ދައުލަތުގެ ބަޖެޓްގެ ޚަރަދު ކުޑަކުރުމަށް ޚާއްސަ މަސައްކަތްތަކެއް ވަރަށް އަވަހަށް ފަށާނަން: ރައީސް ޔާމީން

ދައުލަތުގެ ބަޖެޓްގެ ޚަރަދު ކުޑަކުރުމަށް ޚާއްސަ މަސައްކަތްތަކެއް ވަރަށް އަވަހަށް ފަށްޓަވާނެ ކަމަށް ރާއްޖޭގެ އާ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް މިއަދު ވިދާޅުވެއްޖެއެވެ.

ރައީސް ކަމުގެ ހުވައި ކުރެއްވުމަށްފަހު އެމަނިކުފާނު ވިދާޅުވީ ރާއްޖެ މިވަނީ އިޤްތިޞާދީ ފުންވަޅުގަނޑެއްގެ ތެރޭގައި ކަމަށެވެ. "އިޤްތިޞާދީ ގޮތުން ރާއްޖެ މިއަދު މިއޮތީ ވަރަށް ނާޒުކު ފައްތަރެއްގައި. ދައުލަތުގެ ދަރަނި މިވަނީ އަތްނުފޯރާ ހިސާބަށް މައްޗަށް ގޮސްފައި. ހަމައެހެންމެ، ދައުލަތުގެ ބަޖެޓްގެ ޚަރަދުތައް މިވަނީ އިންތިހާއަށް މައްޗަށް ގޮސްފައި. އެހެންކަމުން، ދައުލަތުގެ ޚަރަދުތައް ކުޑަކުރުމަށް މިއަދު މިވަނީ ވަރަށްބޮޑު އިސްކަމެއްދޭން ޖެހިފައި. އެހެންކަމުން، ދައުލަތުގެ ބަޖެޓްގެ ޚަރަދުތައް ކުޑަކުރުމަށް ޚާއްޞަ މަސައްކަތްތަކެއް އަޅުގަނޑު ވަރަށް އަވަހަށް ފަށާނެ ވާހަކަ ދަންނަވަން،" އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ އިޤްތިޞާދީ ގޮތުން ގައުމަށް ގެންނަ ކުރިއެރުން، ހަގީގީ ކުރިއެރުމަކަށް ވެގެންދާނީ، "އެކަމުން ރައްޔިތުންނަށް ލިބޭ ފައިދާ އިތުރުވަމުންދާ މިންވަރަކުން ކަމާއި، އެ ފައިދާ ޙިއްޞާކުރާ ދާއިރާ ފުޅާވަމުންދާ މިންވަރެއްގެ މައްޗަށް ކަމަށްވެގެން،" ކަމަށްވެސް ވިދާޅުވިއެވެ.

އެމަނިކުފާނު ރައީސުލްޖުމްހޫރިއްޔާ ކަމުގެ މަޤާމު މިއަދު ހަވާލުވެ ވަޑައިގެންނެވިއިރު ޤައުމު މިއޮތީ، ވަރަށް ނާޒުކު ފައްތަރެއްގައި ކަމަށްވެސް ވިދާޅުވިއެވެ. "ޤައުމު މިވަނީ ސިޔާސީ ހަލަބޮލިކަމެއްގެ ތެރޭގައި ވަރަށް ބޮޑަށް ޤައުމު ފިތިފައި. ރައްޔިތުން ތިބީ ވަރަށްބޮޑު ނުތަނަވަސްކަމެއްގެ ތެރޭގައި. އެހެންކަމުން، ސިޔާސީ ހަލަބޮލިކަމުން އަރައިގަނެ، ރާއްޖޭގެ ރައްޔިތުންނަށް އަމާން ވެށްޓެއް ޤާއިމުކޮށްދިނުމަކީ، ރާއްޖޭގެ ރައީސުލްޖުމްހޫރިއްޔާގެ ޙައިސިއްޔަތުން އަދި ދައުލަތުގެ އެންމެމަތީ ވެރިޔާގެ ޙައިސިއްޔަތުން މިއަދު އަޅުގަނޑުގެ މައްޗަށް އޮތް ވަރަށް މުހިންމު ޤައުމީ ޤައުމީ ވާޖިބެއް. ވަރަށްބޮޑު މަސްއޫލިއްޔަތެއް" ކަމަށްވެސް ވިދާޅުވިއެވެ.

އެމަނިކުފާނު ވިދާޅުވީ މިކަންކަން ރަނގަޅު ކުރެވޭނީ "އަޅުގަނޑުމެންގެ މެދުގައި ގެއްލިފައިވާ އިޖްތިމާޢީ ފޭރާން ވަރުގަދަކޮށް، ރައްޔިތުން އެކަތިގަނޑަކަށްވެ އެއްބައިވެގެން. ކޮންމެ ރައްޔިތަކުވެސް އަމިއްލަ މަޞްލަޙަތަށްވުރެ، ޤައުމީ މަޞްލަޙަތު އިސްކޮށްގެން. ވަކިމީހަކަށް، ވަކި ކުލައަކަށް ނުބަލައި، އެންމެންނަކީވެސް ހަމަހަމަ ބައެއް ކަމަށް ދެކިގެން. އާދެ! ޤައުމަކީ އެންމެ އިސްކަން ކަމުގައި ދެކިގެން،" ކަމަށް ވިދާޅުވިއެވެ.

އެމަނިކުފާނު ވިދާޅުވީ ގައުމުގެ ކަންކަން ރަނގަޅު ކުރުމަށް އެންމެން އަތުކުރިއޮޅާލައިގެން، އެންމެން އެއް މިސްރާބަކަށް ދަތުރުކުރަން މިހާރުވަނީ ފަށަންވެފައި ކަމަށެވެ.

އެމަނިކުފާނު ވިދާޅުވީ ރައްޔިތުންނަށް ކީދުމަތް ކޮށްދެއްވަމުން ވަޑައިގަންނަވާނީ "ރައްޔިތުންގެ ރައީސްކަން، ހުރިހާ ވަގުތެއްގައިވެސް ހަނދާންބަހައްޓައިގެން." ކަމަށެވެ. އެމަނިކުފާނު ވިދާޅުވީ ރާއްޖޭގެ ވެރިކަން ކުރައްވާނީ މާތްވެގެންވާ އިސްލާމްދީނާއި، ގައުމުގެ މިނިވަންކަމާއި ސިޔާދަތު ރައްކާތެރި ކުރެވޭނެ މަގުތައް ބައްލަވައިގެން ކަމަށެވެ.