މާދަމާއަކީ ރައްޔިތުންގެ ބާރު ފެންނާނެ ދުވަސް

ވެރިކަން އުފެދިގެން އަންނަނީ ރައްޔިތުންގެ ކިބައިންނެވެ. ވެރިކަން ދަމަހައްޓާނީ ރައްޔިތުންނެވެ. ރާއްޖެއަށް ވެރިއަކު ހޮވަނީ ރައްޔިތުންނަށް އަދުލުވެރި ވެރިކަމެއް ކޮށްދެއްވާށެވެ. އެފަދަ އަދުލުވެރިއަކީ ކާކުތޯ ނިންމާނީ .ރައްޔިތުންނެވެ. އެފަދ މީހަކު ހޮވުމަށް ކޮންމެ 5 އަހަރުން އެއްއަހަރު ރާއްޖޭގައި ރިޔާސީ އިންތިޚާބެއް ބާއްވައެވެ

މާދަމާއަކީ ދިވެހިންގެ މައްޗަށް އަދުލުވެރިކަމާއެކު ވެރިކަން ކޮށްދެއްވާނެ ބޭފުޅަކު އިޚުތިޔާރު ކުރުމަށް ދިވެހިންނަށް ފުރުސަތު ލިބޭދުވަހެއެވެ. މާދަމާއަކީ ރައްޔިތުންގެ ބާރުވެރިކަން ދައްކާނެ ދުވަހެވެ.

ރާއްޖޭގައި މާދަމާ ބާއްވާ އިންތިޚާބަކީ ދެވަނަ ޖުމްހޫރިއްޔާގެ 10 ވަނަ އިންތިޚާބެވެ. މިއިންތިޚާބަށް 4 ބޭފުޅުންވަނީ ކުރިމަތި ލައްވާފައެވެ. އެއީ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދު، ޕީޕީއެމްގެ ރިޔާސީ ކެންޑިޑޭޓް ޢަބްދުﷲ ޔާމީން، އަދި އަމިއްލަ ގޮތުން ރައީސް ޑރ. މުހައްމަދު ވަހީދު ހަސަން، އަދި ޖުމްހޫރީ ކޯލިޝަންގެ ފަރާތުން ޤާސިމް އިބްރާހީމެވެ.

ރާއްޖޭގައި މިފަހަރު މިބާއްވާ އިންތިޚާބަކީ ވާދަވެރިކަމާއި ޚިޔާލު ތަފާތުންތަކުގެ ތެރޭގައި ބާއްވާއިންތިޚާބެކެވެ. މިއިންތިޚާބާ މެދު ޚިޔާލު ތަފާތުވެފައިވަނީ ރައީސް ނަޝީދު ވެރިކަމުގައި ހުންނެވި އިރު އެމަނިކުފާނުގެ ވެރިކަން ވައްޓާލާފައިވަނީ ބަޣާވާތަކުން ކަމަށްބުނެ އެމަނިކުފާނުގެ ސަޕޯޓަރުން އަޑުއުފުލަން ފެށުމުންނެވެ. 2012 ވަމަ އަހަރުގެ ފެބުރުއަރީ މަހުގެ 7 ވަނަ ދުވަހު ރައީސް ނަޝީދުގެ ވެރިކަން ވައްޓާލުމުން އެކަމާ ހިތްހަމަ ނުޖެހިގެން ރައީސް ނަޝީދުވަނީ ޖެހިގެެންއައި 8 ވަނަ ދުވަހު އެމަނިކުފާނުގެ ބައިވަރު ސަޕޯޓަރުންނާއެކު މަގުމައްޗަށް ނިކުމެ ވަޑައިގެންފައެވެ. ނަތީޖާއަކަށްވީ ސަލާމާތީ ބާރުތަކާއި އެމީހުންނާ ކުރިމަތިލާން ޖެހުމެވެ. މިކުރިމަތިލުމުގައި އެތައް ބަޔަކަށް އަނިޔާވެ އެތައް ބަޔަކު ޒަޚަމްވެފައިވެއެވެ.

