ކޮންމެ ރަށުކައުންސިލަކަށް ފަންސާސް މިލިއަން ރުފިޔާ: ރައީސް ނަޝީދު
15 ފެބްރުއަރީ 2014 23:22
ރައީސް ނަޝީދު
އަންނަ މާޗުމަހު 22 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް އަޣްލަބިއްޔަތު ލިބިއްޖެނަމަ ކޮންމެ ރަށެއްގެ ކައުންސިލަށް އަހަރަކު 50 މިލިއަން ރުފިޔާ ލިބޭނެ ގޮތް ހައްދަވައި ދެއްވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްޑީޕީގެ ފަރާތުން ރ. އިނގުރައިދޫ ދާއިރާއަށް ވާދަކުރައްވާ ކެންޑިޑޭޓް ޢަބްދުލްމަތީން ޙަސަންގެ ކެމްޕެއިންގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
އެމަނިކުފާނު ވިދާޅުވީ އެކަން ކުރައްވާނީ އެކަން ކުރުމަށް ޤާނޫނު ހައްދަވައިގެން ކަމަށެވެ. އެގޮތަށް ހެދުމުން ކޮންމެ ކައުންސިލަކަށްވެސް އަމިއްލައަށް އާމްދަނީ ލިބޭނެ މަގުފަހިވެގެންދާނެ ކަމަށްވެސް ވިދާޅުވިއެވެ. މިގޮތަށް ހަދާއިރު ކޮންމެ ކައުންސިލަކަށްވެސް ފަޅުރަށެއް ލިބޭނެ ގޮތް ހައްދަވައިދެއްވާނެ ކަމަށް އެމަނިކުފާނު ވިދާޅުވިއެވެ.
ރައްޔިތުންގެ މަޖިލީހަށް ކެންޕޭން ކުރަމުންދާއިރު ރައީސް ނަޝީދު ވިދާޅުވެފައިވަނީ ބާރުތައް ވަކިކުރުމަށާއި، މިސަރުކާރުގެ ވައުދުތައް ފުއްދެވުމަށް އެމްޑީޕީއަށް މަޖިލީހުގެ އަޣުލަބިއްޔަތު ދިނުމަށެވެ.
ކިޔުންތެރިންގެ ހިޔާލު