ރައީސް މިއަދު ދިވެހި ޤައުމާ މުޚާޠަބު ކުރައްވާނެ

ރައީސުލްޖުމްހޫރިއްޔާ ޑޮކްޓަރ މުޙަންމަދު ވަޙީދު ހަސަން މިއަދު ދިވެހި ޤައުމާ މުޚާޠަބު ކުރައްވާނެ ކަމަށް ރައީސް އޮފީހުން ބުނެފިއެވެ.

ރައީސް އޮފީހުން ހާމަ ކުރައްވާފައިވާ ގޮތުގައި މިއީ އަޟްޙާ ޢީދުގެ މުނާސަބަތުގައި، އެމަނިކުފާނު މުޅި ގައުމަށް ދެއްވާ ޚިތާބެކެވެ.

ރާއްޖޭގެ ޚަބަރުފަތުރާ ވަޞީލަތްތައް މެދުވެރި ކުރައްވައި އެމަނިކުފާނު ގައުމާ މުޚާތަބު ކުރައްވާނީ މިއަދު ހެނދުނު 10.00 ގައެވެ. އެމަނިކުފާނު މިއަދު ގައުމާ މުޚާތަބު ކުރައްވާއިރު އެމަނިކުފާނު އިއްޔެ ވަނީ ރާއްޖޭގެ ރައްޔިތުންނަށް އީދުގެ ތަހުނިޔާ ވިދާޅުވެފައެވެ.

"ބަރަކާތްތެރި އަޟުޙާ ޢީދުގެ މުނާސަބަތުގައި، ދިވެހިރާއްޖޭގެ އެންމެހައި ލޮބުވެތި އަޚުންނަށާއި އުޚުތުންނަށް، އަޅުގަނޑު ތަހުނިޔާ ދަންނަވައި، މި މުނާސަބަތުގެ އިޚްލާޞްތެރި ހެޔޮއެދުންތައް އަރިސް ކުރަމެވެ. މި ތަހުނިޔާގައި، ޙައްޖުގެ މަތިވެރި އަޅުކަން އަދާކުރެއްވުމަށް ރާއްޖެއިން މިއަހަރު ޙައްޖަށް ވަޑައިގެންނެވި ހުރިހާ ބޭފުޅުންވެސް އަޅުގަނޑު ޝާމިލު ކުރަމެވެ." އެމަނިކުފާނުގެ ތަހުނިޔާގައި ވިދާޅުވެފައިވެއެވެ.

އެމަނިކުފާނު ވިދާޅުވީ މިފަހަރުގެ އިދު އައީ ސިޔާސީ ގޮތުން އަޅުގަނޑުމެންގެ މެދުގައި ހަލަބޮލިކަން އުފެދިފައިވާ ދުވަސްވަރެއްގައި ކަމަށެވެ. ނަމަވެސް އެފަދަ ކަންކަމުން އެއްބައިވަންތަ ކަމަށް އެއްވެސް ބުރުލެއް އަރައިގެން ނުވާނެ ކަމަށްވެސް ވިދާޅުވެފައިވެއެވެ. "މި ޢީދުގެ މުނާސަބަތަކީ، އަޅުގަނޑުމެންގެ މެދުގައިވާ އެކުވެރިކަމާއި އެއްބައިވަންތަކަމުގެ ގުޅުން އިތުރަށް ވަރުގަދަ ކުރުމުގެ ޢަޒުމް އާކުރުމުގެ މުނާސަބަތެކެވެ. ސިޔާސީގޮތުން ހަލަބޮލިކަމެއްގެ ތެރޭގައި މިވަގުތު އަޅުގަނޑުމެން އުޅެން ޖެހިފައިވީ ކަމުގައިވިޔަސް، އެ ހަލަބޮލިކަމުގެ ތެރެއިން އަޅުގަނޑުމެންގެ މެދުގައި އޮތް އެއްބައިވަންތަކަމުގެ ގުޅުމަށް އެއްވެސް ބުރުލެއް އަރައިގެން ނުވާނެއެވެ. ހަމައެހެންމެ، އަޅުގަނޑުމެންގެ ޢާއިލާތަކުގެ މެދުގައި އުފެދިފައިވާ ގުޅުންތަކަށްވެސް ހީނަރުކަމެއް އައިސްގެން ނުވާނެއެވެ. ވަކި ސިޔާސީ ފިކުރެއްގެ ސަބަބުން ޢާއިލީ ގުޅުންތައް ކެނޑިގެން ގޮސްގެން ނުވާނެއެވެ. ޙައްޖުގެ މަތިވެރި އަޅުކަން އަޅުގަނޑުމެންނަށް ދަސްކޮށްދޭ ފިލާވަޅުގެ މަތިން ހަނދާންނައްތާލައިގެން ނުވާނެއެވެ." އެމަނިކުފާނު ވިދާޅުވިއެވެ.

މިއަދުގެ ޚިތާބުގައި ގައުމުގެ ސިޔާސީ މަސްރަހާ ބެހޭގޮތުން އެމަނިކުފާނު ވާހަކަ ދައްކަވާނެއެވެ.