އެފަހުން އެމްޑީޕީން މެދުކެނޑުމެއްނެތި އަވަސް އިންތިޚާބަކަށް ގޮވަން ފެށިއެވެ. އަވަސް އިންތިޚާބެއްގެ ތާރީޚު ސަރުކާރުން އިއުލާން ނުކުރާހާ ހިނދަކު ގެތަކަށް ނުވަންނާނެ ކަމަށް އެމްޑީޕީއަށް ތާއިދުކުރާ މީހުންދިޔައީ ގޮވަމުންނެވެ. ނަމަވެސް ސަރުކާރުން މިކަމަށް ދީފައިވަނީ ބީރު ކަންފަތެކެވެ. ސަރުކާރުން ބުނަމުންދިޔައީ އިންތިޚާބު ބޭއްވޭނީ ޤާނޫނޫގައި ކަނޑައަޅާފައިވާ ތާރީޚެއް ގައި ކަމަށެވެ. ނުވަތަ ޤާނޫނާ އެއްގޮތަށް ކަމަށެވެ.

އެންމެ ފަހުން ސަރުކާރުން ބުނި މުއްދަތުގައި އިންތިޚާބު ބޭއްވުމުގެ ހުރިހާކަމެއް މިހާރުވަނީ ތައްޔާރުވެފައެވެ. ވޯޓުލާމީހުންގެ ރަޖިސްޓްރީވަނީ ތަރުތީބު ކޮށްފައެވެ. އިލެކްޝަންސް ކޮމިޝަން ވަނީ ވަރަށް ފުރިހަމައަށް މިކަމަށް ތައްޔާރުވެފައެވެ. ފުލުހުންވަނީ މާދަމާގެ ސަލާމަތީ ކަންކަން ބެލެހެއްޓުމަށް ވަރަށް ފުރިހަމައަށް ތައްޔާރުވެފައެވެ. ފުލުހުންގެ ބޭނުމަކީ ވޯޓުލާއިރު އެއްވެސް ހަމަނުޖެހުމެއް ހިންގިޔަ ނުދިނުމެވެ. ފުލުހުންނަށް އެހީވުމަށް ސިފައިންވެސް ތިބީ ތައްޔާރަށެވެ. ސިޔާސީ ޕާޓީތަކުން ދަނީ އެންމެފަހުގެ ތައްޔާރީތައް ވަމުންނެވެ. މިއަދު ހަވީރު 6.00 އަށް އެމީހުންގެ އެންމެފަހިގެ ތައްޔާރީތައް ނިމޭނެއެވެ. ކެންޕޭން ކުރުމުގެ ދޮރުބަންދު ވާނެއެވެ.

މާދަމާ ވޯޓުލުމުގެ ހުރިހާކަމެއް ނިމިފައިވާއިރު ކަންކަންދަނީ ރަނގަޅަށްތޯ ބެލުމަށް އދ. އިންނާއި، އިންޑިއާއިންނާއި އަދިވެސް ބޭރުގެ ފަރާތްތަކުން ރާއްޖޭގައި މިހާރުދަނީ ހަރަކާތްތެރިވަމުންނެވެ. އެމީހުންދަނީ ރާއްޖޭގައި އިންތިޚާބުގެ ކަންކަން ކުރިއަށްދާ ގޮތް ވަރަށް ގާތުން ބަލަމުންނެވެ. ފާރަލަމުންނެވެ.

މާދަމާ ވޯޓުލާންދާއިރު ތިމާގެ ވޯޓުދޭނީ ކޮންބޭފުޅަކަށް ކަން ނުނިންމާ މީހުންވެސް އެބަތިއްބެވެ. ތިމާގެ ވޯޓު ދޭނީ ކާކަށްތޯ ނިންމަން ބަލާނެ މިންގަނޑު އެނގޭނީ ތިމާއަށެވެ. އެއީ އެހެން މީހުންނަށް ބުނެދެވޭނެ އެއްޗެއް ނޫނެވެ.

