އީސްޓް ބެންގާލް ބަލިކޮށް ކުވައިތު ސްޕޯޓްސް ފައިނަލާ ކައިރިއަށް ޖެހިލައިފި

އޭއެފްސީ ކަޕް ސެމީފައިނަލުގެ ފުރަތަމަ ލެގުގައި އިންޑިޔާގެ އީސްޓް ބެންގާލް 4-2 އިން ބަލިކޮށް ފައިނަލުން ޖާގަ ހޯދުމުގެ ފުރުސަތު ކުވައިތު ސްޕޯޓްސްއިން ބޮޑު ކޮށްފިއެވެ.

އިންޑިޔާގައި ކުޅުނު މިމެޗުގައި ކުވައިތު ސްޕޯޓްސްއިން ކާމިޔާބުކުރި ހަތަރު ލަނޑުގެ ތެރެއިން ތިން ލަނޑު ކާމިޔާބު ކުރީ ފުރަތަމަ ހާފްގައެވެ. ފުރަތަމަ ލަނޑު މެޗުގެ 17 ވަނަ މިނެޓުގައި ކާމިޔާބު ކޮށްދިނީ ޓިއުނީޝިޔާ ގައުމީ ޓީމުގެ ފޯވާޑް އިއްސާމް ޖެމާއެވެ. ދެވަނަ ލަނޑު ވަލީދު އަލް ޖުމާ ކާމިޔާބު ކުރީ 31 ވަނަ މިނެޓުގައެވެ. އޭގެ ދެމިނެޓްފަހު ޖެމާ ވަނީ އިތުރު ލަނޑެއްޖަހައި ލީޑް ފުޅާކޮށްދީފައެވެ. ކުވައިތު ސްޕޯޓްސްގެ ހަތަރު ވަނަ ލަނޑު ދެވަނަ ހާފް ފަށައިގެން 48 ވަނަ މިނެޓުގައި ކާމިޔާބު ކޮށްދިނީ ޓިއުނީޝިޔާ ގައުމީ ޓީމުގެ ވިންގަރ ޗެދީ ހައްމާމީއެވެ.

އީސްޓް ބެންގާލުން ދެލަނޑުވެސް ޖެހީ ދެވަނަ ހާފްގައެވެ. ފުރަތަމަ ލަނޑު މެޗުގެ 66 ވަނަ މިނެޓުގައި ކާމިޔާބު ކޮށްދިނީ ނައިޖީރިޔާގެ ޑިފެންޑަރު އުގަ އޮކްޕަރާއެވެ. ދެވަނަ ލަނޑު 88 ވަނަ މިނެޓުގައި ކާމިޔާބުކޮށްދިނީ ރިންޑިކާ ރަލްޓީއެވެ.

މިމެޗުގައި ޖެމާ ކާމިޔާބު ކުރި ދެލަނޑާއެކު މިފަހަރުގެ އޭއެފްސީ ކަޕުގައި ޖެމާ ކާމިޔާބު ކުރި ލަނޑުގެ އަދަދު ވަނީ 15 އަށް އަރާފައެވެ. ޖެމާ ވަނީ ކުއާޓާ ފައިނަލުގެ ފުރަތަމަ ލެގުގައި ރާއްޖޭގެ ނިއުރޭޑިއަންޓް ކޮޅަށް 4 ލަނޑު އަދި ދެވަނަ ލެގުގައި 3 ލަނޑު ކާމިޔާބު ކޮށްފައެވެ.

އީސްޓް ބެންގާލާއި ކުވައިތު ސްޕޯޓްސް ވާދަކުރާ ސެމީފައިނަލުގެ ދެވަނަ ލެގު އޮންނާނީ އަންނަ ބުދަ ދުވަހު ކުވައިތުގައެވެ.