އެއްކުޅުންތެރިޔަކު މަދުކޮށް ކުޅެ ޔޫއޭއީ އަތުން 5-0 އިން ރާއްޖެ ބަލިވެއްޖެ
9 އޮކްޓޯބަރ 2013 0:57
އަންނަ އަހަރު މިޔަންމާގައި ބޭއްވުމަށް ހަމަޖެހިފައިވާ އޭއެފްސީ ނަވާރަ އަހަރުން ދަށުގެ ޗެމްޕިއަންޝިޕަށް ކޮލިފައިވުމަށް ރާއްޖެ ކުޅުނު ތިންވަނަ މެޗުގައި އެއްކުޅުންތެރިޔަކު މަދުކޮށް ކުޅެ ޔުނައިޓެޑް އެރަބް އެމިރޭޓްސް އަތުން 5-0 އިން ރާއްޖެ ރޭ ބަލިވެއްޖެއެވެ.
ޖޯޑަންގެ ވެރިރަށް އައްމާންގެ އައްމާން ސްޓޭޑިއަމްގައި ކުޅުނު މިމެޗުގެ ފުރަތަމަ ހާފްގައި ޔޫއޭއީން ވަނީ ރާއްޖެ ކޮޅަށް ދެލަނޑު ޖަހާފައެވެ. އަނެއް ތިން ލަނޑު ޖެހީ ދެވަނަ ހާފްގައެވެ. ރާއްޖޭގެ ކުޅުންތެރިޔަކަށް ރަތްކާޑް ދެއްކީ މެޗުގެ 63 ވަނަ މިނެޓުގައެވެ. އޭރު ޔޫއޭއީން ވަނީ 4 ލަނޑު ކާމިޔާބު ކޮށްފައެވެ.
މިމެޗުން ބަލިވުމުން ރާއްޖެ ވަނީ ގްރޫޕުގެ ތިންވަނަ މަގާމަށް ވެއްޓިފައެވެ. ތިންވަނަ މަގާމްގައި ރާއްޖެ އޮތީ ހަތަރު ޕޮއިންޓާއި ގެއްލުން 4 ލަނޑާއެކުއެވެ. ގްރޫޕުގެ އެއްވަނަ މަގާމުގައި 6 ޕޮއިންޓާއެކު ޔޫއޭއީ އޮތްއިރު ދެވަނައިގައި ޖޯޑަން އޮތީ ހަތަރު ޕޮއިންޓާއި ފައިދާ އެއްލަނޑާއެކުއެވެ. ގްރޫޕްގެ ހަތަރު ވަނަ މަގާމުގައި ޔަމަން އޮތީ ތިން ޕޮއިންޓާއެކުއެވެ. ގްރޫޕް ފުލުގައި ޕޮއިންޓެއް ނުލިބި އޮތީ އަފްޣާނިސްތާނެވެ.
ކޮލިފައިންގައި ރާއްޖެ ދެން ވާދަކުރަނީ އަންނަ ހޮނިހިރު ދުވަހު ޔަމަނާއެވެ. މިއީ ކޮލިފައިންގައި ރާއްޖެ ކުޅެން ޖެހޭ ފަހު މެޗެވެ. މިމެޗަށް ދިވެހިޓީމް ތައްޔާރުވަމުން ދާއިރު ހުރިހާކުދިންވެސް ފިޓް ކަމަށް ޓީމުގެ މެޑިކަލް އޮފިސަރ އަހުމަދު ޒާހިދު ހުސައިން ވިދާޅުވިއެވެ. އޭނާ ވިދާޅުވީ ޓީމުއޮތީ މިމެޗުން މޮޅުވާން އެއްރޫހެއްގައި އަދި އެއް އަޒުމެއްގައި ކަމަށެވެ. ނަމަވެސް ރާއްޖޭގެ ބައެއް ނޫސްތަކުން 19 އަހަރުން ދަށުގެ ޓީމުގެ ޚަބަރު ގެނެސްދީފައިވާ ގޮތުން ކުދިންގެ މޯޓިވޭޝަން ދަށްވެދާނެތީ ހިތާމަ ކުރާ ކަމަށް ޒާހިދު ވިދާޅުވިއެވެ.
ރާއްޖޭގެ 19 އަހަރުން ދަށުގެ ގައުމީފުޓުބޯޅަ ޓީމް މިފަދަ މުބާރާތެއްގައި މިހާ ރަނގަޅު ނަތީޖާއެއް އަދި ހޯދިފައެއް ނުވެއެވެ.
ކިޔުންތެރިންގެ ހިޔާލު