އަމާޒަކީ ޗެމްޕިއަންކަން ހޯދުން – ކޯޗް

އަމާޒަކީ މިފަހަރު ސާފް ޗެމްޕިއަންޝިޕުގެ ތަށި ދިވެހިންނާ ހަމައަށް ގެނައުންކަމަށް ގައުމީ ޓީމުގެ ކޯޗް ހަންގޭރީގެ އިސްތަވާން އުރުބާނީ ބުނެފިއެވެ.

އުރުބާނީ މިހެން ބުނެފައި މިވަނީ ސާފް ޗެމްޕިއަންޝިޕުގެ ގްރޫޕް ސްޓޭޖް ފުރަތަމަ މެޗުގައި މަދަމާ ހަވީރު އަވައްޓެރި އަދި ފުޓްބޯޅައިގައި ރާއްޖެއާ އެންމެ ވާދަވަރި ސްރީލަންކާއާ ދެކޮޅަށް ނުކުތުމުގެ ކުރިން މިއަދު ނޫސްވެރިންނަށް މައުލޫމާތު ދެއްވަމުންނެވެ.

"އަހަރެމެންގެ ފުރަތަމަ އަމާޒަކީ ޗެމްޕިއަންކަން ހޯދުން. ދެވަނަ އަމާޒަކީ ފުޓްބޯޅަ ކުޅުން" އުރުބާނީ ބުންޏެވެ.

އުރުބާނީ މީގެ އިތުރުން ބުނީ ލަންކާއާ ދެކޮޅަށް ކުޅެން ޖެހުމަކީ އޭނާއަށް ވަރަށް ހާއްސަ ކަމެއްކަމަށެވެ. "ލަންކާއާ ދެކޮޅަށް އަހަރެން އެންމެފަހުން ނިކުތީ 2009 ވަނަ އަހަރުގެ ސާފް ޗެމްޕިއަންޝިޕުގެ ސެމީފައިނަލުގައި. ވަރަށް އުނދަގޫ މެޗެއް އެއީ. އެކަމަކު މޮޅު ކުޅުމަކާއެކު 5-1 އިން އަހަރެމެން އެމެޗުން މޮޅުވީ" އުރުބާނީ ބުންޏެވެ.

މީގެ އިތުރުން އުރުބާނީ ބުނީ މުބާރާތުގައި ކުޅޭ ފުރަތަމަ މެޗުން މޮޅުވުމަކީ ވަރަށް މުހިއްމުކަމެއް ކަމަށާއި އެކަން ހާސިލް ކުރަން ބޭނުންވާކަމަށެވެ. "ފުރަތަމަ މެޗުން މޮޅުވުމަކީ ވަރަށް މުހިއްމު ކަމެއް. އެކަން ކާމިޔާބު ވާނެކަމުގެ ވަރަށް ބޮޑު ޔަގީންކަމެއް އެބައޮތް" އުރުބާނީ ބުންޏެވެ.

ސްރީލަންކާގެ ކޯޗް ބްރެޒިލްގެ ކްލައުޑިއޯ ރޮބާޓޯ ބުނީ ރާއްޖޭގެ ކުޅުން އޭނައަށް އެނގޭކަމަށާއި މެޗަށް ފުރިހަމައަށް ތައްޔާރުވެފައިވާކަމަށެވެ.

"ތައިލެންޑުގައި ރާއްޖެއިން ކުޅުނު ތަމްރީން މެޗުތައް އަހަރެން ބެލިން. އޭގެ އިތުރުން ރާއްޖެ ކުޅެފައިވާ ގިނަ މެޗުތަކެއް ބަލައި ދިރާސާކޮށްފިން" މިއަހަރު ލަންކާގެ ގައުމީ ޓީމުގެ ކޯޗްކަމާ ހަވާލުވި ރޮބާޓޯ ބުންޏެވެ.

މިއަދު ރާއްޖެ އާއި ލަންކާ ބައްދަލު ކުރާމެޗަކީ އެތައް ގޮތަކުން ހާއްސަ މެެޗެކެވެ. މެޗް ކުޅޭ ދަނޑަކީ ދިވެހިންނަށް ވަރަށް ކާމިޔާބު ދަނޑެކެވެ. ދިވެހި ގައުމީ ޓީމަަށް އުފާވެރި ނަތީޖާތަކެއް ލިބިފައިވާ ދަނޑެކެވެ. 1997 ވަަނަ އަހަރުގެ ސާފް ޗެމްޕިއަންޝިޕުގެ ސެމީފައިނަލުގައި އޭރު ދެކުނު އޭޝިޔާގެ ގަދަ ބާރެއްގެ ގޮތުގައި އޮތް ލަންކާގެ މައްޗަށް ރާއްޖެއިން 2-1 އިން ކުރި ހޯދައި ފައިނަލަށް ދަތުރު ކުރީ މިއަދު މެޗުކުޅުމަށް ހަމަޖެހިފައިވާ ދަނޑު (ދަސްރަތު) ގައެވެ.

ރާއްޖެ އާއި ލަންކާ މިހާތަނަަށް 16 ފަހަރު ބައްދަލު ކޮށްފައިވާއިރު ރާއްޖެއިން ވަނީ 6 ފަހަރު މޮޅުވެފައެވެ. ލަންކާ ހަތަރު ފަހަރު މޮޅުވެފައިވާއިރު 6 މެޗް ނިމިފައިވަނީ އެއްވަރު ވެގެންނެވެ.ރާއްޖެ އާއި ލަންކާ ބައްދަލު ކުރާ މެޗް ފަށާނީ މާދަމާ ހަވީރު 5.45 ގައެވެ. އޭގެ ކުރިން މިގްރޫޕުގައި ދެން ހިމެނޭ އަފްގާނިސްތާނާއި ބޫޓާން 2.45 ގައި ބައްދަލު ކުރާނެއެވެ.