚިދުމަތްކުރުމުގެ ބަދަލުގައި ފިތުނަ އުފެދޭ ގޮތަށް އެހެން ފަރާތަކަށް ސިޔާސީ ނާޖާއިޒު ފައިދާ ލިބޭ ގޮތަށް މަސައްކަތް ކުރުމަކީ ޚިޔާލު ފާޅު ކުރުމުގެ މިނިވަންކަމާއި ތަރައްޤީއާއި ތަހުޒީބު މާޒީގެ ތެރެއަށް ފޮނުވާ ކަމެއް ކަމަށްވެސް އެބަޔާނުގައި ބުނެފައިވެއެވެ.

އެޕާޓީގެ އެންމެ މުހިންމު އެއްކަމަކީ އިސްލާމްދީން ހިމާޔަތްކޮށް ރައްކާތެރިކުރުމާއި އެހެން ދީނަކަށް ރާއްޖެއިން ޖާގައެއް ނުދިނުން ކަމަށްވެސް އެބަޔާނުގައި ބުނެފައިވެއެވެ.

ކުރިއަށް އޮތް 5 އަހަރުގައިވެސް އެމްޑީޕީން މަސައްކަތް ކުރައްވާނީ "ހާސްކަމެއްނެތި އިސްލާމްދީނުގެ މަތިވެރި އުސޫލުތަކުގެ ހުދޫދުގެ ތެރެއިން އަބުރުވެރި ތާހިރު ދިރިއުޅުމެއް ހޯދައިދޭނެ ސިޔާސަތުތަކެއް" ކަމަށްވެސް އެބަޔާނުގައި ބުނެފައިވެއެވެ. އެމްޑީޕީން ބުނެފައިވަނީ އިސްލާމްދީން ނޫން އެހެން އެއްވެސް ދީނަކަށް ރާއްޖޭގައި ފުރުޞަތެއް ނުދޭނެ ކަމުގެ ފުރިހަމަ ޔަޤީންކަން ރައްޔިތުންނަށް ދެއްވާ ކަމަށެވެ. އަދި ފުރިހަމަ މިނިވަންކަމާއެކު އިސްލާމްދީނުގެ ޝިޢާރުތައް ފާޅުކޮށް ހެޔޮލަފާ ދީނީ ނަސޭހަތް ރައްޔިތުންނަށް ފޯރުކޮށްދެވޭނެ އިންތިޒާމް ފަހިކޮށްދޭނޭ ކަމުގެ ފުރިހަމަ ޔަޤީންކަން އަރުވާ ކަމަށްވެސް ބުނެފައިވެއެވެ.