ގައުމީ އިއްތިހާދު ޕާޓީ އުވާލަން ހުށަހެޅުމަށްފަހު ރައީސް ވަހީދު ޕީޕީއެމްއަށް ސޮއިކުރައްވައިފި

ރައީސް ޑރ. މުހައްމަދު ވަހީދު ހަސަން ޕީޕީއެމްއަށް މިއަދު ހަވީރު ސޮއިކުރައްވައިފިއެވެ.

އެމަނިކުފާނު ޕީޕީއެމްއަށް ސޮއިކުރެއްވީ އެމަނިކުފާނު ލީޑުކުރައްވަމުން ގެންދެވި ގައުމީއިއްތިހާދު ޕާޓީ އުވާލުމަށް އެޕާޓީގެ ކައުންސިލުން ފާސްކޮށް އެކަން އިލެކްޝަންސް ކޮމިޝަނަށް އެންގެވުމަށްފަހުގައެވެ. އެޕާޓީ އުވާލުމަކީ މިވަގުތަށް ގައުމަށްވެސް އެންމެ ފައިދާހުރި ގޮތް ކަމަށް ރައީސް ވަހީދު ވިދާޅުވިއެވެ.

ރައީސް ވަހީދު ޕީޕީއެމްއަށް ސޮއި ކުރެއްވުމަށް ނަސަންދުރަ ޕެލަސް ހޮޓަލުގައި ބޭއްވި ރަސްމިއްޔާތުގައި ރައީސް އަބްދުﷲ ޔާމީންވެސް ބައިވެރިވެވަޑައިގެންނެވިއެވެ.

ރައީސް ވަހީދާއެކު އިތުރު ބޭފުޅުންވެސް ޕީޕީއެމްއަށް ސޮއިކުރެއްވިއެވެ. އޭގެ ތެރޭގައި އެމަނިކުފާނުގެ އަނބި ކަނބަލުން އިލްހާމް ހުސައިނާއި، އިލްހާމްގެ ބޭބެ އިލްޔާސް ހުސައިނާއި، ރައީސް ވަހީދުގެ ކުރީގެ ޕޮލިޓިކަލް އެޑްވައިޒަރު އަހުމަދު ތައުފީގާއި އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ހިމެނިވަޑައިގެންނެވިއެވެ. މީގެ އިތުރަށް ރައީސް އޮފީހުގެ ކުރީގެ މީޑިއާ ސެކްރެޓަރީ މަސްއޫދު އިމާދާއި، ޖައުސާ ޖައުފަރާއި ލަންކާގައި ހުންނަވާ ރާއްޖޭގެ ހައި ކޮމިޝަނަރު ހުސައިން ޝިހާބުވެސް ހިމެނިވަޑައިގަންނަވަ އެވެ. އަދި އިސްލާމިކް މިނިސްޓްރީގެ ސްޓޭޓް މިނިސްތަރ ޑރ. މުހައްމަދު އަލީވެސް ހިމެނިވަޑައި ގަންނަވައެވެ.

ޕީޕީއެމްއަށް ސޮއިކުރެއްވުމަށްފަހު ރައީސް ވަހީދު ވިދާޅުވީ އެޕާޓިއަށް ސޮއިކުރެއްވީ ރާއްޖޭގެ ކަންކަން މިހާރުހުރި ގޮތަށް ބައްލަވާއިރު އެކަންކަން އިސްލާހުކުރުމަށް އެންގެ ގާބިލްޕާޓީއަކީ ޕީޕީއެމް ކަމަށެވެ. އެޕާޓީއާ ގުޅިވަޑައިގެންނެވުމުން އިސްލާހީ މަސައްކަތުގައި ބައިވެރިވެވަޑައިގަތުމަށް ފުރުސަތު ލިބިވަޑައިގަންނަވާނެ ކަމަށެވެ.

ރައީސް އަބްދުﷲ ޔާމީން ބައިވެރިވެވަޑައިގެންނެވި ރަސްމިއްޔާތުގައި ވަހީދު ވިދާޅުވީ ގައުމަށް މިވަގުތު އެންމެ ބޮޑު ހިދުމަތެއް ކޮށްދެވޭނީ ޕީޕީއެމާ ގުޅިގެން ކަމަށް ގަބޫލުކުރައްވާ ކަމަށެވެ. ސަރުކާރުގެ ސިޔާސަތުތައް ތަންފީޒުކޮށް ރައްޔިތުންނަށް ރަނގަޅު ގޮތްތަކެއް ހޯދައިދޭން ރައީސް ޔާމީން ކުރައްވާ މަސައްކަތަށް ފުރިހަމައަށް އެއްބާރުލުން ދެއްވާނެ ކަމަށް ވެސް އެމަނިކުފާނު ވިދާޅުވި އެވެ.

