ދިހަހާސް ވޯޓު އިތުރަށް ލާފައިވާ ކަމަށް ބުނާބުނުމަކީ ދޮގެއް-ފުވާދު
8 ސެޕްޓެމްބަރ 2013 6:04
ރާއްޖޭގައި އިއްޔެ ބޭއްވި ރިޔާސީ އިންތިޚާބުގައި ވޯޓުފޮށްޓަށް އިތުރަށް 10000 ވޯޓުލާފައިވާ ކަމަށް ބުނެ ޓައިމްސްއެމްވީގައި ލިޔެފައިވާ ޚަބަރު އިލެކްޝަންސް ކޮމިޝަނުން ދޮގުކޮށްފިއެވެ.
ރޭފަތިހު އިލެކްޝަންސް ކޮމިޝަނުން ނޫސްވެރިންނަށް މައުލޫމާތު ދެއްވުމަށް ދަރުބާރުގޭގައި ބޭއްވި ބައްދަލުވުމެއްގައި އެ ކޮމިޝަނުގެ ރައީސް ފުވާދު ތައުފީގު ވިދާޅުވިއެވެ. އެވާހަކައަކީ ކަނޑައެޅިގެން ދޮގެއް ކަމަށެވެ. އެކަހަލަ ކަމެއް ކުރެވޭނެ އެއްވެސް ފުރުސަތެއް ނޯންނާނެ ކަމަށެވެ.
ފުވާދު ވިދާޅުވީ 470 ވޯޓު ފޮށި ބަހެއްޓިއިރު ކޮންމެ ފޮށްޓެއްގެ ކައިރީގައި ކޮންމެ ރިޔާސީ ކެންޑިޑޭޓުންގެ މަންދޫބުން ތިބިކަމަށެވެ. މީގެ އިތުރަށް ނޫސްވެރިންނާއި، ޓްރާންސްޕޭރެންސީ މޯލްޑިވްސްއާއި، ބޭރުގެ އޮބްޒަރވަރުން ތިބި ތަނެއްގައި އެފަދަ ކަމެއް ކުރުމަކީ ބުއްދި ގަބޫލު ކުރެވޭނެ ވާހަކައެއް ނޫންކަމަށްވެސް އޭނާ ވިދާޅުވިއެވެ. ފުވާދު ވިދާޅުވީ "ގާނޫނު ބުނާގޮތުން" ވޯޓު ކަރުދާސް ވެސް އިތުރަށް ޗާޕްކުރެވޭނީ ވޯޓުލާ މީހުންގެ އަދަދުގެ އެކެއް އިންސައްތަކަމަށެވެ. އެބައި ލައިގެންވެސް ދިހަހާސްވޯޓު އިތުރަށް ލެވިފައި ނުވާނެ ކަމަށް އޭނާ ވިދާޅުވިއެވެ. "ދުނުގައި ކަށި ނުޖެހެންޏާ ކިޔާނެ ކޮންމެ އެއްޗެއް ކިއިދާނެ،" އޭނާ ވިދާޅުވިއެވެ.
އިލެކްޝަންސް ކޮމިޝަނުގެ ނާއިބު ރައީސް އަހުމަދު ފަޔާޒު ވިދާޅުވީ އެއްވެސް ފޮށްޓަކަށް އިތުރަށް ވޯޓުލައިގެން އެއްވެސް ޝަކުވާއެއް އެކޮމިޝަނަށް ލިބިފައިނުވާ ކަމަށެވެ. އަދި އެބުނާ ދިހަހާސް ވޯޓެއް އެޅީ ކޮން ފޮށްޓަކަށްތޯވެސް އޭނާ ވަނީ ސުވާލު ކުރައްވާފައެވެ.
ކިޔުންތެރިންގެ ހިޔާލު