އަޅުގަނޑުމެންގެ ކަންކަމާބެހުމުގެ ފުރުޞަތު، ބޭރުގެ ފަރާތަކަށް ދީގެން ނުވާނެ: ރައީސް ވަހީދު
3 ނޮވެމްބަރ 2013 21:21
ދިވެހިރާއްޖޭގެ ކަންކާމާ ބެހުމުގެ ފުރުސަތު ބޭރުގެ އެއްވެސް ފަރާތަށް ދިވެހިން ދީގެން ނުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު ވަހީދު ވިދާޅުވެއްޖެއެވެ. އެމަނިކުފާނު މިހެން ވިދާޅުވެފައިވަނީ ނަޞްރުގެ ދުވަހުގެ މުނާސަބަތުގައި ދިވެހި ރައްޔިތުންނަށް ފޮނުއްވި މެސެޖެއްގައެވެ.
"ޅުގަނޑުމެންގެ ކަންކަމާބެހި، ގޮތް ކިޔައި ހެދުމުގެ ފުރުޞަތު، ބޭރުގެ އެއްވެސް ފަރާތަކަށް އަޅުގަނޑުމެން ދީގެނެއް ނުވާނެއެވެ." އެމަނިކުފާނު ވިދާޅުވިއެވެ. އެމަނިކުފާނު ވިދާޅުވެފައިވަނީ މިވަގުތަކީ ރާއްޖެއަށް ކުރިމަތިވެފައިވާ ކަންކަން އަމިއްލައަށް ޙައްލުކުރުމުގެ ވަގުތު ކަމަށެވެ. "އަޅުގަނޑުމެންގެ ކަންކަން ޙައްލުކުރަންޖެހޭނީ އަޅުގަނޑުމެން އަމިއްލައަށް" ކަމަށްވެސް އެމަނިކުފާނު ވިދާޅުވިއެވެ.
"ބޭރުގެ ފަރާތްތަކަށް އެ ފުރުޞަތު ދިނުމަކީ، އަޅުގަނޑުމެންގެ މިނިވަން ކަމަށާއި މުސްތަޤިއްލުކަމަށް އެކަމުން ނޭދެވޭ އަސަރުތަކެއް ފޯރައި، އިތުރު ގެއްލުންތަކާ ކުރިމަތިލާންޖެހިދާނެކަމެއްކަން އަބަދުވެސް އަޅުގަނޑުމެން ހަނދާންކުރަން ޖެހޭނެއެވެ."
ރައީސް ވިދާޅުވެފައިވަނީ ނޮވެމްބަރު 3ގެ ޙާދިސާއަކީ، ދުވަހަކުވެސް ހިތްތަކުން ފިލައިގެންދާނެ ޙާދިސާއެއް ނޫންކަމަށެވެ. "އެ ބިރުވެރި ޢުދުވާނީ ޙަމަލާއިން މާތްވެގެންވާ އިސްލާމްދީނާއި، މި ލޮބުވެތި ވަޠަނާއި، ދިވެހި ރައްޔިތުން ސަލާމަތްކޮށްދެއްވުމަށް، އެދުވަހު ދިވެހި ސިފައިން ވެވަޑައިގެންނެވި މަތިވެރި ޤުރުބާނީއާއި ދިވެހި ސިފައިން ދެއްކެވި ސާބިތުކަމާއި ހިތްވަރުގެ މަތިން މިއަދުވެސް ހަނދާންކޮށް، އެމަތިވެރި ޤުރުބާނީގެ އަގު ވަޒަންކުރަމެވެ." އެމަނިކުފާނު ވިދާޅުވެފައިވެއެވެ.
ނޮވެމްބަރ 3 ގެ ޢުދުވާނީ ޙަމަލައިގެ ބިރުވެރި ހަނދާންތައް ހިތްތަކަށް މިއަދު ގެންނަމުންދާއިރު މިހާރު އެންމެ ބޮޑު ސަމާލުކަމެއް ދޭން ޖެހިފައިމިވަނީ، "އަޅުގަނޑުމެންގެ މެދުގައި އެކުވެރިކަމާއި އެއްބައިވަންތަކަމުގެ ގުޅުން ވަރުގަދަ ކުރުމުގެ މައްޗަށެވެ. އަޅުގަނޑުމެންގެ ތެރޭގައި މިހާރު އުފެދިފައިވާ ބައިބައިވުންތަކާއި ހަމަނުޖެހުންތައް ޙައްލުކޮށް، ޤައުމުގެ އެއްބައިވަންތަކަމަށް ބުރޫ އަރާފަދަ ޢަމަލުތަކުން ދުރުހެލިވުމުގެ މައްޗަށެވެ. ސިޔާސީ ފިކުރު ތަފާތުވި ކަމުގައިވިޔަސް، ޤައުމާއި ރައްޔިތުންގެ މަސްލަޙަތަށް އިސްކަންދީގެން މަސައްކަތް ކުރުމުގެ މައްޗަށެވެ."
އެމަނިކުފާނު ވިދާޅުވިއެވެ. ރައީސް ވިދާޅުވެފައިވަނީ މިގޮތަށް މަސައްކަތް ކުރަމުން ނުދާނަމަ، ޤައުމަށް އެކަމުން ބޮޑެތި ގެއްލުންތަކެއްލިބުމަކީ، މާދުރުގައި އޮތް ކަމެއް ނޫން ކަމަށެވެ.
ކިޔުންތެރިންގެ ހިޔާލު