އެމަނިކުފާނު ވިދާޅުވީ ސިޔާސީ ގޮތުންނާއި އިގްތިސާދީގޮތުން އަދި އިޖުތިމާއީ ގޮތުން ބެލި ކަމަށްވިޔަސް ރާއްޖެއަށް ވަރަށްބޮޑެތި ގޮންޖެހުންތައް އެބަހުރި ކަމަށެވެ. "މިކަންކަން ހައްލުކުރުމަށް ހުރިހާ އެންމެން އަތުގުޅާލައިގެން މަސައްކަތް ކުރަންޖެހޭ،" ކަމަށްވެސް އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ ޕީޕީއެމްއާ ގުޅިވަޑައިގެންނެވި ކަމަށްވިޔަސް ކުރިއަށްއޮތް ތަނުގައި އިޖުތިމާއީ ގޮތުންވެސް މަސައްކަތް ކުރައްވާނެ ކަމަށެވެ. އެމަނިކުފާނު ވިދާޅުވީ ޕީޕީއެމްއަކީ ކަންކަން އިސްލާހު ކުރަމުން ކުރިއަށްދިޔުމުގެ ހިތްވަރާއި ގާބިލްކަން ހުރި ޕާޓީއެއް ކަމަށެވެ. އެހެން ކަމުން އެޕާޓީގެ މެންބަރުން ބޭނުންވާ ކަމަށްވާނަމަ އެޕާޓީގެ ކައުންސިލުންވެސް އަދި އެހެން މަގާމަކުންވެސް އެމަނިކުފާނު ފެނިދާނެ ކަމަށެވެ.

ރައީސް ވަހީދު ވިދާޅުވީ އެމަނިކުފާނު ޕީޕީއެމްއަށް ސޮއިކުރެއްވީ ސަރުކާރުގެ އެއްވެސް މަގާމެއް ބޭނުންފުޅުވެގެން ނޫންކަމަށެވެ. އަދި މަގާމަކާ ހަވާލުވެ ވަޑައިގެންނެވި ކަމަށްވިޔަސް މިހާރު ކަންކަން ހުރި ގޮތުން ރާއްޖެއިން ބޭރުންގައި އުޅުއްވަން ޖެހިވަޑައި ގަންނަވާތީ މަސްއުލީއްޔަތު އަދާކުރައްވަން ދަތިވާނެ ކަމަށް ގަބޫލު ކުރައްވާ ކަމަށެވެ.

އެމަނިކުފާނު ވިދާޅުވީ ޕީޕީއެމްއިން ރިޔާސީ އިންތިޚާބު ކާމިޔާބު ކުރެއްވީ ވަރަށް ދަތި އެހާމެ އުދަގޫ މަރުހަލާތަކެއް ކަޑައްތު ކުރެއްވުމަށްފަހު ކަމަށެވެ. އެކަމުގައި ޕީޕީއެމްގެ ހުރިހާ މެންބަރުންވެސް މަސައްކަތް ކުރެއްވި ކަމަށް ވިދާޅުވިއެވެ. އެޕާޓީއާ ގުޅިވަޑައިގެންނެވުމުގެ ކުރިން ރައީސް މައުމޫނާވެސް މަޝްވަރާ ކުރެއްވި ކަމަށް ޑރ. ވަހީދު ވިދާޅުވިއެވެ.

މިރަސްމިއްޔާތުގައި ރައީސް ޔާމީން ވިދާޅުވީ ރައީސް ވަހީދާއި އެމަނިކުފާނުގެ ޕާޓީގެ އިސްބޭފުޅުން ޕީޕީއެމްއާ ގުޅިވަޑައިގެންނެވުމުން އެކަމަށް އުފާ ކުރައްވާ ކަމަށެވެ. އަދި އެއީ އެޕާޓީއަށް ލިބުނު ކުރިއެރުމެއް ކަމަށްވެސް ވިދާޅުވިއެވެ. މިބޭފުޅުންނާއެކު މަސައްކަތް ކޮށް ޕީޕީއެމް ވަރުގަދަ ކުރެއްވުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ.

ކޯލިޝަނާ ބެހޭގޮތުން ރައީސް ޔާމީން ވިދާޅުވީ އެމްޑީޕީ ނޫން އެހެން ހުރިހާ ބޮޑެތި ޕާޓީތައް މިހާރުވަނީ ޕީޕީއެމްއާ ގުޅިފައި ކަމަށެވެ. ނަމަވެސް ކޯލިޝަނަކީ ރައްޔިތުންނަށް މުހިންމު އެއްޗެއް ނޫންކަމަށެވެ. ރައްޔިތުން ބޭނުންވަނީ ޚިދުމަތް ކަމަށްވެސް ވިދާޅުވިއެވެ. އެހެން ކަމުން އެބޭފުޅުން ނުކުމެ ތިއްބެވީ ރައްޔިތުންނަށް ޚިދުމަތް ކުރެއްވުމަށް ކަމަށްވެސް ރައީސް ވިދާޅުވިއެވެ.