އިލްކްޝަންސް ކޮމިޝަނުން ބުނެފައިވަނީ ރިޔާސީ އިންތިޚާބުގައި ކުރިމަތި ލައްވާފައިވާ 4 ބޭފުޅުންނަކީ އެކަމަށް ޝަރުތު ހަމަވާ ބޭފުޅުން ކަމަށެވެ. އެހެން ކަމުން ދެންވިސްނަންވީ ކޮންކަމަކާ ހެއްޔެވެ؟ އެބޭފުޅުންގެ މެނިފެސްޓޯއެއް އެބައޮތެވެ. އޭގައި އެބޭފުޅުން ކަންކަން ކުރައްވާނެ ގޮތް ވަރަށް ސާފުކޮށް ލިޔުއްވާފައި އެބަވެއެވެ. އެހެންކަމުން އެންމެ ރަނގަޅު ހުށަހެޅުމެއް ރައްޔިތުންނާ ހަމައަށް ފޯރުކޮށްދޭނެ ބޭފުޅަކަށް ވޯޓުދިނީމައި އެއޮތީ މައްސަލަ ހައްލިވެފައެވެ. ވޯޓުދެނޭ މީހާ ނޭނގިފައި ހުންނާކަށެއް ނުިޖެހޭނެއެވެ.

މާދަމާ ބާއްވާ އިންތިޚާބަކީ ގިނަޕާޓީތައް އެކުލެވޭ ސިޔާސީ ނިޒާމެއް ރާއްޖެއަށް ތައާރަފްވިފަހުން ބާއްވާ ދެވަނަ އިންތިޚާބެވެ. މި އިންތިޚާބަކީ ރާއްޖޭގެ ކުރިމަގަށް ވަރަށް މުހިންމު އިންތިޚާބެކެވެ.

މިއިންތިޚާބާ ބެހޭ ގޮތުން ރައީސުލްޖުމްހޫރިއްޔާ ޑރ. މުޙައްމަދު ވަހީދު ވިދާޅުވެފައިވަނީ މިއީ "ޑިމޮކްރަސީގެ މަގުގައި ދިވެހިން އަޅާ ވަރަށް މުހިންމު ފިޔަވަޅެއް. މި އިންތިޚާބުގައި ވޯޓުހޯދުމަށް ވާދަވެރިކަމާއެކު ކުރެވިގެން މިދާ ކެމްޕެއިނަކީ، ޑިމޮކްރަސީގެ މަގުގައި މި ކުޑަކުޑަ ރާއްޖެ އޮތް ހިސާބު ދައްކުވައިދޭ ހެކިތަކެއް،" ކަމަށެވެ.

މިހާރު ދިވެހިރައްޔިތުންނަކީވެސް "ޑިމޮކްރަސީގެ ފޭރާން ލައިގެން" ތިބި ބައެކެވެ. ޑިމޮކްރާސީގެ މަގުން ސިޔާސީ ހުރިހާކަމެއް ކުރުމަށް މަސައްކަތް ކުރަމުންދާ ޑިމޮކްރަސީއަށް އާ ބައެކެވެ.

ރާއްޖެއަށް ޑިމޮކްރަސީ އައުމަކީ ކުރިއެރުމެކެވެ. ކަންކަމުގައި ބަސްބުނުމުގެ ފުރިހަމަ ބާރު ރައްޔިތުންނަށް ލިބިގެންދާނެ ކަމެކެވެ. ވެރިކަމަށް ބޭފުޅަކު ގެންނަނީ ރައްޔިތުން ކަމަށްވީހިނދު ރައްޔިތުންގެ ބާރުވެރިކަމާމެދެ ރިޔާސީ ކެންޑިޑޭޓުން ވަރަށް ބޮޑަށް ވިސްނަންޖެހޭނެއެވެ. އެންމެ އިސްކަމެއް ދެއްވަންޖެހޭނެ ކަމަކީ ވައުދު ފުއްދުމެވެ. ރައްޔިތުންގެ މައްޗަށް އަދުލު އިންސާފު ހަމަހަމަ ކޮށްދެއްވުމެވެ. ގައުމުގައި އަމާންކަން ކަށަވަރު ކޮށްދެއްވުމެވެ.

