އެންމެ އިސްކަމެއް ދެއްވާނީ ގުޅިފައިވާ ޕާޓީތަކުގެ މެނިފެސްޓޯ ތަންފީޒު ކުރަން: ރައީސް ޔާމީން
19 ނޮވެމްބަރ 2013 20:51
ރައީސް ޔާމީންގެ ސަރުކާރު އެކުލެވިގެން ވަނީ، އިއްތިޙާދެއްގެ ސަރުކާރެއްގެ މައްޗަށް ކަމަށްވުމުން ސަރުކާރުން އެންމެ އިސްކަމެއްދޭނީ، ގުޅިފައިވާ ޕާޓީތަކުގެ މެނިފެސްޓޯ ތަންފީޒު ކުރައްވަން ކަމަށް ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެމަނިކުފާނުގެ ކެބިނަޓަށް މިއަދު 6 ވަޒީރުން އައްޔަން ކުރެއްވުމަށްފަހު އެބޭފުޅުންނާ ވާހަކަ ދައްކަވަމުން ރައީސް ވިދާޅުވީ މިކަންކަން ކުރައްވާނީ "ދިވެހިރާއްޖޭގެ ޤާނޫނުއަސާސީއާއި، ދިވެހިރާއްޖޭގެ ޤާނޫނުތަކާއި އަދި އަޅުގަނޑުމެން ޢާންމުކޮށް ޤަބޫލުކުރާ އުޞޫލުތަކާ އެއްގޮތްވާ ގޮތުގެ މަތިން،" ކަމަށެވެ.
ގުޅިފައިވާ ޕާޓީތަކުގެ މެނިފެސްޓޯގައި ހިމެނޭ މުހިންމު ކަންތައްތައް ރައްޔިތުންނަށް އިޚްލާޞްތެރިކަމާއެކީ، އެންމެ އަވަސްމިނެއްގައި ފޯރުކޮށްދެއްވުމަށްޓަކައި 100 ދުވަހުގެ ރޯޑުމެޕެއް އެކުލަވާލެއްވުމަށް ވިސްނަވަމުން ގެންދަވާ ކަމަށްވެސް ރައީސް ވިދާޅުވިއެވެ.
ވަޒީރުންނާ ވާހަކަ ދައްކަވަމުން އެމަނިކުފާނު ވިދާޅުވީ ރައްޔިތުން ބޭނުންވާ ކަންކަން ކޮށްދެއްވުމުގައި ޕާޓީގެ ފިކުރަކަށް ނުބެއްލެވުމަށް އެދިވަޑައިގަންނަވާ ކަމަށެވެ. މެނިފެސްޓޯއަކީ ހުރިހާ އެންމެން، "ދިވެހި ރައްޔިތުންނަށް ހިނިތުންވުން ގެނެސްދިނުމަށްޓަކައި، އަދި ދިވެހިރާއްޖޭގެ ރައްޔިތުން އިސްލާމީ ހިދާޔަތުގެ މަތީގައި ތިބުމުގެ މަސައްކަތް ކުރުމަށްޓަކައި އަދި އަޅުގަނޑުމެންގެ ދިވެހި ދައުލަތަކީ، މަޞްލަޙަތާއި ޞުލްޙަވެރި ތަނަކަށް ހަދައި، ބައިބައިވުން ނައްތާލައި، އަޅުގަނޑުމެންގެ ތެރޭގައި ހަމަޖެހޭ މުޖްތަމަޢެއް ޤާއިމްކޮށް، އަޅުގަނޑުމެންގެ ދައުލަތަކީ އޯގާތެރި ދައުލަތަކަށް ހެދުމާއެކީ، ހުރިހާ ރައްޔިތުންގެ ފަރުދީ ޙައްޤުތަކަށް އިޙްތިރާމް ކުރުމާއެކީ، ދިވެހި ދައުލަތަކީ، ދިވެހި ރައްޔިތުންނަކީ، އުފާ ފާގަތިކަމާއެކީ މުއްސަނދިކަންމަތީގައި އުޅޭނެ ބަޔަކަށް ހެދުމަށްޓަކައި ކުރާ މަސައްކަތް،" ކަމަށްވެސް ވިދާޅުވިއެވެ.
ވަޒީރުންގެ އެހީތެރިކަމާއެކު ރައްޔިތުން ދެކެން ބޭނުންވާ ހުވަފެން ޙަޤީޤަތަކަށް ހަދައިދިނުމަށްޓަކައި އެއްވެސްކަހަލަ ވަރުބަލިފުޅުވުމެއްނެތި އަދި ޤާނޫނީ ހުވާ މަތީގައި ތިއްބަވައިގެން ރައްޔިތުންނަށް ޚިދްމަތް ކޮށްދެއްވުމަށް ރައީސް އެދިވަޑައިގެންނެވިއެވެ.
އެމަނިކުފާނު ވިދާޅުވީ ކެބިނެޓުގެ މަސައްކަތް ރައްޔިތުން ވަރަށް ކައިރިން ބަލަމުންދާ ކަމަށެވެ. އެހެން ކަމުން ރައްޔިތުން ބޭނުންވާ ގޮތަށް ޚިދުމަތް ކޮށްދެއްވުމަށް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.
ކިޔުންތެރިންގެ ހިޔާލު