ގައުމިއްޔަތު ދެމިއޮންނާނީ އަދުލުވެރި މާހައުލެއް ގާއިމްކޮށްގެން: ނާއިބު ރައީސް

ގައުމިއްޔަތު ދެމިއޮންނާނީ އިޖުތިމާއީ ގޮތުން އަދުލުވެރި މާހައުލެއް ގާއިމްކޮށްގެން ކަމަށް ރާއްޖޭގެ ނާއިބު ރައީސް ޑރ. މުހައްމަދު ޖަމީލް އަހުމަދު މިރޭ ވިދާޅުވެއްޖެއެވެ.

އެމަމިކުފާނު މިހެން ވިދާޅުވީ ގައުމީ ދުވަހުގެ މުނާސަބަތުގައި ޖުމްހުރީމައިދާނުގައި މިރޭ ބޭއްވި ޚާއްސަ އިހްތިފާލުގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ގައުމިއްޔަތު އާލާ ކުރުމަށްޓަކައި އިޖުތިމާއީ ހާލަތު ބަދަލު ކުރަންޖެހޭ ކަމަށެވެ. އަދި އެންމެންނަށްވެސް ސުލްހަވެރި ކަމާއެކު، އިޖްތިމާޢީ ހަމަޖެހުމެއްގެ ތެރޭގައި އުޅެވޭނެ މާޙައުލެއް ގާއިމްކޮށްގެން ކަމުގައިވެސް ވިދާޅުވިއެވެ. މިކަންކަން ކުރެވޭނީ އެންމެންވެސް ގުޅިގެން ކަމަށް އެމަނިކުފާނު ވިދާޅުވިއެވެ.

ޑރ. ޖަމީލް ވިދާޅުވީ ސިއްޙަތާއި ތައުލީމީ ގޮތުން ކުރާ އުންމީދުތައް ހަގީގަތަކަށް ހަދައިގެންނޫނީ ގައުމިއްޔަތުގެ ފޮނިމީރުކަން ނުލިބޭނެ ކަމަށެވެ. އެމަނިކުފާނު ވިދާޅުވޯ ގައުމިއްޔަތު ލާމެހިފައިވަނީ މިކަންތައްތައް ހާސިލް ކުރުމުގެ މައްޗަށް ކަމަށެވެ.

ޤައުމީ ދުވަހުގެ ބަޠަލު ބޮޑުތަކުރުފާނު މަސައްޕުޅު ކުރެއްވީ، ރާއްޖޭގެ ރައްޔިތުންގެ ޙާލަތު ބަދަލުކުރެއްވުމަށް ކަމަށް އެމަނިކުފާނު ވިދާޅުވިއެވެ. އަދި ރައްޔިތުންނަށް އޭރު ކުރިމަތިވެފައިވާ "އުދާސްތައް" ނިމުމަކަށް ގެންނެވުމަށް ކަމަށެވެ. ރައްޔިތުން ބޭނުންވާ ގޮތަށް ކަންކަން ކުރެއްވުމަށް ބޮޑުތަކުރުފާނު ކުރެއްވި މަސައްކަތް ކާމިޔާބު ކުރެއްވި ކަމަށްވެސް ނާއިބް ރައީސް ވިދާޅުވިއެވެ. ބޮޑުތަކުރުފާނު އެކަން ކާމިޔާބު ކުރެއްވީ ތެދުވެރިކަމާއި އިޚްލާސްތެރިކަމާއި، ވަފާތެރިކަމާއެކު ގައުމިއްޔަތުގެ ލާމަސީލު ނަމޫނާ ރައްޔިތުންނަށް ދައްކަވައިގެން ކަމަށްވެސް ވިދާޅުވިއެވެ.

"މިއަދު މި ޤައުމުގެ ޤައުމިއްޔަތަށް ލޯބިކުރާނަމަ، ޤައުމުގެ އިޖްތިމާޢީ ފޭރާން ހަލާކެއް ނުކުރާނެ. ޤައުމުގެ އިޤްތިޞާދީ ބާރު އެހެން ބައެއްގެ މައްޗަށް ދޫކޮށެއްނުލާނެ. ޤައުމުގެ އަބުރާއި ކަރާމާތަށް ބެލުމެއްނެތި، ސިޔާސީ މަންފާއަށްޓަކައި ޤައުމުގެ ޝަޚުޞިއްޔަތު އެހެން ޤައުމުތަކުގައި ވިއްކައެއްނުލާނެ. ޤައުމިއްޔަތަށް ބެލުމެއްނެތި، ކޮންމެ ކަމެއް ވަރިހަމަނުކުރާނެ." ނާއިބް ރައީސް ވިދާޅުވިއެވެ.