ޑިމޮކްރަސީގެ ވާހަކަ ދައްކާއިރު އެއީވެސް އެންމެ ފުރިހަމަ ނިޒާމެއް ނޫންކަމަށް ރައީސް ޑރ. ވަހީދު ވަނީ ވިދާޅުވެފައެވެ. ނަމަވެސް އެއީ ވެރިކަމުގެ ނިޒާމުގެ ތެރެއިން އެންމެ ގިނަމީހުން ބަލައޮގެންފައިވާ ނިޒާމް ކަމަށް އެމަނިކުފާނު ވިދާޅުވިއެވެ. " ޑިމޮކްރަސީއަކީ ދުނިޔޭގައި ވެރިކަން ކުރުމުގެ ނިޒާމުގެ ތެރެއިން އެންމެ ރަނގަޅު ނިޒާމް ކަމުގައި އެންމެގިނަ މީހުން ގަބޫލުކުރާ ނިޒާމް،"

ދިވެހިރާއްޖެއާމެދު ވަރަށް ހިތްޖެޔޮ ވިސްނުމަކުން ވިސްނާ ވަކިވަކި ފަރުދުން ވަރަށްގިނައެވެ. ހަމައެފަދައިން ގައުމުތައްވެސް މަދެއްނޫނެެވެ. އެފަދަ ފަރާތްތަކުން ގަބޫލު ކުރާގޮތުގައި ރާއްޖެއަށް ޑިމޮކްރަސީ އަންނަން ޖެހެއެވެ. އަދި ޑިމޮކްރަސީ ހަރުދަނާވާންވެސް ޖެހެއެވެ. ނަމަވެސް ޑިމޮކްރަސީގެ ނަމުގައި އެކަކު އަނެކަކާ ދިމާއަށް އެޗެހި ގޮވުމަކީ ރީތިކަމެއް ނޫނެވެ. ސިޔާސީ ޚިޔާލު ތަފާތުވުންތަކުގެ ސަބަބުން މާރާމާރީ ހިންގައި ލޭއޮހުރުވައިގެން ނުވާނެއެވެ. މުދަލަށާއި ގެދޮރަށް ގެއްލުންދީގެން ނުވާނެއެވެ. މުސްލިމުގެ ގޮތުގައި ދެމިތިބޭހާ ހިނދަކު ޚިޔާލު ތަފާތުވާއިރަށް ދުޝްމަނުންގެ ގޮތުގައި ލޭބަލްވިޔަ ދީގެން ނުވާނެއެވެ.

ދިވެހިންގެ ދިރިއުޅުމަށް މިހާރުވަނީ ވަރަށް ބޮޑެތި ބަދަލުތަކެއް އައިސްފައެވެ. ބާރުގެ ބައެއް ލިޔުންތެރިން ބުނެފައިވާ ގޮތުގައި ދިވެހިންނާ ގުޅެނީ އެއްބައިވަންތަ ކަމެވެ. އެކުވެރި ކަމެވެ. އަރައިރުންވުމާއި ތަޅާފޮޅުމާއި މިފަދަ ކަންކަމަކީ ދިވެހިންގެ ދިރިއުޅުމާ ނުގުޅޭ ކަންކަމެވެ. އެހެން ކަމުން ސިޔާސީ ފިކުރު ތަފާތުވުމުން އެކަކު އަނެކެއްގެ އަބުރު ކަތިލައިގެން ނުވާނެއެވެ. "ދިވެހިންކުރާ ކޮންމެ ކަމެއް ކުރަންވާނީ އެކުވެރިކަމާއެކު. އެހެން ނޫނީ ދިވެހިން ދިވެހިންނަކަށް ނުވާނެ. އަބަދުވެސް ދިވެހިންތިބެންވާނީ އެއްބައެއްގެ ގޮތުގައި. ސިޔާސީ ކަންކަމުގައި އެމީހުން ހަތުރުންނަށް ވެގެން ނުވާނެ،" ދިވެހިންނާ ބެހޭގޮތުން ބޭރުގެ ލިޔުންތެރި އަކު ބުނެފައިވެއެވެ.

