ރާއްޖެޓީވީ ރޯކޮށްލި މައްސަލާގައި ތިން މީހުން ހައްޔަރު ކޮށްފި
17 އޮކްޓޯބަރ 2013 22:02
ރާއްޖެ ޓީވީ އަދި ރާއްޖެ ޓީވީ ހުންނަ އިމާރާތުގައި އަލިފާން ރޯކޮށްލާފައިވާ މައްސަލައާ ގުޅިގެން 3 މީހަކު ފުލުހުންގެ ބެލުމުގެ ދަށަށް ގެނެސްފި ކަމަށް ފުލުހުން ހާމަކުރައްވައިފިއެވެ.
މިމައްސަލާގައި ފުލުހުން ހައްޔަރުކޮށްފައިވަނީ 24 އަހަރުގެ މީހަކާއި 21 އަހަރުގެ މީހެއްގެ އިތުރަށް 18 އަހަރުގެ މީހެއް ކަމަށްވެސް ފުލުހުން ބުންޏެވެ. ނަމަވެސް މިމީހުންނާ ބެހޭ އެއްވެސް ތަފްސީލެއް ފުލުހުން ހާމައެއް ނުކުރައްވައެވެ.
މިމައްސަލައާއި ގުޅިގެން އިތުރު ބައެއް ހޯދުމުގެ މަސައްކަތް ކުރައްވަމުން ގެންދަވާ ކަމަށްވެސް ފުލުހުންވަނީ ބުނެފައެވެ.
"ރާއްޖެ ޓީވީ އަށާއި ރާއްޖެ ޓީވީ ހުންނަ އިމާރާތަށް އަލިފާން ރޯކޮށްލާފައިވާ މައްސަލައާ ގުޅިގެން ތުހުމަތުކުރެވޭ އިތުރު ފަރާތްތައް ހޯދުމުގެ މަސައްކަތްވެސް ފުލުހުން ދަނީ ކުރަމުންނެވެ. އަދި މިފަދަ މައްސަލަތައް ތަހުޤީޤު ކުރުމުގައި އާއްމު ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުމާއި އެހީތެރިކަން މި ފުރުސަތުގައި ފާހަގަކޮށް ޝުކުރު އަދާކުރަމެވެ." ފުލުހުންގެ ވެބްސައިޓުގައި ބުނެފައިވެއެވެ.
ރާއްޖެޓީވީގައި ރޯކޮށްފައިވަނީ މިދިޔަ ހަފްތާގައެވެ. އެތަން ރޯކޮށްލުމުން އެތަނުގެ ވަރަށްގިނަ މުދާވަނީ އަނދައި އަޅިއަށްވެފައެވެ. އެތަނަށް ލިބުނު ގެއްލުން އެއްމިލިއަން ޑޮލަރަށް އަރާނެ ކަމަށް ރާއްޖެޓީވީން ބުނެފައިވެއެވެ.
ކިޔުންތެރިންގެ ހިޔާލު