ރާއްޖެއަކީ ސަރަހައްދުގެ އެންމެ އަމާން ގައުމަށް ހެދުމަށް އާ ރައީސް އެދިވަޑައިގެންފި

ދިވެހިރާއްޖެއަކީ މި ސަރަޙައްދުގައިވާ އެންމެ އަމާން، އަދި އެންމެ ތަރައްޤީވެފައިވާ ޤައުމަށް ހެދުމަށް މަސައްކަތް ކޮށްދެއްވުމަށް، ރައްޔިތުންގެ ކިބައިން އާ ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އެދިވަޑައިގެންފިއެވެ.

އެމަނިކުފާނު ރައްޔިތުންގެ ކިބައިން މިކަމަށް އެދި ވަޑައިގެންނެވީ ރައީސުލްޖުމްހޫރިއްޔާ ކަމުގެ ހުވައި މިއަދު ކުރެއްވުމަށްފަހު ގައުމާ މުޚާތަބު ކުރައްވައި ދެއްވި ފުރަތަމަ ތަގުރީރުގައެވެ.

"ރާއްޖެއަކީ މި ސަރަޙައްދުގައިވާ އެންމެ އަމާން، އެންމެ ތަރައްޤީވެފައިވާ ޤައުމު ކަމަށް ހެދުމަށް މަސައްކަތް ކޮށްދެއްވުމަށް، އަޅުގަނޑު ވަރަށް އިޚްލާޞްތެރިކަމާއެކު، ދިވެހި ރައްޔިތުންނަށް ދަންނަވަން،" އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ކަމުގެ ހުވައިކުރެއްވުމަށް މިއަދު މެންދުރު 1.00 ގައި ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖޭގެ ޚާރިޖީ ސިޔާސަތު ވަރުގަދަ ކުރެއްވުމަށް ވަރަށް ބޮޑަށް މަސައްކަތް ކުރައްވާނެ ކަމަށެވެ.

އެމަނިކުފާނުގެ ޚާރިޖީ ސިޔާސަތުގެ މުހިންމު ބަޔަކީ، "ރާއްޖެއާ އެކުވެރި ދައުލަތްތަކާމެދު އުފެދިފައިވާ ގުޅުން އިތުރަށް ވަރުގަދަކޮށް ބަދަހިކުރުން" ކަމަށްވެސް ވިދާޅުވިއެވެ.

ޚާއްސަކޮށް އަވަށްޓެރި ގައުމުތަކާއެކު އޮންނަ ޒަމާންވީ ރަހުމަތްތެރިކަން މިހާރަށްވުރެ ބޮޑަށް ވަރުގަދަކޮށް ދެމެހެއްޓުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ. އަދި ޢަރަބި އިސްލާމީ ޤައުމުތަކާއެކު އޮންނަ ގުޅުންވެސް އިތުރަށް ވަރުގަދަ ކުރުމަށް މަސައްކަތް ކުރައްވާނެ ކަމަށް ވިދާޅުވިއެވެ. އަދި ބައިނަލްއަޤްވާމީ ޖަމިއްޔާތަކުގެ ކުރިމަތީގައި، ރާއްޖޭގެ ޝަރަފާއި ޤަދަރުވެރިކަން ދަމަހައްޓަވާނެ ކަމަށާއި އަމިއްލަކަންކަން އަމިއްލައަށް ނިންމުމަށް އިސްކަން ދެއްވާނެ ކަމަށްވެސް ވިދާޅުވިއެވެ. އެމަނިކުފާނު ވިދާޅުވީ ރައީސް ކަމުގެ ބުރަ މަސްއޫލިއްޔަތާ އެމަނިކުފާނު ހަވާލުވެ ވަޑައިގެންނެވީ ރާއްޖޭގެ މުސްތަގުބަލާމެދު އާ ހުވަފެންތަކެއް ދެކެވަޑައިގަންނަވަމުން ކަމަށެވެ. އަދި އާ ވިސްނުންތަކަކަށް މަރްޙަބާ ކިޔަމުން ކަމަށެވެ. އަދި އާ އުންމީދުތަކެއް ރައްޔިތުންނަށް ދެއްވަމުން ކަމަށްވެސް ވިދާޅުވިއެވެ.

މިކަންކަން ކާމިޔާބު ކުރެއްވުމަށްޓަކައި އެންމެން ގުޅިގެން މަސައްކަތް ކުރަންޖެހޭ ކަމަށްވެސް ރައީސް ވިދާޅުވިއެވެ. "އަދި ރައްޔިތުންގެ މަޖިލީހުގެ ޢިއްޒަތްތެރި މެންބަރުންގެ ތާއީދާއި އެއްބާރުލެއްވުން އަޅުގަނޑަށާއި އަޅުގަނޑުގެ ސަރުކާރަށް ލިބިގެން. އަޅުގަނޑު ޝައްކެއްނުކުރަން، ރައްޔިތުންގެ މަޖިލީހުގެ ޢިއްޒަތްތެރި މެންބަރުންގެ އެކުވެރިކަމާއި އެއްބާރުލުން، އަޅުގަނޑުގެ މި މަސައްކަތުގައި ތިޔަބޭފުޅުން ދައްކަވާނެކަމާ ދޭތެރެއަކު،" ރައީސް ޔާމީން ވިދާޅުވިއެވެ. މިކަން ހާސިލް ކުރެއްވުމަށްޓަކައި މިނިވަން މުއައްސަސާތަކާއި، ސަރުކާރުގެ ހުރިހާ އިދާރާތަކެއްގެ އެހީތެރިކަންވެސް ބޭނުންފުޅުވާ ކަމަށް ވިދާޅުވިއެވެ. ޖުމްލަކޮށް ހުރިހާ ދާއިރާއެއްގެ އެހީތެރިކަން ބޭނުންފުޅުވާ ކަމަށް އެމަނިކުފާނު ވިދާޅުވިއެވެ.

ރައީސް ޔާމީން ވިދާޅުވީ އެމަނިކުފާނުގެ ސަރުކާރުން "ދުޅަހެޔޮކަމާއެކު ރައްޔިތުންނަށް ދިރިއުޅެވޭނެ އަމާން މާޙައުލެއް" ގާއިމް ކޮށްދެއްވާނެ ކަމުގެ ޔަޤީންކަން، ރައްޔިތުންނަށް ދެއްވާ ކަމަށެވެ. "އެންމެންނަށް ބައިވެރިވެވޭ، ފުދުންތެރި އިޤްތިޞާދަކަށް ބޭނުންވާ ފުރްޞަތުތައް ފަހިކޮށްދީ، ހަމަހަމަކަމާއެކު ވަޒީފާގެ ފުރްޞަތުތައް އިތުރަށް ތަނަވަސްކޮށްދޭނެ ކަމުގެ ޔަޤީންކަން، އަޅުގަނޑު ތިޔަ އެންމެ ލޮބުވެތި ބޭފުޅުންނަށް އަރުވަން" ކަމަށްވެސް އެމަނިކުފާނު ވިދާޅުވިއެވެ.