ގޭގައި ތިބެގެން އާމްދަނީ ހޯދޭނެ ވަސީލަތްތައް އަންހެނުންނަށް ތަނަވަސް ކޮށްދޭނަން: ރައީސް ޔާމީން

ރާއްޖޭގެ އަންހެނުން ގޭގައި ތިއްބަވައިގެން އާމްދަނީ ހޯދޭނެ މަގުތައް ތަނަވަސް ކޮށްދެއްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ދަރުބާރުގޭގައި މިއަދު މެންދުރު ބޭއްވި ރަސްމިއްޔާތުގައި ރައީސް ކަމުގެ ހުވައި ކުރެއްވުމަށްފަހު ގައުމާ މުޚާތަބު ކުރައްވައި ވާހަކަފުޅު ދައްކަވަނުން އެމަނިކުފާނު ވިދާޅުވީ "އަންހެން ކަނބަލުންނަށް، ގޭގައި ތިއްބަވައިގެން އާމްދަނީ ހޯދޭނެ ވަސީލަތްތައް ތަނަވަސްކޮށްދީ، ޢާއިލީ ގުޅުންތައް އިތުރަށް ހަރުދަނާ ކުރުމަށް ކުރަންޖެހޭ މަސައްކަތްތައް، އަޅުގަނޑު ކުރަމުން ގެންދާނެ ކަމުގެ ޔަޤީންކަން އަރުވަން،" ކަމަށެވެ.

މީގެ އިތުރަށް ރާއްޖޭގެ ރައްޔިތުންނަށް އިޖްތިމާޢީ ރައްކާތެރިކަމާއި، އަމާން ވެށްޓެއް ޤާއިމްކޮށްދިނުމަށް އެމަނިކުފާނު ވަރަށްބޮޑު އިސްކަމެއް ދެއްވާނެ ކަމަށްވެސް ވިދާޅުވިއެވެ.

އެމަނިކުފާނު ވިދާޅުވީ ޤައުމު ބިނާކުރުމުގެ މަސައްކަތުގައި، އަންހެނުންގެ ދައުރު ފުޅާކުރައްވާނެ ކަމަށެވެ. އަދި އަންހެނުން އަދާކުރާ މުހިންމު ދައުރާމެދު ހޭލުންތެރިކަން އިތުރުކުރުމަކީވެސް މި ސަރުކާރުގެ އިޖްތިމާޢީ ސިޔާސަތުގެ މުހިންމު ރުކުނެއް ކަމަށްވެސް ވިދާޅުވިއެވެ.

ޔާމީން ވިދާޅުވީ އެމަނުކުފާނުގެ ސަރުކާރުގައި މަސްތުވާތަކެތީގެ ނުރައްކަލުން މި ޖީލު ސަލާމަތް ކުރެއްވުމަށް މަސައްކަތް ކުރައްވާނެ ކަމަށެވެ. އަދި މަސްތުވާތަކެތީގެ ވަބާގައި ޖެހިފައިވާ ކުދިން އެކަމުން ސަލާމަތްކޮށް އަނބުރާ މުޖްތަމަޢަށް ގެނައުމަށްވެސް މަސައްކަތް ކުރައްވާނެ ކަމަށެވެ. މީގެ އިތުރަށް އެކުދިންނަކީވެސް މަސައްކަތްތެރި ކުދިންނަށް ހެދުމަށް ވަރަށްބޮޑު ސަމާލުކަމެއް ދޭން މިއަދުވަނީ ޖެހިފައި ކަމަށެވެ. "މިރޮނގުން މިހާރު ކުރެވޭ މަސައްކަތްތައް އިތުރަށް ފުޅާކޮށް، މި ވަބާއިން ދިވެހި ޤައުމާއި ރައްޔިތުން ސަލާމަތް ކުރުމަށް، ކުރަންޖެހޭ މަސައްކަތްތައް ކުރުމުގައި އަޅުގަނޑު އިރާދަކުރެއްވިއްޔާ، ފަހަތަށްނުޖެހޭނެ ކަމުގެ ޔަޤީންކަންވެސް އަރުވަން،" ކަމަށް އެމަނިކުފާނު ވިދާޅުވިއެވެ.

ރާއްޖޭގެ ތަޢުލީމީ ނިޒާމާ ބެހޭ ގޮތުން އެމަނިކުފާނު ވިދާޅުވީ ތަޢުލީމީ ދާއިރާގައި ކުދިންގެ އަޚްލާގަށް އިސްކަންދިނުމަކީ، ރަނގަޅު ޖީލެއް ބިނާކުރުމަށްޓަކައި ވަރަށް ބޭނުންތެރި ކަމެއް ކަމަށެވެ. "މާތްވެގެންވާ އިސްލާމްދީނަށް ޙުރްމަތްތެރިކޮށްހިތާ، ރިވެތި އަޚްލާޤުގެ މަތީގައި ކުދިން ބޮޑުކުރުމަކީ، ރާއްޖޭގެ ކުރިމަގު ބާއްޖަވެރިކުރުމަށްޓަކައި އޮތް ވަރަށް މުހިންމު ކަމެއް،" ކަމަށްވެސް ވިދާޅުވިއެވެ.

ޔާމީން ވިދާޅުވީ އެމަނިކުފާނުގެ ސަރުކާރުން ރައްޔިތުންގެ ހަރުމުދަލަށް އިޙްތިރާމް ކުރައްވާނެ ކަމަށެވެ. "މި ސަރުކާރަކީ ރާއްޖޭގެ މުހިންމު ހިސާބުތަކުގައި ހުރި ބިންބިމާއި، ސަރަޙައްދުތަކުގެ ބޭނުން، އެންމެ އެދެވޭގޮތުގައި ހިފާ، އެ ސަރަޙައްދެއްގެ ރައްޔިތުންނަށް، އެކަމުގެ ފައިދާ ހޯދައިދިނުމަށް މަސައްކަތް ކުރާނެ ސަރުކާރެއް ކަމުގެ ކަށަވަރުކަން އަރުވަން. ހަމައެހެންމެ، ދިވެހިންގެ ފަޚްރުވެރި ބިނާތައް އަޅުގަނޑުމެން ޙިމާޔަތް ކުރާނަން. ރާއްޖޭގެ ވިޔަފާރިއާއި އިޤްތިޞާދުގެ މައި ދޮރާށި ރައްކާތެރިކޮށްދޭނަން،" އެމަނިކުފާނު ވިދާޅުވިއެވެ.

އެމަނިކުފާނުގެ ވެރިކަން ވެގެންދާނީ މާޔޫސްކަމާއި ނުތަނަވަސްކަމުގައި ތިއްބެވި ރައްޔިތުންނަށް، އުފާފާގަތި ދުވަސްތަކެއް ފެނިގެންދާނެ ވެރިކަމަކަށް ކަމަށްވެސް ވިދާޅުވިއެވެ.