ރައީސް ޔާމީންގެ ކެބިނެޓު 15 ވަޒީރުންނަށްވެސް މަޖިލީހުން ރުހުންދީފި

ރައީސް އަބްދުﷲ ޔާމީން އަބްދުލްގައްޔޫމުގެ ފުރަތަމަ ކެބިނަޓަށް ރައްޔިތުންގެ މަޖިލީހުން އިއްޔެ ރުހުންދީފިއެވެ.

މަޖިލީހުން 15 ވަޒީރުންނަށް ރުހުންދީފައިވަނީ ވަޒީރުންގެ ނަންތައް ދިރާސާކުރި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން 8 ވަޒީރަކަށް ރުހުންދޭން ނުފެންނަ ކަމަށް ނިންމާފައި ވަނިކޮށްނެވެ. އެމްޑީޕީގެ އަޣުލަބިއްޔަތު އޮންނަ މިކޮމިޓީން އެގޮތަށް ނިންމިޔަސް މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ހުރިހާ ވަޒީރުންނަށް ރުހުން ލިބިފައިވަނީ އެމްޑީޕީގެ 7 މެންބަރުންވެސް ވޯޓުދީގެންނެވެ.

އެމްޑީޕީގެ ތްރީލައިން ވިޕާ ޚިލާފަށް ވޯޓުދިން މެންބަރުންނާ މެދު ފިޔަވަޅު އަޅާނެ ކަމަށް އެޕާޓީގެ ޗެއާޕާސަން ރީކޯމޫސަވަނީ ވިދާޅުވިއެވެ.

ވަޒީރުންނަށް ރުހުން ދިނުމަށް މިއަދުނެގި ވޯޓުގައި، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރޓ) މުޙައްމަދު ނާޒިމަށް 44 މެންބަރުން ވޯޓުދެއްވިއެވެ. އެމަނިކުފާނަށް ރުހުން ދޭން ނުފެންނަ ކަމަށް 29 މެންބަރުން ވަނީ ވޯޓު ދެއްވާފައެވެ. މިނިސްޓަރ އޮފް ފިނޭންސް އެންޑް ޓްރެޒަރީ ޢަބްދުﷲ ޖިހާދަށް ތާއީދުކޮށް 43 މެންބަރުން ވޯޓުދެއް ވިއެވެ. ޖިހާދާ ދެކޮޅަށް ވޯޓު ދީފައިވަނީ 30 މެންބަރުންނެވެ.

މިނިސްޓަރ އޮފް ފޮރިން އެފެއާޒް އދުންޔާ މައުމޫނަށް ރުހުން ދޭން ފެންނަ ކަމަށް 55 މެންބަރުން ވޯޓު ދިނެވެ. ނުފެންނަ ކަމަށް 10 މެންބަރުން ވޯޓް ދިނެވެ. ވަކި ފަރާތަކަށް ވޯޓު ނުދޭ 7 މެންބަރުން ތިބިއެވެ. މިނިސްޓަރ އޮފް ޓޫރިޒަމް އަޙްމަދު އަދީބު ޢަބްދުލްޣަފޫރަށް ރުހުން ދޭން 45 މެންބަރުން ވޯޓު ދެއްވިއެވެ. ރުހުން ނުދޭން 28 މެންބަރުން ވޯޓުދިނެވެ.

މިނިސްޓަރ އޮފް ޓްރާންސްޕޯޓް އެންޑް ކޮމިއުނިކޭޝަން އަމީން އިބްރާހީމަށް ރުހުން ދޭން ފެންނަ ކަމަށް ވޯޓް ދިނީ 44 މެންބަރުންނެވެ. ރުހުން ދޭން ނުފެންނަ ކަމަށް 29 މެންބަރުން ވޯޓު ދިނެވެ. މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދަށް ރުހުން ދޭން ވޯޓް ދިނީ 43 މެންބަރުންނެވެ. އެމަނިކުފާނާ ދެކޮޅަށް 29 މެންބަރުން ވޯޓުދިނެވެ.

މިނިސްޓަރ އޮފް ހޯމް އެފެއާޒް ޢުމަރު ނަޞީރަށް 41 މެންބަރުން ވޯޓު ދިނެވެ. ދެކޮޅަށް ވޯޓު ދީފައިވަނީ 31 މެންބަރުންނެވެ. އަދި ވަކިކޮޅަކަށް ވޯޓު ނުދޭ އެއް މެންބަރަކު އިނެވެ. މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑޮކްޓަރ މުޙައްމަދު ޝައިނީއަށް ރުހުން ދޭން ވޯޓް ދިނީ 63 މެންބަރުންނެވެ. ދެކޮޅަށް ދީފައިވަނީ 4 މެންބަރުންނެވެ. 6 މެންބަރުން އެއްވެސް ކޮޅަކަށް ވޯޓެއް ނުދެއެވެ.

މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދަށް ރުހުން ދޭން ފެންނަ ކަމަށް ވޯޓް ދިނީ 64 މެންބަރުންނެވެ. ދެކޮޅަށް ވޯޓުދީފައިވަނީ 5 މެންބަރުންނެވެ. އެއްވެސް ކޮޅަކަށް ވޯޓް ނުދޭ 4 މެންބަރުން ތިއްބެވެ. މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑޮކްޓަރ މުޙައްމަދު މުޢިއްޒާ އެއްކޮޅަށް ލިބިފައިވަނީ 44 ވޯޓެވެ. ދެކޮޅަށް 29 މެންބަރުން ވޯޓުދީފައިވެއެވެ. މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤު އިބްރާހީމަށް 64 މެންބަރުން ތާއިދު ކުރިއެވެ. ދެކޮޅަށް 5 މެންބަރުން ވޯޓްދިނެވެ. 4 މެންބަރުން ވަކިފަރާތަކަށް ވޯޓް ދެއްވާފައެއް ނުވެއެވެ.

މިނިސްޓަރ އޮފް އެޑިއުކޭޝަން ޑޮކްޓަރ ޢާއިޝަތު ޝިހާމަށް ރުހުންދިނުމާ އެއްކޮޅަށް 63 މެންބަރުން ވަނީ ވޯޓު ދީފައެވެ. ރުހުން ދޭން ނުފެންނަ ކަމަށް 5 މެންބަރުން ވޯޓް ދިނެވެ. 5 މެންބަރުން ވަކިފަރާތަކަށް ވޯޓް ދީފައިނުވެއެވެ. މިނިސްޓަރ އޮފް ހެލްތު އެންޑް ޖެންޑަރ ޑޮކްޓަރ މަރްޔަމް ޝަކީލާއަށް ރުހުން ލިބިވަޑައިގެންނެވީ 43 ވޯޓެވެ. ދެކޮޅަށް 29 މެންބަރުން ވޯޓްދިނެވެ. ވަކިކޮޅަކަށް ވޯޓު ނުދޭ އެއްމެންބަރުން އިނެވެ.

މިނިސްޓަރ އޮފް ޔޫތު އެންޑް ސްޕޯރޓްސް މުޙައްމަދު މަލީޙު ޖަމާލާ އެއްކޮޅަށް 58 މެންބަރުން ވޯޓުދިނެވެ. ދެކޮޅަށް 7 މެންބަރުން ވޯޓް ދިނެވެ. ވަކިކޮޅަކަށް ވޯޓުނުދޭ 8 މެންބަރުން ތިއްބެވެ. އެޓަރނީ ޖެނެރަލް އަލްއުސްތާޛު މުޙައްމަދު އަނިލްއަށް ރުހުން ދިނުމަށް 64 މެންބަރުންވަނީ ތާއިދު ކޮށްފައެވެ. ރުހުން ދޭން ނުފެންނަ ކަމަށް 3 މެންބަރުން ވޯޓްދިނެވެ. 6 މެންބަރުން ވަކިފަރާތަކަށް ވޯޓް ދީފައެއް ނުވެއެވެ.

ވަޒީރުންނަށް ރުހުންދިނުމަށް މިއަދު ނެގި ވޯޓުގައި އެމްޑީޕީގެ ތްރީލައިން ވިޕާ ޚިލާފަށް، އެވަރުންނަށް ރުހުންދޭން ކަމަށް ފެންނަ ކަމަށް އެ ޕާޓީން ވޯޓު ދެއްވި މެންބަރުނަކީ ކާށިދޫ ދާއިރާގެ ޢަބްދުﷲ ޖާބިރު، ގައްދޫ ދާއިރާގެ ޒާހިރު އާދަމު، ހޯރަފުށީ ދާއިރާގެ، އަޙުމަދު ރަޝީދު، ހިތަދޫ މެދު ދާއިރާގެ، މުޙައްމަދު ރަޝީދު (މޯޑު) އެވެ. މީގެ އިތުރަށް މިލަންދޫ ދާއިރާގެ އަލީ ރިޒާއާއި، ކެނދިކުޅުދޫ ދާއިރާގެ އަޙުމަދު އީސާ ވެސް ވަނީ ވޯޓު ދެއްވާފައެވެ. އަޙުމަދު ކޮށްފައިވާ ޓްވީޓިގައި ބުނެފައިވަނީ އޭނަށް ވޯޓު ދެވުނީ މެންބަރުން އަޑުގަދަ ކުރާތީ އޮޅިގެން ކަމަށެވެ. މިވޯޓަށްފަހި މޯޑުވަނީ ޕީޕީއެމް އަށް ސޮއި ކުރައްވާފައެވެ.