ސިޔާސީ ލީޑަރުން ސިޔާސީ ވިޔަސް އާންމު ރައްޔިތުން ސިޔާސީ ވެެގެންނުވާނެއެވެ. އާންމު ރައްޔިތުން ކުރަންޖެހޭ ކަމަކީ އަބަދުވެސް އެކުވެރިކަންމަތީގައި ތިބެގެން ސިޔާސީ ލީޑަރު ދައްކަވާ ވާހަކަ އަޑުއެހުމެވެ. "އެފަހުން ވޯޓުލާ ދުވަސް އައުމުން އެމީހަކު ބޭނުންމީހަކަށް ވޯޓުލުމަށްފަހު ގެއަށްއައީމައި ނިމުނީ. އެއީ ރައްޔިތުންގެ ބާރުވެރި ކަމަކީ. އެއީ ޑިމޮކްރަސީއަކީ،" އޭނާ ބުނެފައިވެއެވެ.

ރިޔާސީ އިންތިޚާބުގައިދޭ ވޯޓަކީ ގައުމުގެ މުސްތަގުބަލް ކުރަހާލުމަށް ދަމާލެވޭ ފުރަތަމަ ރޮނގެވެ. ގައުމު މުސްތަގުބަލް ބިނާވެގެންދާނީ މާދަމާ ރައްޔިތުން ދަމާލާ "ރޮނގު" ގެ މައްޗަށެވެ. މާދަމާ އޮންނަ ވޯޓުލުމުގައި ކޮންމެ ބޭފުޅަކަށް ވޯޓުދިނަސް އެޒިންމާ އަދާކުރަން ނިކުންނަން ޖެހެއެވެ. ގައުމު ހިންގުމުގައި ރައްޔިތުންގެ ހިއްސާ ފެށިގެން އަންނާނީ މާދަމާ ދޭ ވޯޓުންނެވެ.

ރައީސް ވަހީދު ވިދާޅުވެފައިވަނީ މާދަލާ ބާއްވާ އިންތިޚާބުގެ ވޯޓުލުމުގައި ކޮންމެ ގޮތެއް ވަރިހަމަ ނުކޮށް އެންމެންވެސް އެމީހަކަށް ފެންނަ ބޭފުޅަކަށް ވޯޓުދެއްވުމަށެވެ.

"ތިޔައިން އެއްވެސް ބޭފުޅަކީ މިޤައުމަށް ކޮންމެ ގޮތެއްވިޔަސް ވަރިހަމަ ބޭފުޅަކަށް ނުވާނެ. އެހެނީ ތިޔައިން ކޮންމެ ބޭފުޅެއްގެވެސް ހިތާ އެންމެ ގާތް ގޮތަކަށްވާނީ، މި ޤައުމުގެ މަޞްލަޙަތުތަކާއި ކުރިއެރުން ކަމުގައިވާތީ. އެހެން ކަމަށްވާނަމަ، ޤައުމުގެ މުސްތަޤްބަލު ކަނޑައެޅުމުގައި ތިޔައިން ކޮންމެ ރައްޔިތަކަށް ލިބިފައިވާ ޙައްޤުގެ ބޭނުންކުރައްވާ! ހޮނިހިރު ދުވަހު ލިޔެވިގެންދާ ތާރީޚުގެ ޞަފްޙާގައި، ތިޔަބޭފުޅުންގެ ދައުރު އަދާކުރައްވާ! މިއީ ހުރިހާ ގޮތަކުންވެސް ރައްޔިތުންގެ ނިންމުމަކަށް ހައްދަވާ،" ރައީސް ވަޙީދު ވިދާޅުވިއެވެ.